VOV4.Bahnar - Đơ̆ng sơ năm 2016, Khŭl chĕp kơ̆l pơ gơ̆r Anih jang Đảng apŭng Kon Plông, dêh char Kon Tum tơ lĕch ăn Tơ drong jang kơ sô̆ 26 tơ lĕch jang kiơ̆ tơ drong jang tơm teh đak pơ jing tơ ring tơ rang ‘nao, jăl jang 2016-2020”. Đơ̆ng rŏng vă jê̆ 5 sơ năm tơ lĕch jang, Tơ drong jang 26 hlôi hơ nhăk ăn dôm tơ drong tơ plih ‘lơ̆ng ăn um ai choh jang sa, tơ ring tơ rang păng hơ tŏk ‘lơ̆ng tơ drong arih sa kon pơ lei.

Ƀok Lê Đức Tín – Phŏ Kơ dră Anih vei lăng kon pơ lei apŭng Kon Plông tơ băt: Vă pơm hơ dăh ‘lơ̆ng trong jang đơ̆ng khŭl chĕp kơ̆l pơ gơ̆r Anih jang Đảng apŭng găh tơ drong jang pơ jing tơ ring tơ rang ‘nao, Anih vei lăng kon pơ lei apŭng Kon Plông athei rim anih jang kơ pal pơ jing, jang tơ gŭm ăn Anih vei lăng kon pơ lei apŭng tơ lĕch rim trong vă jang, tơ drong jang vă pơ gơ̆r jang kiơ̆ 1 trong hơ dăh, khoa hŏk, băt hơ dăh dôm tơ drong hơ găt kăl tơ lĕch jang kiơ̆ rim sơ năm păng lơ̆m pơ đĭ jăl jang hloi; rim hơ năp jang, tơ drong hơ găt pơ jing tơ ring tơ rang ‘nao đei tơ gŭm hơ drol tơ lĕch jang ‘lơ̆ng, pơm tơ drong hơ iă vă tơ lĕch jang keh đang rim tơ drong hơ găt pơ jing tơ ring tơ rang ‘nao uơ oei dơ̆ng lăp hăm yan âu tơ̆ tơ ring...

 Băt hơ dăh anih jang kăl tơ ring tơ rang ‘noh jĭ tơ drong tơm lơ̆m tơ lĕch jang kiơ̆ pơ jing tơ ring tơ rang ‘nao, hơ tŏk tơ iung mŭk drăm – tơ pôl tơ̆ tơ ring tơ rang, jăl jang 2016-2020, apŭng Kon Plông akŏm rim kon jên tơ gŭm hơ drol tơ mơ̆t jên jang ming man rim anih jang kăl tơ ring tơ rang.

            Truh dang ei, apŭng Kon Plông đei 7/8 xăh jang đang tơ drong hơ găt kơ sô̆ 2 găh trong nơ năm, tŏk 6 xăh; 8/8 xăh jang đang tơ drong hơ găt kơ sô̆ 3 găh dơ nâu đak, tŏk 5 xăh; 8/8 xăh jang đang tơ drong hơ găt kơ sô̆ 4 găh ŭnh điên, tŏk 3 xăh; 4/8 xăh jang đang tơ drong hơ găt kơ sô̆ 5 găh hnam trưng hŏk, tŏk 2 xăh; 5/8 xăh jang đang tơ drong hơ găt kơ sô̆ 6 găh anih jang, tơ mam drăm joh ayŏ, tŏk 4 xăh pơ têng hăm sơ năm 2015.

Hơ dai hăm ‘noh, apŭng Kon Plông băt hơ dăh tơ drong tŭn pran hơ tŏk tơ iung pơm tơ lĕch, hơ tŏk ‘lơ̆ng iŏk yua ăn kon pơ lei ‘noh jĭ 1 lơ̆m dôm tơ drong kăl tơ gŭm hơ drol athei vă pơm ‘lơ̆ng lơ̆m pơ jing tơ ring tơ rang ‘nao; lơ̆m noh akŏm tơ lĕch jang kiơ̆ đei iŏk yua hơ met ming tơ drong jang choh jang sa tơ klep hăm pơ jing tơ ring tơ rang ‘nao.

Gơ nang đơ̆ng noh, đơ̆ng rŏng 5 sơ năm, tơ gop pơm tơ jur kơ sô̆ ŭnh hnam dơ nuh hin tơ ring tơ rang jur oei pă 14,98% (sơ năm 2020), jur 39,31% pơ têng hăm sơ năm 2015; iŏk yua păh lăp kơ̆l bơ ngai sơ năm 2020 đei 33,5 triệu hlak jên, tŏk 16,74 triệu hlak jên 1 ‘nu pơ têng hăm sơ năm 2015.

Apŭng lăng kăl tơ drong jang pơ tho pơ hrăm tơ drong jang ăn bơ ngai jang tơ ring tơ rang păng hlôi pơ tho đei 2.282 ‘nu, đei 91% tơ drong hơ găt tơ lĕch ăn; lơ̆m noh pơ tho tơ drong jang choh jang sa 2.107 ‘nu, đei 92,3%. Mă loi ‘noh, tơ drong jang pơ tho tơ drong jang tơ klep hăm tơ chă ăn tơ drong jang hlôi tơ gop pơm hơ tŏk kơ sô̆ bơ ngai jang kiơ̆ đơ̆ng pơ tho pơ hrăm păng kơ sô̆ bơ ngai jang kiơ̆ đơ̆ng pơ tho pơ hrăm đei tơ drong jang roi ‘năr roi tŏk.

Lơ̆m tơ drong jang pơ tho pơ hrăm, tơ drong jang hnam trưng lăm hŏk đei apŭng bơ ngơ̆t truh tơ mơ̆t jên jang, pơm hơ met, pơ̆ih să, pơm lăp hăm ‘mĕh vă hŏk pơ hrăm đơ̆ng kon pơ lei. 9/9 xăh, thị trấn đei hŏk jăl 1 ƀlep sơ năm păng hŏk jăl 2; đĭ đăng kơ sô̆ xăh, thị trấn đei hŏk mầm non ăn hơ ioh 5 sơ năm.

            Anih jang tơ mam drăm, bơ ngai jang pơ gang tơ̆ tơ ring đei hơ tŏk loi dơ̆ng tơ mơ̆t jên jang. Lơ̆m apŭng dang ei đei 9/9 xăh, thị trấn jang đang tơ drong hơ găt găh jang pơ gang, đei 100% tơ drong hơ găt vă jang tơ lĕch ăn.

            Tơ drong jang vei lăng cham char ling lang đei bơ ngơ̆t truh, tơ drong jang tơm teh đak găh đak rơ goh păng pơm rơ goh cham char tơ ring tơ rang tơ lĕch jang đei iŏk yua. Truh dang ei, kơ sô̆ ŭnh hnam yua đak rơ goh, ‘yâu tơ̆ tơ ring tơ rang đei 98%, tŏk 8% pơ têng hăm sơ năm 2015.

Gơ nang đơ̆ng bơ̆ jang kiơ̆ ‘lơ̆ng rim trong jang lơ̆m kơ plăh tơ lĕch jang, tơ drong bơ̆ jang kiơ̆ tơ drong jang pơ jing tơ ring tơ rang ‘nao tơ̆ apŭng Kon Plông lơ̆m khei ‘năr âu ki iŏk đei dôm jơ nei ‘lơ̆ng. Truh hơ tuch sơ năm 2020, lơ̆m apŭng đei 2 xăh jang đang ‘lơ̆ng 19/19 tơ drong hơ găt păng hlôi đei Anih vei lăng kon pơ lei dêh char drơ̆ng ăn xăh jang đang ‘lơ̆ng tơ ring tơ rang ‘nao. Kăl kơ lăng truh, kơ sô̆ tơ drong hơ găt jô̆ păh lăp jang đang ‘lơ̆ng lơ̆m 1 xăh ‘noh 15,8 tơ drong hơ găt; tŏk 10,2 tơ drong hơ găt jô̆ păh lăp 1 lơ̆m pơ têng hăm sơ năm 2015. Hơ mĕng tơ̆ hơ năp kơnh, tơ drong tơ lĕch jang Tơ drong jang tơm teh đak pơ jing tơ ring tơ rang ‘nao kơ apŭng Kon Plông hơ nhăk ăn lơ jơ nei ‘lơ̆ng, yak truh jang đang tơ drong hơ găt pơ jing tơ ring tơ rang ‘nao lơ̆m tơ ring kiơ̆ ƀlep trong vă jang tơ lĕch ăn.

            Thuem: Tơ blơ̆