Đơ̆ng rŏng 45 sơnăm pơjing păng hơtŏk tơiung, apŭng Krông Pa, dêh char Gia Lai đei lơ jơnei lơ̆m hơtŏk tơiung mŭk drăm tơpôl. Tơ̆ tơring mơmat tat kơ dêh char Gia Lai mă lei sơnăm 2023, Krông Pa hlôi iŏk đei iŏk yua jô̆ păh lăp kơ̆l bơngai 44 triệu hlak jên, tơdrong arih sa kon pơlei roi ‘năr roi hơtŏk tơiung, tơdrong sơđơ̆ng đei vei kơjăp.

‘Măng âu, iŏk pơjao jang đơ̆ng Anih tơm vei lăng Joh ayŏ - Tơplŏng kơdâu păng Tơmang lăng, Kơdră Anih vei lăng kon pơlei dêh char Gia Lai, hlôi pơjao ƀăng chih pơrĕng anih gru groa jơhnơr arih teh đak hăm Anih gru groa jơhnơr arih Hơnih kăn kư̆ tơblăh Cư Jũ-Dliê Ya ăn kơ apŭng Krông Pa. Đei băt, lơ̆m 2 ‘măng tơblăh hŭt ayăt Phalăng păng Mi, Cư Jŭ - Dliê Ya jĭ hơnih kăn kư̆ kach mang kơ 2 dêh char Gia Lai păng Dak Lak, chih tơƀôh kơ jơnei ang hơdăh đơ̆ng Đảng bộ păng kon pơlei.