Minh anih truh akŏm soi Yôk Ƀok Dơnơm Hùng Vương ah năr 10 khei 3 âm lĭch sơnăm âu noh hnam chua Tháp Kỳ Quang, tơ̆ xah Đăk Mar, apŭng Đăk Hà, dêh char Kon Tum. Kon pơlei kon kông Xơ Đăng, Bahnar lơ̆m tơring hơnơ̆ng hăt hot vang jang đơ̆ng tơdrong chă hơmet. Atŭm hăm noh chă tơgŭm Jơnŭm pơgơ̆r jang sơng tơmoi, lơ hơdruh tơdăm oei vang akŏm chă pơlong tơplŏng kơdâu juăt jue nhen drŭt ‘long, dui tơlei păng ‘nâu nai hia...

Lơ̆m năr soi yôk ƀok dơnơm, atŭm hăm soi plang dôm tơmam drăm kăp gĭt, ‘lơ̆ng nham mă kơdih po pơm tơlĕch, nhen tơyông ƀâu phu, kaphê, plei ‘long xa... ăn đe ƀok pơtao Hùng, kon pơlei pơdah chĭng chêng – hơsuang vă tơƀôh đon sô̆ păng hmach bơnê kăp gĭt hăm đe ƀok Pơtao Hùng păng yă ƀok dơnơm hlôi akŏm jơhngơ̆m pơjing păng vei lăng teh đak. ‘Nhŏng A Thiếk, pơlei Kon Klốc, xah Đăk Mar, apŭng Đăk Hà ăn tơbăt: “Rim sơnăm, hơnơ̆ng truh ah năr Soi Yôk Ƀok Dơnơm Hùng Vương, tơ̆ thôn Kon Klốc nhôn âu hơnơ̆ng akŏm đe mih pơla đe ma pơlei, đe hơdruh tơdăm akŏm tôn chĭng chêng, hơri hơsuang vă tơƀlŏk năr Soi Yôk Ƀok Dơnơm. Tơdrong pơgơ̆r âu ưh hơdrô̆ vă akŏm tơƀơ̆p băl mă kăp gĭt noh vă hơtŏk tơdrong tơguăt tơguăl lơ̆m thôn pơlei. Rim ‘măng thôn pơlei đei tơdrong et xa, dah mă ah năr lêh tih kơ teh đak ‘noh ưh đei kơƀah jơva chĭng chêng, tơdra hơsuang nơ̆r hơri. Ƀlŏk hơdơ̆r năr Soi Yôk Ƀok Dơnơm Hùng Vương, nhôn ưh hơdrô̆ pơgơ̆r lơ̆m minh pơlei mă dôm pơlei nai adoi pơgơ̆r mơ̆n, akŏm dih băl vă pơtho ăn kôn mon kon sâu băt hơdah gah tơdrong juăt jue “Nhă đak chăm kơ tu’’, vih tơƀlŏk kơ dôm ƀok pơtao Hùng hlôi akŏm jơhngơ̆m tơ-iung pơjing teh đak, gơnơm đơ̆ng noh bơ̆n pơtơm đei tơdrong hơrih phĭ tơtŏ dơnŏ ‘lơ̆ng hrei âu”.