Hơdah, dêh char hlôi sơng 123.500 tơmoi lơ̆m teh đak păng hloh 1.500 tơmoi đơ̆ng teh đak đe, hơkŏp kơsô̆ tơmoi truh tơmang tŏk hloh 8% pơtêng hăm khei năr âu sơnăm sơ̆. Gah lăm oei tơ̆ dôm anih oei pơdơh đei pơhlom 75%. Tơ̆ minh ƀar khăch sạn tơ̆ pơlei tơm Buôn Ma Thuột păng dôm homestay tơ̆ jih đak krong, đak glung, đe chih măt oei hloh 90%. Hơkŏp tơdrong pơyua đơ̆ng tơmang pơhiơ̆ kơ dêh char Đăk Lăk lơ̆m ‘măng âu 62,5 tih hlj.

Kiơ̆ kơ yă Nguyễn Thụy Phương Hiếu, Phŏ Kơdră Anih Joh ayŏ, Tơplŏng kơdâu păng Tơmang pơhiơ̆ Đăk Lăk, dêh char đei lơ mŭk drăm păng tơdrong hiôk vă hơtŏk tơ-iung dôm tơdrong tơmang pơhiơ̆ cham char, pơdơh pơdei, tơmang pơhiơ̆ hŏk hơlen, tơmang pơhiơ̆ pơlei pơla, tơmang pơhiơ̆ tơguăt hăm choh jang xa. Kơyuơ ‘măng pơdơh lêh âu trŏ ah khei tơm kơ pơyan phang, tŏ ‘mi kial lơ̆m dôm năr âu ki pơm ăn dôm tơdrong tơmang pơhiơ̆ âu jing tơdrong lăp đơ̆ng lơ tơmoi chă tơmang.

Adoi Lơ̆m năr pơdơh lêh 30/4 păng 1/5 sơnăm ‘nâu, pơlei tơm Đà Lạt, dêh char Lâm Đồng sơng đei hloh 170.000 ‘nu tơmoi, tŏk vă jê̆ 42% pơting hăm khei ‘nâu sơnăm sơ̆.

Kiơ̆ đơ̆ng hơlen lăng, kơsô̆ lăm ƀĭch pơdơh jô̆ păh lăp đơ̆ng dôm hnam tih tơmoi ƀĭch pơdơh đơ̆ng 1-5 hơnglŏng lơ̆m tơring lơ̆m dôm năr âu kĭ iŏk đei jô̆ păh lăp dang 80%, dôm hơnih tơmoi ƀĭch pơdơh nai kŭm pơvei tơ̆ kơsô̆ 75%. Kŭm hăm tơdrong jang hơmet pơ rŏ anih kơdrơ̆m, hơtŏk ‘lơ̆ng pơvih pơvăn tơmang lăng, năr lêh âu tơ̆ pơlei tơm Đà Lạt pơgơ̆r lơ tơdrong joh ayŏ, ngôi pơchơt, sơng đei păng pơm lăp ‘lơ̆ng ‘meh vă tơmang lăng, pơdơh ngôi đơ̆ng tơmoi lơ̆m păng ‘ngoăih teh đak.

Lơ̆m kơ sô̆ 170.000 ‘nu tơmoi truh tơmang lăng, pơdơh ngôi rơngơp tơ̆ pơlei tơm Đà Lạt lơ̆m năr lêh âu, đei 162.800 ‘nu tơmoi lơ̆m teh đak. Mă đơ̆ng kơsô̆ tơmoi apŭng plĕnh teh oei tam mă gan lơ, lăp ‘nao sơng đei 7.200 ‘nu bơngai mă lei oei tŏk 60% pơting hăm khei ‘nâu sơnăm sơ̆.