Hăm hơnăn “Tơdra pơlei pơla”, pơlong sơng đei 15 anih đơ̆ng dôm dêh char Dak Lak, Dak Nông păng Lâm Đồng vang pơlong. Mĭnh anih hơri hơsoang đơ̆ng 3 truh 5 ƀai, ‘noh đei reh hơri, hơsoang păng tôn teh tơmam tôn reh kơ dôm hơdrĕch kon kông păh tu.

Vă jê̆ 70 ƀai đei hơmet ăn tôch kơ hơlen, đei tơdrong pôk pơ ư kơ Đảng chơt hơiă, Ƀok Hồ pran kơtang; tơdrong joăt joe iung jang kach mang, tơdrong ‘mêm pơlei pơla teh đak, kon bơngai; tơƀôh đon lui đơ̆ng kon pơlei lơ̆m tơdrong chĕp kơ̆l đơ̆ng Đảng, tơroi ‘lơ̆ng jơhngơ̆m đon tơgoăt tơgoăl, vang hơdai băl pơjing pơlei pơla.... Hơdai hăm dôm ƀai hlôi đei pơcheh đơ̆ng hơdrol ‘noh dôm khŭl oei tơƀôh tơdrong pơcheh lơ̆m trong tơlĕch nơ̆r ‘nao lăp păng đei tơdrong kơtơ̆ng ang dei dei.