Đing hlôm ta lẹh lơ̆m grŭp đing hlôm kơ kon pơlei Giẻ Triêng. Đing hlôm đei pơm đơ̆ng 1 đing phat kơjung pơhlom 70cm, 2 pah kơ̆l ưh đei tŭt. Ah hơnê̆ đing hlôm đei 1 pơlôh ‘măn hlôm. Ah hlôm noh đe athei hlôm pơgăn. Ngê̆ nhơ̆n ưu tŭ Brôl Vẻ, tơ̆ pơlei Đak Răng, xah Đak Dục, apŭng Ngọc Hồi ăn tơbăt: "Đing hlôm mă âu ah hlôm noh athei iŏk ti tơtap ah hơla đing. Mưh hlôm đĕch noh đing ưh đei re brông brŏng ôh. Đing hlôm âu hơdrô̆ đe drŏnglo đĕch gơh hlôm kơlih hăp kơjung. Oei đing tút noh athei hrŭk hơbăn văr, oei ta lẹh noh ưh kơ kăl ôh"

Kăp gĭt kơ tơdra hơri kơ bơngai Giẻ Triêng noh hơdu ‘lơ̆ng nhen nơ̆r pơma tơroi đon bơnôh kơ bơngai hlôm. Lơ̆m noh, tơdra hơdu ‘lơ̆ng kơ đing hlôm Ta lẹh tơ̆ mir ƀa hơnơ̆ng tơbang hơdah kơ tơdrong hơri brông brŏng, tơƀôh tơdrong hơpơi đei minh tơdrong hơrih sơnêp sơnoi, phĭ tơtŏ dơnŏ ‘lơ̆ng kơ bơngai Giẻ Triêng.

Tơdra đing hlôm Ta lẹh ưh đei pơkăl tơnap tap, ‘lơ̆ng rŏ lơ̆m trong tơbang, pơtăl kơ noh athei rơhơi, hiôk kơ dôm bơngai hăt hot kơ bơngai pơm jang. Kiơ̆ ngê̆ nhơ̆n Brôl Vẻ, ah khei jơmŭl rei, đe drăkăn Giẻ Triêng hơnơ̆ng tah găr hơdrĕch ƀa hơƀo lơ̆m hơnuh kram, pơ – o phat vă ‘nhăk tơ̆ mir.

Lơ̆m kơplah hơkunh rei găr ƀa, rim kial tơhlu lơ̆m đing âu pơjing nơ̆r re mơ̆ng sô̆ kơ đon. Dôm tơdra ‘lơ̆ng hiôk, brông brŏng đei pơih pơre đơ̆ng đing phat, đing kram lơ̆m kơplah oei jang mir pơjing đei tơdrong sô̆ hơ-iă, pơchŭt hơlêm đon bơnôh kon pơlei Giẻ Triêng pơm jang kơtang hloh. Đơ̆ng noh, bơngai Giẻ Triêng tơchĕng pơcheh pơjing dôm kơluai brŏ đei đơ̆ng đing phat, pơle, pơ-o, lơ̆m noh hơdah noh đing hlôm Ta lẹh. Đing hlôm tơguăt hăm tơdrong jang mir ƀa kơ kon pơlei, adoi kơyuơ noh mă hăp đei tơdrong sô̆ hơ-iă hloh pơtêng hăm dôm kơluăi brŏ kơ bơngai Giẻ Triêng.

Noh kiơ̆ juăt jue, đing hlôm âu hơdrô̆ đei yua lơ̆m tŏ sĕt khei năr, hơnơ̆ng noh ah hơdrol kơ kăt ƀa đĕch: “Ah ƀa pơtơm tŏk giơ̆ng noh hlôm đing. Jang mir đơ̆ng khei 7 truh ah kăt ƀa noh pă đei hlôm bơih. Kơplah năm tơ̆ mir, jang mir, ah pơdơh ‘năr dơ̆ng dah mă kơmăng, nhôn iŏk đing hlôm vă chă pơhơi kơ đon bơnôh da ƀiơ̆ kơ hrat”.

Kiơ̆ khôi juăt kơ bơngai Giẻ Triêng, Ta lẹh hơdrô̆ đei hlôm tơ̆ mir đĕch. ‘Nguaih kơ pơm rơhơi jơhngơ̆m đon, tơdra đing hlôm Ta lẹh oei ‘măn vă tơbang lơ̆m pơk đei bơngai vei lăng mir ƀa, tơpuh kon sem bri brah pơrăm mir ƀa.

‘Nguaih kơ noh, bơngai Giẻ Triêng oei kâ̆m hlôm Ta lẹh tơ̆ hnam dah mă lơ̆m dôm tơdrong et xa. Đing hlôm hơdrô̆ đei hlôm tơ̆ pơk, ưh gơh ‘nhăk brŏk tơ̆ hnam. Tơblang gah tơdrong âu, Tiến sĩ Bùi Ngọc Quang, Phŏ Kơdră Anih Pơdah gah Hơdrung Kon kông Việt Nam ăn tơbăt: "Đe ưh đei lê̆ đing hlôm âu lơ̆m hnam mă ‘măn hlơp tơ̆ bri. Đe lăng âu jing minh tơmam grasia păng athei ‘măn ah anih srĕp hloh. Kon pơlei Tây Nguyên noh đe juăt tơguăt hăm bri. Hăm đe sư, bri noh jing anih đei yang hơpang dăng oei, anih tơguăt kơjăp srĕp kơ đe sư. Đe ‘măn đing hlôm tơ̆ noh kơlih đe lui anih noh sơđơ̆ng hloh"        

Kiơ̆ kơ khei năr, đing hlôm  Ta lẹh hrei âu hlôi jing minh kơluăi brŏ đei bơngai Giẻ Triêng kơtol tơ̆ hnam păng ‘măn hlôm pơdah lơ̆m tơdrong hơrih xa rim năr dah mă lơ̆m dôm năr et xa, ‘năr sô̆ kơ unh hnam păng pơlei pơla.

Đơ̆ng kră sơ̆, hăm bơngai Giẻ Triêng, tơdra juăt jue noh jing pơhngol păng đei kon pơlei vei răk nhen so. Đing hlôm Ta lẹh pơma hơdrô̆ păng dôm kơluăi brŏ kơ kon pơlei Giẻ Triêng pơma hơtŭm ưh hơdrô̆ tơbang um ai joh ayŏ phara kơdih kơ bơngai Giẻ Triêng, mă oei tơgop pơm hơtŏk tơdra hơri juăt jue kơ dôm hơdrung bơngai kon kông lơ̆m jơ̆p teh đak Việt Nam.