Vang thi sơnăm ‘nâu, đei vă jê̆ 1.500 ‘nu oh hŏk tro truh đơ̆ng dôm hnam trưng tơ̆ 11 dêh char, plt đei: Plt Hồ Chí Minh, Bà Rịa-Vũng Tàu, Đồng Nai, Tây Ninh, Ninh Thuận, Bình Thuận, Bình Dương, Bình Phước, Lâm Đồng, Gia Lai, Kon Tum, Đắk Nông păng dêh char pơgơ̆r Đắk Lắk. Dôm bơngai thi vang pơjei băl tơ̆ 11 môn thi đei: đă ƀŏng lŏng, păh ƀŏng lŏng, tŭn ‘long, dui băl, aerobic, klơ̆m ƀŏng rô, teh sŏk iĕr, đă sŏk iĕr, glơi, kơdâu păng tĕh ƀŏng ƀan.

Tơdrong thi tơplŏng kơdâu kơ đe hŏk tro đei pơgơ̆r 5 sơnăm 1 vât, vă vei kơjăp păng hơtŏk tơdrong krao hơvơn “Đĭ đăng kon pơlei pơtâp pơhrăm hơkâu jăn thoi Ƀok Hô ‘mêm kơ eng”, pơlung hŏk tro phô thŏng hơnơ̆ng pơtâp pơhrăm păng pơjei băl găh dôm tơdrong tơplŏng kơdâu tơ̆ hnam trưng, hơtŏk jơhngâm pran, hơkâu jăn, tơgop ‘lơ̆ng ăn tơdrong pơtho pơhrăm ăn hŏk tro; chă ƀôh dôm bơngai pran jăng, gơ̆h hơgei găh tơplŏng kơdâu vă iŏk pơtho pơhrăm ming dơ̆ng, pơyoa ăn tơdrong tơplŏng kơdâu kơ teh đak.