-H’Juel ăi ih păng unh hnam tơcheng thoi yơ mă pơih Công ty Leng Gung chă roi tơbăt păng tĕch mơdro dôm tơmam tanh sĭt đơ̆ng sơ̆ kơ bơngai M’Nông tơ̆ dêh char Đắk Nông hă?

-H’Juel: Đunh kơ âu 10 sơnăm, ƀât ‘nao chă klo sơ̆, inh ƀôh mih ma duch nă oei chĕp vei lơ tơdrong juăt ‘lơ̆ng, mă loi jĭ tơdrong et soi, oei lơ̆m tơdrong et soi ‘nŏh ưh đei lai yơ thiê̆u tơdrô ge. Đơ̆ng noh inh hŏk iŏk đơ̆ng tơnei trong pai, pơđih tơdrô păng pơm ƀuih, blŭng a pơđih 1,2 tŏ ge tơdrô đĕch vă ăn unh hnam chă et ngôi lơ̆m năr et ot, đơ̆ng rŏng kơ ‘nŏh pai, pơđih tơdrô roi lơ, ưh lăp chă tĕch lơ̆m pơlei đĕch mă oei roi tơƀôh, chă tĕch ăn tơmoi đơ̆ng jơ̆p tơring truh chă tơmang lăng hai păng dang ei tơdrô ge đơ̆ng inh pai tĕch ăn lơ bơngai. ‘Ngoăih kơ ‘nŏh inh oei tôch hưch ‘mêm khăn brông, hơbăn ao tanh đơ̆ng hơdrĕch nhôn hai, tơ̆ khăn ding dông đe tanh tôch ‘lơ̆ng, đe vai tanh tôm um rup, bơ̆n găr tôl, plui, bơ̆n tơgăk, bơ̆n sem, ƀât lăp tanh rup bơngai hai...tôch ‘lơ̆ng. Đơ̆ng noh inh đei đon tơchĕng ‘mĕh roi tơbăt ăn dôm bơngai băt truh dôm tơmam ‘lơ̆ng đơ̆ng hơdrĕch nhôn, đơ̆ng noh Công ty Leng Gung đei inh pơjing lơ̆m sơnăm 2022.

- Tĕch tơmam so đơ̆ng kră sơ̆ hăm pha ƀiơ̆ kơ dôm tơmam nai ưh, mưh tĕch athei năng kăl truh tơdrong kiơ?

-H’Juel: Tĕch mơdro dôm tơmam đơ̆ng sơ̆ kơ hơdrĕch hơdrung nhen tơdrô ge, khăn, hơbăn ao tanh, hơkăt, tơmam pơm ngôi pơm đơ̆ng kram, hre... đei lơ tơdrong pha ƀiơ̆ păng tĕch mơmat ƀiơ̆ pơting hăm tĕch tơmam nai, yoa thoi noh dôm tơmam âu chă rơih bơngai răt tôch dêh, yoa thoi noh vă đei bơngai răt nhôn jang kiơ̆ anih tĕch mơdro tơ̆ ‘ngoăih, pơm tơlĕch lơ tơmam đơ̆ng khăn che tanh nhen kơdŭng mong jên, hơdŭng hmă, tơlĕch chô̆ sŏk, chơ khŏ, dôm tơmam yoa nai vă pơm lăp hăm tơdrong ‘mĕh vă đơ̆ng bơngai răt păng hơnhăk tơdrong juăt ‘lơ̆ng đơ̆ng hơdrĕch nhôn truh hăm lơ bơngai.

-Dôm tơmam tanh sĭt, khăn, hơbăn ao tanh, hơkăt dăh mă tơdrô ge… đơ̆ng H’Juel tĕch hăm đei lơ bơngai răt ưh, hrei ‘nâu tĕch mơdro thoi yơ?

-H’Juel: Tơdrô ge kŭm nhen, hơkăt, khăn hơbăn ao tanh đơ̆ng công ty nhôn dang ei kŭm đei lơ bơngai băt truh păng răt yoa, ưh lăp tĕch ăn tơmoi lơ̆m dêh char Đak Nông đĕch mă oei tĕch ăn lơ bơngai tơ̆ plt Hồ Chí Minh, Hà Nội hai, dang ei tơdrong tĕch mơdro kŭm tôch bônh hlot.

-Gơ̆h pơma tơdrong tĕch mơdro đơ̆ng unh hnam H’Juel oei hơnhăk tơmam so truh hăm lơ bơngai tơ̆ jơ̆p tơring. Tơdrong tĕch mơdro âu ưh jor vang chă tơdrong jang, hơtŏk iŏk yoa ăn mih ma duch tơ̆ pơlei ‘năi ưh deh?

-H’Juel: Inh tôch čhôk ‘nă yoa dôm tơmam so sơ̆ đơ̆ng hơdrĕch nhôn đei lơ bơngai băt truh, păng tơgŭm ăn lơ bơngai tanh sit, pai tơdrô đei dơ̆ng kon jên vă arih xa rim năr, pơm ăn tơdrong jang so nhôn đei hơnơ̆ng lơ̆m tơdrong arih xa hrei ‘nâu vă lơ bơngai băt truh tơdrong juăt ‘lơ̆ng đơ̆ng bơngai M’nông Preh, Prâng, Nong...truh hăm lơ bơngai.

-Kơdih kâu H’Juel chă chih tơdrong kơtơ̆ng ang, pơre nơ̆r hai, kŭm hăm unh hnam vei lăng công ty hai, ih jang hloi 2 tơdrong thoi âu hăm đei pơmat tat kiơ ưh?

-H’Juel: Hăm tơdrong jang tơm ‘nŏh jĭ chă chih tơdrong kơtơ̆ng ang, pơre nơ̆r M’nông păng vei lăng công ty Leng Gung hai ‘nŏh inh ƀôh tôch hiôk ‘năi... Mưh kuay phim, inh hrŭk hơbăn ao tanh đơ̆ng Công ty Leng Gung tanh, vă roi tơbăt tơmam hai, vă chĕp vei tơdrong juăt so đơ̆ng sơ̆ kơ hơdrĕch nhôn hai. Păng đơ̆ng tơdrong jang chih tơdrong kơtơ̆ng ang, pơre nơ̆r mă inh oei jang ‘nŏh kum gơ̆h roi tơbăt tơdrô ge, đei lơ bơngai băt truh păng răt yoa. Inh ƀôh ‘nâu jĭ 1 tơdrong tôch pŭn păng tôch hiôk hian hăm inh.

-H’Juel hăm đei đon tơchĕng, trong vă jang thoi yơ ăn tơdrong jang kơdih ưh, mă loi jĭ tơdrong chĕp vei, tưk tơiung dôm tơdrong juăt ‘lơ̆ng đơ̆ng sơ̆ ‘nŏh? Ih hăm đei nơ̆r pơma kiơ hăm bôl boăl kŭm nhen mih mach nă tơ̆ pơlei pơla ưh?

-H’Juel: Inh ‘mĕh pơm pơkĕh hnam kơjung rthoi hơdrĕch M’nông nhôn vă pơm anih jang, roi tơbăt, chĕp vei dôm tơmam ‘lơ̆ng đơ̆ng sơ̆ kơ hơdrĕch nhôn. ‘Ngoăih kơ ‘noh, inh vă jang hơdoi hăm dôm công ty chă tơmang lăng tơ̆ tơring păng ‘ngoăih kơ dêh char roi tơbăt dơ̆ng dôm tơmam đơ̆ng bơngai M’nông Preh, Prâng, Nong...tơ̆ dêh char Dak Nông. Inh oei ‘mĕh jơhnơr mơ lôh bơngai M’nông adrin chĕp vei tơdrong juăt ‘lơ̆ng đơ̆ng hơdrĕch kơdih, ưh gơ̆h lê̆ sư hiơt hiong.

- Lei a, bơnê kơ ih H’Juel hơ!