Tơ̆ Gia Lai, tơdrong akŏm Soi Yôk Ƀok Dơnơm Hùng Vương đei pơgơ̆r akŏm tơ̆ Anih soi ƀlŏk kơ Ƀok Dơnơm Hùng Vương tơ̆ Cham pơhiơ̆ Đồng Xanh, pơlei tơm Pleiku, hơvơn lơ kon pơlei păng tơmoi truh plang hlôt nhang ƀlŏk hơdơ̆r kơ jơhngơ̆m plang đơ̆ng đe ƀok Pơtao Hùng. Lêh soh plang hlôt nhang vă ƀlŏk bơnê kơ tơdrong pôk pơ-ư păng tơƀlŏk kơ tơm a hla chă "nhă đak ƀlŏk kơ tu" đơ̆ng dôm bơngai kon tơ̆ hơgăt teh Gia Lai hăm đe Ƀok Pơtao Hùng lơ̆m năr Soi Yôk Ƀok Dơnơm grasia.

Kră pơlei Rơ Ô Phung- tơ̆ pơlei Gum Góp, xah Ea Rmok, apŭng Krông Pa ăn tơbăt ah khei  4 rim sơnăm, bơngai Jarai adoi oei pơgơ̆r soi tơbeh kơ Pơtao Apui vă apinh gơh đei tŏ ‘mi kial sơđơ̆ng ‘lơ̆ng, pơyan jang xa đei yua lơ: “Hăm kon pơlei Jrai, đơ̆ng kră sơ̆, kon pơlei adoi vei răk juăt jue kŭp yom kơ đe pơtao, lơ̆m noh đei Pơtao Unh. Kơlih âu jĭ bơngai hơnơ̆ng tơrĕk truh tơdrong hơrih kon pơlei, hơnơ̆ng ‘meh tơdrong hơrih kon pơlei roi năr roi phĭ tơtŏ dơnŏ ‘lơ̆ng, tŏ ‘mi kial sơđơ̆ng, mă hăt noh ah pơyan tŏ phang pơđang kơtang hloh lơ̆m sơnăm noh âu gô jing bơngai tang măt ăn kon pơlei iŏk pơgơ̆r soi tơbeh apinh đak ‘mi, âu adoi jing ‘măng vă kon pơlei tơƀôh tơdrong tơguăt tơgŭm dih băl, găn hloh tơnap tap. Dang ei noh jơnŭm pơgơ̆r tơring adoi tơrĕk truh tơ̆ nhôn vă hơmet pơgơ̆r dơ̆ng et soi apinh đak ‘mi, păng adoi jing ‘măng vă kon pơlei hơtaih jê̆ băt truh tơdrong et soi apinh đak ‘mi păng adoi vă pơdjoi vei răk tơƀăk mong joh ayŏ juăt jue kơ kon pơlei Jrai”.