Lơ sơnăm ou ki, kon pơlei thôn 6, tơring Đắk Búk So, apŭng Tuy Đức, dêh char Dak Nông tôch hưch hanh hơmanh bơnê kơ yuơ đei Hơnih soi tơbeh Hùng Vương ‘lơ̆ng liĕm, ling lang kơlŭng kơlăng ‘nhui nhang. Hơnih soi tơbeh Ƀok pơtao Hùng đei ming man đơ̆ng sơnăm 2023, hăm hơgăt teh să 250m2, kơ yuơ kon pơlei đơ̆ng pơlei pơla Phú Thọ oei tơ̆ tơring Đắk Búk So vang chă tơra teh, tơgop kon jên. Ƀok Chử Văn Chúc, Kơdră chĕp pơgơ̆r Khul Pơm lêh soi tơbeh Ƀok dơnơm Hùng Vương tơ̆ au tơbăt, dôm sơnăm blŭng pơjing, lăp đei kon pơlei lơ̆m tơring Đắk Búk So năm soi tơbeh lơ̆m rim jơ ‘năr lêh Têt, mă kăl năr Soi yôk Ƀok dơnơm. Đơ̆ng rŏng ‘noh, kon pơlei lơ tơring anai lơ̆m dêh char năm truh chă soi tơbeh.“Đĭ đăng kon pơlei minh tơring Phú Thọ mơ̆t tơ̆ au jang sa jĭ tôch hơtăih’. Sa roi hơtăih ‘noh sa roi ƀlŏk hơdơ̆r kơ ŭnh hnam pơlei pơla hloh dơ̆ng. Đơ̆ng noh bơih kon pơlei plang ăn teh, chă tơgŭm kon jên hu vă ming man hơnih soi tơbeh. Nhôn akŏm oei tơ̆ au,pơm ăn dă ƀiơ̆ ƀlok hơdơ̆r kơ pơlei pơla kơdih, vă jơhnơr đơ̆ng rŏng ou, rim kôn mon kon sau ling lang kiơ̆ yok rok jơ̆ng mĕ ƀă yă ƀok iŏk chĕp pơgơ̆r roi tơbeh au”.

Tơ̆ kông Phượng Hoàng găh hơnih tơmang pơhiơ̆ chơkơi Prenn, phương 3, pơlei tơm Đà Lạt, dêh char Lâm Đồng jei đei hơnih soi tơbeh rim Ƀok pơtao Hùng, đei ming man sơnăm 2002 kiơ̆ rup Hơnih soi tơbeh Ƀok pơtao Hùng tơ̆ kông Nghĩa Lĩnh, dêh char Phú Thọ. Tơ̆ ou jei đei hơnih soi tơbeh găh Tu soi tơbeh Lạc Long Quân hăm Âu Cơ, hơnih soi tơbeh Tŏk bŏk soi tơbeh ƀok pơtao mă tơpơ̆h păng Hơnih soi tơbeh Pơbăh soi tơbeh ƀok pơtao tuch luch kơ rim jơhnơr Ƀok pơtao Hùng. Hlôi lơ ‘măng vang năm pơm lêh Soi yôk Hùng Vương tơ̆ au, mŏ Nguyễn Thị Minh Hiếu, oei tơ̆ phương 3, pơlei tơm Đà Lạt tơbăt:“Jĭ mĭnh ‘nu kon pơlei oei tơ̆ Đà Lạt, rim sơnăm ĭnh hơnơ̆ng atŭm hăm ŭnh hnam năm tơ̆ au vang pơm lêh. Ĭnh ‘meh rim đe kon đei rơvơn băt hlôh ƀôh hơdăh găh tơdrong joăt joe kơ hơdrĕch hơdrung Việt Nam, adoi, jei jing jơ rơvơn vă kơ nhôn vang năm pơgơ̆r năm rim tơdrong oei sa joh ayŏ tơpôl vă tơgop pơm hơtŏk loi dơ̆ng tơdrong oei sa ‘lơ̆ng rŏ sơ̆ ki kơ hơdrĕch hơdrung Việt Nam".

Pơm lêh Soi yôk Ƀok dơnơm Hùng Vương jei đei pơgơ̆r tôch gĭt kăl rim sơnăm tơ̆ Hơnih gru gra gĭt kăl dăr sơnăm teh đak Hnam soi tơbeh Lạc Giao, pơlei tơm Buôn Ma Thuột, dêh char Dak Lăk hăm vang năm đơ̆ng rim kơdră chĕp pơgơ̆r dêh char, rim hơnih bơ̆ jang păng rim răih kon pơlei. Rim bơngai jei kŭp yom tơbăt jơhngơ̆m đon ƀlŏk hơdơ̆r kơ Ƀok dơnơm teh đak Hùng Vương. Sơnăm au, pơm lêh Soi yôk Ƀok dơnơm đei pơgơ̆r tôch gĭt kăl lơ̆m 2 năr (9 păng 10 khei 3 Âm lĭch) hăm rim tơdrong pơgơ̆r ‘lơ̆ng rŏ nhen ‘nŭng ƀĕng chưng, peh ƀĕng dày, Pơm lêh Tiên thường păng pơm lêh glơng gơvang pơkao, tơmam drăm ăn Ƀok dơnơm Hùng Vương. Ƀok Lại Đức Đại, Kơ iĕng Kơdră chĕp pơgơ̆r Hơnih vei lăng Joh ayŏ kơdŏ soang Đă ƀŏng lŏng tơplŏng kơdau păng Tơmang pơhiơ̆ dêh char Dak Lăk tơbăt:“Mưh năm Soi yôk Ƀok dơnơm Hùng Vương tơ̆ Hnam soi tơbeh Lạc Giao tơ̆ pơlei tơm Buôn Ma Thuột ‘noh lăp tơchĕng truh găh tơdrong vang năm Soi yôk Ƀok dơnơm đĕch ôh mă lei ‘nau jĭ hơnih tơgoăt tơdrong tơgoăt tơgoăl Yuăn-Kon kông. Rim sơnăm lơ̆m năr Soi yôk Ƀok dơnơm 10-3, kon pơlei lăng kơjăp păng năm truh vă soh hlôt nhang, hơvơ̆h hơvơi hơpơi ăn teh đak rơngei hiôk hian păng hơvơh hơvơi ăn jơhngơ̆m pran jăng grăng akau păng jei lăng truh jơhngơ̆m đon tơgoăt tơgoăl tơ̆ hnam soi tơbeh gĭt kăl ou.”

Jei kiơ̆ đơ̆ng ƀok Lại Đức Đại, Tơdrong vă jang tơ iung pơjing Hơnih soi tơbeh Ƀok pơtao Hùng kơ tơring Tây Nguyên tơ̆ dêh char Dak Lăk kơ yuơ hơnih vei lăng kon pơlei dêh char DakLăk tơlĕch ăn hlôi pơtruh ăn Hơnih tơm vei lăng Joh ayŏ kơdŏ soang Đă ƀŏng lŏng tơplŏng kơdau păng Tơmang pơhiơ̆ vă pơtruh ăn Thủ tướng Teh đak. Hơnih soi tơbeh đei ming man kiơ̆ trong tơpôl vang iung jang lơ̆m hơgăt teh să dang 20ha, đei pơjing tơ̆ groi Cư Mblim, găh lơ̆m groi teh kơ tơring Ea Kao, pơlei tơm Buôn Ma Thuột păng tơring  Ea Tiêu, apŭng Cư Kuin. Tơdrong tơmơ̆t jên jang ming man hơnih soi tơbeh Ƀok pơtao Hùng vă tơbăt jơhngơ̆m đon hôn bơnê kơtang đơ̆ng kon pơlei Tây Nguyên hăm rim đe mĕ ƀă yă ƀok hlôi kơrŭn jơhngơ̆m vang tơ iung pơjing păng vei lăng Teh đak. Adoi, tơgŭm ăn tơdrong ‘meh vă soi tơbeh đơ̆ng kơdrơ̆m kon pơlei dêh char Dak Lăk adoi nhen rim dêh char Tây Nguyên.

Tơring ayơ đei bơngai Việt hơrih sa tơ̆ noh đei hơnih soi tơbeh Hùng Vương. Dôm hơnih soi tơbeh Ƀok pơtao Hùng tơ̆ Tây Nguyên hlôi tơgŭm ăn kon pơlei tơ̆ ou hưch hanh tơbăt jơhngơ̆m đon hôn bơnê, kŭp yom kơ rim ƀok pơtao Hùng.