VOV4.Bahnar - Tơ drong tơm teh đak pơ jing tơ ring tơ rang ‘nao jing tơ drong jang să jơ̆p lơ̆m teh đak pơ ma atŭm, Dak Nông pơ ma hơ drô̆. Tơ drong jang hlôi pơm tưk jơ hngơ̆m pran kơ tang, akŏm tơ drong tơ goăt tơ goăl đơ̆ng rim răih lơ̆m tơ pôl, hơ vơn kơ sư̆k pran găh jơ hngơ̆m đon păng tơ mam drăm vă pơ jing tơ ring tơ rang roi ‘năr roi tơ plih ‘lơ̆ng, mă loi ‘noh jĭ tơ ring mơ mat tat dêh hloh păng tơ ring kon pơ lei kon kông.

Mă đơ̆ng đei lơ teh ră, mă lei tơ drong pơ ngot, dơ nuh hin prăt sơ năm druh kiơ̆ tơ drong arih sa ŭnh hnam ƀok Ðiểu Byan (bơ ngai M’Nông), oei tơ̆ plei Ðiêng Ðu, xăh Ðắk Ngo, apŭng Tuy Ðức, dêh char Dak nông. Tơ drong oei jing yua đơ̆ng ŭnh hnam sư tam mă băt trong jang sa, choh jang sa kiơ̆ tơ drong joăt so.

Tơ drong jang pơ jing tơ ring tơ rang ‘nao hlôi tơ gŭm ƀok Ðiểu Byan tơ chă trong năm ƀlep lơ̆m hơ tŏk tơ iung mŭk drăm păng yak tŏk pơm pơ drŏng. Đơ̆ng rŏng kơ sư đei vang hŏk lơ lăm pơ trŭt choh jang sa, pơ hrăm khoa hŏk – ki thuơ̆t hlôi hơ dai hăm ŭnh hnam pơ̆n choh hơ met ming teh, hơ met dơ̆ng mir pơ gar pơ tăm điêu, cheh phe lơ̆m teh xă 8 hek tar. Teh ‘lơ̆ng, dôm ‘long điêu plei lơ, cheh phe hơ drĕch ‘nao hlôi ăn plei ‘yăl hăm iŏk yua kơ hrĕng triệu hlak jên rim sơ năm. Ƀơ̆t đĭ klăih đơ̆ng pơ ngot dơ nuh hin, ƀok Ðiểu Byan pơ̆n tơ mơ̆t jên jang vei rong dơ̆ng rơ mo lai hăm trong năm kiơ̆ tơ drong jang pơ tăm lơ kơ loăi ‘long, rong lơ kon tơ rong vă veh ver ư̆h kơ pŭn ai păng kơ jă tĕch ư̆h kơ sơ đơ̆ng đơ̆ng dôm tơ mam choh jang sa đei, gơ nang đơ̆ng noh iŏk yua kơ ŭnh hnam ling lang sơ đơ̆ng. Dang ei, rim sơ năm, jô̆ đĭ jên jang, ŭnh hnam sư đei iŏk yua sơ đơ̆ng hloh 400 triệu hlak jên. Ư̆h khan lăp pơm pơ drŏng ăn kơ dih kâu đĕch, ƀok Ðiểu Byan oei tơ gŭm 4 ŭnh hnam dơ nuh hin mơng rơ mo yŏng vă rong tuh iŏk rơ mo kon, vă pơm tơ drong hiôk găh jên vă kơ kon pơ lei lơ̆m pơ lei vang klăih đơ̆ng dơ nuh hin. Đơ̆ng dôm tơ drong jang hơ dăh ‘lơ̆ng, đei yua, âu ki ƀok Ðiểu Byan đei pôk pơm lơ̆m kơ dră đảng chi bộ, bơ ngai pơ gơ̆r pơ lei plei Ðiêng Ðu.

Ƀok Ðiểu Byan hiĕm rơ mo

Tơ roi găh tơ drong jang pơ jing tơ ring tơ rang ‘nao, ƀok Ðiểu Byan tơ băt, ‘nâu jĭ tơ drong jang tôch kơ ‘lơ̆ng hăm kon pơ lei, mă loi ‘noh jĭ tơ ring mơ mat tat dêh hloh păng tơ ring kon pơ lei kon kông. Gơ nang đơ̆ng đei tơ drong jang ‘nao tơ iung, akŏm đei jơ hngơ̆m pran pôm ƀơ̆r đon; pơm tơ plih ‘nao đon tơ chĕng đơ̆ng kon pơ lei lơ̆m jang sa tơ klep hăm khoa hŏk – kơ măy kơ mŏk; tơ klep hơ năp jang đơ̆ng kơ dih hăm ŭnh hnam, kon pơ lei păng tơ pôl, pơm tơ drong tơ klep kon pơ lei.

Pơ jing tơ ring tơ rang ‘nao hlôi pơm ăn um ai tơ ring tơ rang tơ plih tôm pơ đĭ găh tơ mam drăm, jơ hngơ̆m đon păng kon bơ ngai ‘nao; pơm tơ drong tơ klep găh tơ drong ‘mêm păng oei sa ‘lơ̆ng hơ iă đơ̆ng rim hơ drĕch hơ drŭng hăm băl. Kiơ̆ kơ ƀok Ðiểu Byan, đei kon pơ lei lui pôk pơm bơ ngai pơ gơ̆r pơ lei ‘noh jĭ tơ drong tôch kơ chhôk ‘nă. Mă lei, ‘nâu kŭm jing hơ năp jang tôch kơ tih, kơ dih kâu ling lang hơ drin jang đang ‘lơ̆ng hơ năp jang vă hơ dai hăm kon pơ lei lơ̆m pơ lei jang kiơ̆ đang tơ drong jang pơ jing tơ ring tơ rang ‘nao.

Hơ drol kơ khei ‘năr jang kiơ̆ tơ drong jang pơ jing tơ ring tơ rang ‘nao, plei Bu Bir, xăh Quảng Tín, apŭng Ðắk R’Lấp, dêh char Dak Nông đei 96 ŭnh hnam kon pơ lei, mă lei đei truh 16 ŭnh hnam dơ nuh hin păng 30 ŭnh hnam vă jê̆ dơ nuh hin. Trong nơ năm găh lơ ‘noh dôm trong teh, hơ nhăk truh mơ mat tat lơ̆m tơ drong chơ chuĕn tơ mam, phŏng lơ̆m rim tơ ring choh jang sa, bơ ngai mơ dro hơ nơ̆ng pơ gơ̆ kơ jă. Iŏk đơ̆ng tơ lĕch jang tơ drong jang pơ jing tơ ring tơ rang ‘nao, đei tơ drong tơ gŭm găh jên ming man trong nơ năm, tơ gŭm ‘long, kon yŏng, khoa hŏk – ki thuơ̆t..., kon pơ lei tơ ring ‘nâu tôch kơ chhôk hơ iă plang song teh pơm trong, pơ̆n tơ plih ‘long pơ tăm iŏk yua lơ, tơ mơ̆t yua khoa hŏk – ki thuơ̆t lơ̆m jang sa iŏk đei jơ nei ‘lơ̆ng. Dang ei, lơ̆m pơ lei lăp oei pă 4 ŭnh hnam dơ nuh hin, 10 ŭnh hnam vă jê̆ dơ nuh hin, kơ sô̆ trong pơm man đei hloh 90%...

Truh dang ei, lơ̆m dêh char hlôi đei 29 xăh lơ̆m kơ sô̆ 60 xăh jang đei ‘lơ̆ng tơ ring tơ rang ‘nao. hăm 12 xăh mơ mat tat dêh hloh găh 2 apŭng 30a ‘noh Tuy Ðức păng Ðắk Glong truh dang ei tă kơ iŏk đei hloh 10 tơ drong hơ găt; mŭk drăm – tơ pôl tơ ring tơ rang mơ mat tat hloh, mă loi ‘noh jĭ tơ ring kon pơ lei kon kông đei bơ ngơ̆t truh tơ mơ̆t jên jang.

Kơ dră Khŭl jang krao hơ vơn kon pơ lei kơ Anih jang Đảng dêh char Dak Nông Hà Thị Hạnh tơ băt, hăm kon pơ lei kon kông dêh char Dak Nông pơ ma atŭm, mă loi ‘noh jĭ kon pơ lei kon kông kơ tă anih ‘noh khŭl jang tơm dơ nơm ‘noh jĭ kră pơ lei, bơ ngai pơ gơ̆r pơ lei, bơ ngai đei đe lui yom păng đảng viên lơ̆m khei ‘năr âu ki hlôi hơ tŏk ‘lơ̆ng đei hơ năp jang ‘lơ̆ng lơ̆m jang kiơ̆ rim trong jang đơ̆ng Ðảng, trong jang tơ gŭm, khôi luơ̆t đơ̆ng teh đak, tơ gop pơ jing pơ lei pơ la roi ‘năr roi pơ drŏng pran. Lơ̆m noh, lơ bơ ngai hlôi đei trong tơ chĕng, trong jang hơ gei, tơ mơ̆t yua khoa hŏk – ki thuơ̆t lơ̆m pơ jing jơ nei rim tơ drong jang pơm tơ lĕch, tĕch mơ dro ăn iŏk yua lơ, pơm đei rim tơ drong jang pơ jei băl jang sa ‘lơ̆ng hơ iă tơ̆ tơ ring tơ rang, tơ ring kon pơ lei kon kông; lơ bơ ngai hlôi đei kơ dră đảng, khŭl kơ dră tơ ring pôk pơ ư, kon pơ lei lui pôk pơm bơ ngai pơ gơ̆r kơ tơ ring, jing bơ ngai jang chĭnh trĭ tơ̆ tơ ring.

                                                                                    Thuem: Tơ blơ̆