Hăm hơnăn “Lâm Đồng - Hơnih pơkă đơ̆ng Pơkao păng joh hơri”, Giĕng lêh măih Tơmang lăng Lâm Đồng ‘măng mă 3 sơnăm 2024 tơchĕng hơdrol gô pơgơ̆r đơ̆ng ‘năr 31/5 truh ‘năr 6/6.

‘Ngoăih kơ dôm tơdrong jang tơm pơgơ̆r tơ̆ pơlei tơm Đà Lạt, nhen: lêh pơih blŭng; joh hơri hơsoang; sơng tơmoi tơmang lăng, khŭl chih kơtơ̆ng ang apŭng plĕng hơlen lăng tơmam pơvih pơvăn, tơmang lăng ‘nao; hơnih roi tơƀôh hơri hơsoang - joh ayŏ dôm hơdrĕch hơdrŭng; hơnih “Pơkao păng Tơmam ‘lơ̆ng Đà Lạt”; dôm tơdrong jang hơpăh “Năr măih”, “Jơ măih”, giĕng lêh măih Tơmang lăng Lâm Đồng ‘măng âu oei đei dơ̆ng lơ tơdrong jang joh ayŏ, tơplŏng kơdâu păng tơmang lăng jang kiơ̆ đei pơgơ̆r tơ̆ dôm apŭng, pơlei tơm lơ̆m dêh char.