VOV4.Bahnar - Đĭ 72 sơ năm, tơ plih yua kơ ngôi hơ dai chơt hăm kon sâu, linh so  Phùng Văn Toàn tơ̆ phường Nghĩa Tân, pơ lei tơm Gia Nghĩa, dêh char Dak Nông ‘noh rơ̆ih ăn kơ dih tơ drong jang vei lăng pơ sat. Vă jê̆ 10 sơ năm kơ âu, ƀok tang măt ŭnh hnam rim, ‘nhŏng oh soh nhang ƀâu phu, vei lăng hloh 500 tŏ pơ sat linh lôch dŏng teh đak dêh char vă ƀlŏk hơ dơ̆r, băt bơ nê kơ bôl buăl.   

Dôm năr âu pơ lei tơm Gia Nghĩa, dêh char Dak Nông tŏk bŏk jang kiơ̆ ư̆h kơ ăn yak vih vơ̆t kiơ̆ tơ drong tơ chơ̆t 16 đơ̆ng Thủ tướng teh đak vă tang găn jĭ Covid-19. Mă lei, tơ̆ pơ sat linh lôch dŏng teh đak dêh char Dak Nông dôm pơ sat linh lôch dŏng teh đak oei đei hơ met ăn Lêh ƀlŏk hơ dơ̆r kơ rim linh nŭih mơng lôch dŏng teh đak lơ̆m ‘năr  27/7. Ƀok Phùng Văn Toàn, vei lăng pơ sat linh lôch dŏng teh đak dêh char Dak Nông tơ roi, sơ năm jĭ hơ buh đei ƀôh kơ tang kơ na lơ ŭnh hnam linh lôch dŏng teh đak ư̆h kơ gơ̆h năm soh nhang. Klo kăn nhi hơ drin ‘măn thim jơ năr hơ met tơ mam soi, sut hơ met dôm pơ sat rơ goh tơ gŭm ŭnh hnam rim linh lôch dŏng teh đak ƀôh hiôk lơ̆m jơ hngơ̆m.

“Ĭnh đei arih ‘noh ĭnh tơ chĕng dơ̆ng lơ̆m khei ‘năr mơ mat hloh đei bôl buăl vang tơ gŭm mă truh đei sa yua ‘noh bôl buăl ư̆h pă đei bơ̆ih.  Đei dôm bơ ngai 1 sơ năm, dăh mă 5 truh 7 sơ năm ư̆h kơ đei ŭnh hnam năm soh nhang hiă 1 pôm nhang mă lei ĭnh gô soh nhang tơ plih ŭnh hnam dôm bôl buăl hlôi plang hơ kâu lôch ƀŭ tơ̆ âu, pơ lung dôm đe buăl, vă pơm tơ nŏ dơ̆ng pơ sat đe sư”.

Ƀok Toàn tơ roi, sơ năm 1970, ƀok mơ̆t pơm ƀô̆ đô̆i vang tơ blăh hŭt ayăt Mi dŏng teh đak, bơ̆ jang tơ̆ hơ nih tơ blăh tơ ring pơ băh ding truh năr rơ ngei hiôk hian teh đak. Truh sơ năm 1979, ƀơ̆t tơ blăh vang tơ ring sơ lam đei ƀôh tơ̆ găh tu, ƀok ‘noh năm pơ vih pơ văn ăn teh đak dơ̆ng. Sơ năm 1992, ƀok kŭm hăm ŭnh hnam lĕch đơ̆ng pơ lei Vĩnh Phúc năm tơ̆ Dak Nông pơ jing tơ drong jang sa. Vă ƀlŏk hơ dơ̆r kơ dôm bôl buăl đĭ hiong, ƀok pĭnh kơ dih jang vei lăng pơ sat, rim năr bơ ngơ̆t chă soh bơ̆n nhang ăn kơ dôm lĭnh lôch dŏng teh đak đei ƀŭ tơ̆ pơ sat linh lôch dŏng teh đak dêh char Dak Nông. Hăm ƀok, vei lăng pơ sat ư̆h kơ hơ drô̆ jing tơ drong jang, mă ‘noh oei jing hơ năp jang, tơ drong băt ‘mêm đơ̆ng bơ ngai hăm dôm bôl buăl hlôi lôch hơ chăng.

Linh so Phùng Văn Toàn vă jê̆ 10 sơ năm vei lăng tep hlơ̆k ăn bôl buăl

Trương Văn Bình, Phŏ Bí thư anih jang Đoàn dêh char Dak Nông tơ băt, dôm tơ drong jang đơ̆ng ƀok Toàn hlôi tưk tơ iung dơ̆ng tơ drong joăt joe ‘mêm kơ teh đak ăn sơ năm mơ lôh dêh char Dak Nông. Mư̆h rim ‘măng truh dôm năr Têt, lêh tih kơ teh đak đoàn viên hơ druh tơ dăm lơ̆m dêh char ‘noh năm tơ̆ pơ sat vang hơ dai hăm mih vei lăng rim pơ sat linh lôch dŏng teh đak.

“Mih tôch kơ rơ hâu pơ tho, tơ ƀôh hơ nih soh nhang ăn kơ khŭl năm hơ pong. Đei lơ tơ drong jang ƀơ̆t ‘năr ‘mi ‘năr tŏ mih kŭm ư̆h kơ đei ‘nhoen vang hơ dai hăm rim khŭl, hăm hơ druh tơ dăm vă jang kiơ̆ tơ drong jang pơ tih gia nhen lêh soh ŭnh jrĕnh ƀlŏk hơ dơ̆r. Đơ̆ng jơ hngơ̆m đon ‘lơ̆ng đơ̆ng mih Toàn, hơ druh tơ dăm kŭm kơ chăng năm tơ gŭm mih 1,2 tơ drong jang hơ pŭih hơ met rơ goh, pơ rŏ tâp pơ kao, hơ met ming hơ nơ̆ng. Mih Toàn oei jing bơ ngai ‘lơ̆ng vă nhôn tơ ƀôh jơ hngơ̆m đon jang tơ năp đơ̆ng sơ năm mơ lôh, đon băt nhă đak ƀlŏk kơ tu.”

Dang ei pơ sat linh lôch dŏng teh đak dêh char Dak Nông tŏk bŏk jing hơ nih ƀŭ hloh 500 tŏ pơ sat linh lôch dŏng teh đak, lơ̆m noh đei hloh 200 tŏ pơ sat oei tam mă băt hơ dăh ŭnh hnam ‘nhŏng oh, pơ lei pơ la. Yă Nguyễn Thị Hương, Phŏ kơ dră Anih vei lăng găh bơ ngai jang - linh jĭ rơ ka păng tơ pôl dêh char Dak Nông tơ băt, vă jê̆ 10 sơ năm tơ klep hăm tơ drong jang vei lăng pơ sat năr hơ yơ, ƀok Toàn kŭm năm tơ̆ âu hơ pŭih hơ met hnam soi tơ beh, vei lăng ‘long pơ rŏ, sut hơ met rim pơ sat, soh nhang păng tơ̆k ŭnh kơ đeng hơ dăh ăn pơ sat rim linh lôch dŏng teh đak.

“Sư ƀôh akhan ‘nâu jĭ tơ drong jing ‘lơ̆ng lei lăi nhen bơ ngai kră jang chă tơ gŭm ‘mêm mơ nat kơ na sư ƀôh tôch kơ chôk hơ iă. Pơ đĭ hloi hơ kăn sơ kŭm thoi noh, rim sơ năm đei năr lêh, năr têt kŭm tơ gop jơ hngơ̆m vang pơm dôm mâm lêh vă soi kơ linh lôch dŏng teh đak. Păng rim sơ năm nhôn đei dôm tơ drong jang tơ gŭm ăn sư pơm liơ vei sơ đơ̆ng đei tơ drong vei lăng pơ sat linh lôch dŏng teh đak, kŭm nhen sư đei tơ drong arih sa chơt hiôk.”

Dôm pơ sat linh lôch dŏng teh đak đei ƀok Toàn vei lăng rim năr

Hăm dôm tơ drong vang tơ gop lơ̆m tơ drong jang vei lăng pơ sat linh lôch dŏng teh đak dêh char Dak Nông, sơ năm 2020, ƀok Toàn jing 1 lơ̆m 3 ‘nu kơ dêh char Dak Nông đei Anih tơm vei lăng găh bơ ngai jang, linh jĭ rơ ka păng tơ pôl pôk pơ ư “ Bơ ngai ‘lơ̆ng bơ̆ jang yua kơ tơ pôl”. ‘Nâu jĭ chơt hơ iă kŭm jing hơ năp jang vă ƀok Toàn tơ klep hăm tơ drong jang vei lăng tep hlơ̆k ăn bôl buăl păng gô ŭnh hnam, ‘nhŏng oh rim linh nŭih mơng lôch dŏng teh đak năm iŏk.

            Tuấn Anh: Chih

Thuem: Tơ blơ̆