‘Nau jĭ lơ̆m dôm tơdrong pơgơ̆r joh ayŏ kơdŏ soang đei pơgơ̆r đơ̆ng năr 9 truh năr 18/4 (Jĭ năr 1 truh năr 10 khei 3 Âm lĭch) hăm lơ tơdrong pơgơ̆r ‘lơ̆ng hơ iă. Lơ̆m au, găh pơgơ̆r pơm lêh: Pơm lêh soi yôk Đức Quốc tổ Lạc Long Quân păng Soh hlôt nhang ƀlŏk hơdơ̆r kơ Tổ Mẫu Âu Cơ, Pơm lêh soh hlôt nhang Soi yôk Ƀok dơnơm Hùng Vương; Pơm lêh soh hlôt nhang ƀlŏk hơdơ̆r rim ƀok pơtao Hùng kơ rim tơring lơ̆m dêh char.

‘Ngoăih kơ ‘noh, Giĕng Jŏh ayŏ kơdŏ soang-Tơmang pơhiơ̆ Groi teh Tơm dơnơm oei đei lơ tơdrong pơgơ̆r anai nhen: Pơdă mŭk drăm, hla bơar sơ̆ ki, hla bơar ƀăo, rup sơ̆ ki tơ̆ Hơnih mong răk kơ dêh char Phú Thọ, Hơnih mong răk mŭk drăm Hùng Vương; Pơgơ̆r Joh hơri trong kơphô̆ "Việt Trì Livemusic", Jơnŭm kơ trăi joh ayŏ păng tơƀôh pơdă tơmam drăm kăl.

– Dôm tơdrong pơm jang lơ̆m Lêh akŏm Đền Hùng păng Giĕng Joh ayŏ - Tơmang pơhiơ̆ Tơring Teh yă ƀok Dơnơm sơnăm Giáp Thìn 2024 vă pôk pơ-ư tơdrong băt ‘mêm kơ teh đak, tơ-iung đon băt "Nhă đak chăm kơ tu" păng jơhngơ̆m pran tơguăt tơguăl kon pơlei atŭm veh lăng kơ tơm a hla chă, pôk bơnê kơ jơhngơ̆m plang hăm yă ƀok dơnơm; atŭm hăm noh vei răk tơƀăk mong kơjă joh ayŏ tơguăt hăm hơtŏk tơmang pơhiơ̆ tơ̆ pơlei pơla Tơring Teh Yă Ƀok Dơnơm. Yôk Ƀok Dơnơm Hùng Vương – Lêh akŏm Đền Hùng sơnăm 2024 gô đei lơ Khul Kơdră kơpal kơ Đảng, Teh đak, tơmoi đơ̆ng jơ̆p tơring, kon pơlei jơ̆p teh đak vih akŏm tơ̆ Đền Hùng. Lơ̆m dôm năr âu ki, dêh char Phú Thọ hlôi sơng kơ rơbăn tơmoi đơ̆ng jơ̆p tơring truh tơmang tơ̆ Đền Hùng. Kiơ̆ jơnŭm vei lăng Anih Gru grua Đền Hùng kơsô̆ tơmoi tơ̆ jơ̆p tơring kơ teh đak bơ̆n păng kon pơlei bơ̆n tơ̆ teh đak đe hlôi truh tơmang Đền Hùng ƀôh tŏk lơ hloh.