Ƀât blŭng sơnăm ‘nâu, tơ̆ Anih ‘măn răk tơmam Đắk Lắk, plt Buôn Ma Thuột pơgơ̆r 1 ‘măng pơdă um rup đơ̆ng kơdih hăm hơnăn “Trường Sa – Tơring tơ̆ jih đak dơsĭ”. ‘Măng pơdă đei vă jê̆ 100 tŏ rup phĭn tơ ƀôh găh tơdrong pơtâp pơhrăm, kơchăng tơblăh păng tơdrong arih xa kơ đe kăn ƀô̆, linh păng kon pơlei tơ̆ achon kông Trường Sa; rup phĭn tơƀôh 21 tŏ kông tơ̆ achon Trường Sa kŭm hăm lơ tơmam nhen Hla kơ teh đak, Hla kơ khul linh đak dơsĭ Việt Nam, tơmam pơm đơ̆ng hmok ƀrăng, kơđŏh hơbâu yoa đe linh tơ̆ achon kông Trường Sa pơm. Lơ̆m anih ming pơdă oei pơih 5 tâp phim kuay tơƀôh găh Trường Sa.

‘Măng pơdă sơng đei lơ bơngai chă tơmang lăng păng kon pơlei truh lăng. Ƀok Tôn Thất Tuấn Ninh, tơ̆ apŭng Lắk, dêh char Đắk Lắk tơroi, dôm um rup roi tơƀôh tôch hơiă, tôch kơ trŏ găh achon kông Trường Sa kăp gĭt: "Tơ̆ Tây Nguyên păng Đắk Lắk, ‘măng mă blŭng inh đei truh lăng tơ̆ ‘măng pơdă um rup roi tơƀôh găh tơdrong arih kŭm nhen tơdrong jang đơ̆ng đe linh tơ̆ achon Trường Sa, vă kon pơlei tơ̆ Tây Nguyên băt truh tơdrong arih xa tơ̆ jih đak dơsĭ kơ teh đak."

Ưh lăp tơ̆ plt Buôn Ma Thuột đĕch, đơ̆ng sơnăm 2014 truh dang ei, Anih vei lăng tơdrong tơroi tơbăt dêh char Đắk Lắk pơgơ̆r lơ tơdrong roi tơbăt găh tơdrong vei lăng đak dơsĭ. Lơ̆m noh đei tơdrong pơdă “Hoàng Sa, Trường Sa kơ teh đak Việt Nam – Dôm tơmam kăp gĭt đơ̆ng chăl adrol sơ̆, tôch trŏ luơ̆t” tơ̆ dôm apŭng: M’Drak, Ea Kar, Ea Súp, Krông Bông, Ea H’leo, Cư Kuin păng thĭ xăh Buôn Hồ. Tơ̆ rim ‘măng pơdă la-kak păng tơmam, um rup, hla ar chih tơbang đơ̆ng chă adrol sơ̆, tôch trŏ luơ̆t hlôi tơƀôh hơdăh tơdrong tơdrong pơm tơm đơ̆ng Việt Nam hăm 2 achon kông Hoàng Sa păng Trường Sa tơ̆ đak dơsĭ Biển Đông. Dôm hla ar chih hlôi chih tơroi tôch rơđăh lơ̆m chăl arih kơ tah đak Việt Nam păng dôm teh đak, mă loi jĭ dôm hla ar chih tơroi, la-kak đei čhơ̆, in tơlĕch đơ̆ng chăl mă 16 truh dang ei tơ̆ Việt Nam păng lơ teh đak lơ̆m apŭng plenh teh.

Ƀok Nguyễn Quốc Hiệp, Phŏ Kơdră Anih vei lăng tơdrong tơroi tơbăt dêh char Đắk Lắk, Kơdră Anih pơgơ̆r ‘măng pơdă ăn tơbăt: Dôm hla ar chih păng vă jê̆ 100 hlak La-kak đei ming pơdă đei akŏm đơ̆ng lơ anih hlôi đei roi tơbăt đơ̆ng sơ̆ truh dang ei lơ̆m teh đak păng apŭng plenh teh; chih hơdăh khei ‘năr pơjing, bơ̆ jang păng vei lăng tơdrong pơm tơm đơ̆ng Việt Nam hăm 2 achon kông Hoàng Sa păng Trường Sa. Kiơ̆ đơ̆ng rim ‘măng pơdă sơng đei rơbâu ‘nu bơngai truh lăng, chă hơlen năng: "Kiơ̆ đơ̆ng ‘măng pơdă hlôi tơgop gĭt kăl vă pơm hơtŏk đon hlôh vao, đon jang tơbăp đơ̆ng rim kăn ƀô̆, đảng viên pơma hơdrô̆ păng kon pơlei Việt Nam pơma atŭm, tơgop ‘lơ̆ng ăn tơdrong vei lăng đak dơsĭ, achon kông tơ̆ đak dơsĭ kơ teh đak păng bơ̆ jang đei 2 tơdrong gĭt kăl ‘nŏh jĭ pơjing păng vei lăng teh đak".

Tơdrong tơroi tơbăt găh tơdrong pơm tơm tơ̆ đak dơsĭ oei đei dôm tơring lơ̆m dêh char Đắk Lắk pơgơ̆r ăn đe thây kô păng hŏk tro tơ̆ dôm hnam trưng. Tơ̆ thĭ xăh Buôn Hồ, Tơdrong thi “Oh ‘mêm kơ Đak dơsĭ, Achon kông tơ̆ đak dơsĭ Việt Nam” đei pơgơ̆r ƀât hơtuch sơnăm 2023 kiơ̆ trong pơm bơ̆n tông ăn đe hŏk tro tơ̆ dôm Hnam trưng THCS. Kiơ̆ đơ̆ng tơdrong thi, đe thây kô păng hŏk tro hơmet ‘lơ̆ng, chă hơlen năng hơdăh ƀiơ̆ tơdrong pơm tơm Đak dơsĭ, achon kông đak dơsĭ kơ teh đak, đơ̆ng noh tơƀôh hơdăh đon rơgei lơ̆m dôm tơdrong thi pơma tơblang, pơm kĭch âu to.

Kô H’B’hai Mlô, tơ̆ Hnam trưng THCS Trần Phú, phường Đoàn Kết, thĭ xăh Buôn Hồ tơroi: Tơdrong thi ưh lăp pơjing đei anih pơm ngôi chơt hơiă, đei yoa đĕch mă oei tơgop pơm hơtŏk đon hlôh vao ăn đe thây kô păng hŏk tro găh đak dơsĭ kơ teh đak Việt Nam dơ̆ng, đơ̆ng noh tưk tơiung, vei rong jơhngâm đon ‘mêm kơ teh đak, pơlei pơla: "Ăn hŏk tro chă hơlen năng đơ̆ng hrôih găh kơjă kăp gĭt đơ̆ng đak dơsĭ, tơdrong lôch tang plang hơkâu đơ̆ng chăl mĕ ƀă yă ƀok sơ̆ lơ̆m dôm tơdrong tơblăh vei lăng đak dơsĭ, achon kông tơ̆ đak dơsĭ. Vă đe oh băt hrôih đơ̆ng noh đei đon tơchĕng trŏ găh tơdrong kăp gĭt đơ̆ng đak dơsĭ kơ teh đak. Đe oh hŏk tro kŭm tôch čhôk ‘nă mưh chă hơlen năng păng chih răk lơ nơ̆r apinh, dôm tơdrong hlôh vao găh đak dơsĭ".

Oei hăm oh Trần Nguyễn Đăng Khoa, hŏk tro lăm 11A1, Hnam trưng THPT Y Jút, xăh Ea Bhôk, apŭng Cư Kuin, dêh char Đắk Lắk, yoa hưch ‘mêm kơna hơnơ̆ng chă hơlen năng tơdrong roi tơbăt, năng clip găh đak dơsĭ, achon kông tơ̆ đak dơsĭ lơ̆m internet, tơgŭm ăn oh băt hơdăh ƀiơ̆ tơdrong gĭt kăl đơ̆ng đak dơsĭ kơ teh đak: "Hăm ŏh jĭ hŏk tro kơna athei adrin hŏk pơhrăm mă ‘lơ̆ng, adrin roi tơbăt ăn rim bơngai găh tơdrong pơm tơm tơ̆ đak dơsĭ kơ teh đak Việt Nam. Tơdrong ‘mĕh vă đơ̆ng oh ‘nŏh jing 1 ‘nu linh đak dơsĭ, yoa đak dơsĭ jĭ 1 păh ưh gơ̆h tơpleh đơ̆ng teh đak bơ̆n, jing bơngai vei lăng sư ‘nŏh jĭ tơdrong jang tôch sĭt, gĭt kăl hlŏh"./.