‘Măng pơlong đei 13 khul đơ̆ng 13 apŭng, pơlei tơm, thĭ xah lơ̆m dêh char Phú Thọ. Rim bơngai ‘nŭng, pai ƀĕng chư̆ng gô pơting dih băl lơ̆m ‘nŭng 5 kĭ phe tơyông, 1 kĭ tơ̆h hơtuh, 1 kĭ ‘nhĕm nhŭng ... pơm jing 10 tŏ ƀĕng chưng, chă ‘nŭng keh đang lơ̆m 10 pơnĭt jơ, pai ƀĕng lơ̆m 5 jơ.

Găh tơdrong pĕh ƀĕng giầy, rim bơngai pĕh kăl pai 5 kĭ phe tơyông lơ̆m 30 pơnĭt jơ,pĕh păng pơm jing 10 tŏ ƀĕng giầy lơ̆m 15 pơnĭt. Pơtôch ‘măng pơlong găh ‘nŭng, pai ƀĕng chư̆ng, khul pơlei tơm Việt Trì iŏk đei tơmam hơpăh dơ̆ng hơlau; rim khul apŭng Lâm Thao, Cẩm Khê, Thĭ xah Phú Thọ iŏk đei tơmam hơpăh dơ̆ng mă Ƀar; rim khul uơ oei dơ̆ng mă Pêng. Găh peh ƀĕng giầy, khul Yên Lập iŏk đei tơmam hơpăh dơ̆ng mă blŭng, rim khul apŭng Thanh Ba, Hạ Hoà, Tam Nông dơ̆ng mă Ƀar; rim khul uơ oei dơ̆ng mă Pêng.