Vang thi đei hlŏh 2.500 ‘nu bơngai ‘nŏh jĭ đe hŏk tro tơ̆ dôm Hnam trưng lơ̆m 15 apŭng, thĭ xăh, plt kơ dêh char Đắk Lắk pơjei băl găh 10 môn thi, đei: đă ƀŏng lŏng drŏ nglo, drŏ kăn, pơm cờ vua, Vovinam, thi chok, teh sŏk iĕr, glơi, kơdâu, prăh hră păng thi Erobic.

Dôm bơngai thi pơjei băl iŏk 801 grŭp mê đai dôm kơloăi. Tơdrong thi tơplŏng kơdâu ăn hŏk tro dêh char Đắk Lắk ‘măng mă XVI - sơnăm 2024 (jăl 2) vă pơgơ̆r đơ̆ng ‘năr 5 - 9/3. Kiơ̆ đơ̆ng tơdrong thi vă vei kơjăp, tưk tơiung tơdrong pơtâp pơhrăm tơplŏng kơdâu păng pơm hơtŏk jơhngâm pran ăn hŏk tro tơ̆ dôm hnam trưng lơ̆m dêh char, atŭm hăm ‘nŏh chă ƀôh bơngai tơ plŏng kơ dâu pran, rơgei vă iŏk pơtho pơhrăm, tơmât lơ̆m khul tơplŏng kơdâu kơ dêh char Đắk Lắk păng teh đak.