Pơbŭng hnam ƀok Nguyễn Đình Phong tơjê̆ thoong đak kroong Gianh. Tăl 1 kơ pơbŭng hnam ou ‘noh ‘măn ăn ŭnh hnam oei sa. Tŏk klĕch kung năm tơ̆ tăl 2, tơ̆ hơnăp muh măt ‘noh mĭnh “Hơnih mong răk muk drăm iĕ”. Hơnih ou, ŭnh hnam pơ-‘nhŏ ăn kơ ƀok Phong chă pơdă, mong răk rim hla bơar, rup găh Ƀok Hô, Đại tướng Võ Nguyên Giáp, rim đe yŏng, ƀô̆ đô̆i nuih mơng lôch dŏng teh đak, Yă Mĕ Việt Nam nuih mơng kơ hơdrech hơdrung Việt Nam.

Hlôi hloh pơđăm jĭt sơnăm, tơmam pơsư̆ kơ ƀok Phong hlôi đei hloh 3.000 hlak rup, hla bơar chih tơbăt găh Ƀok Hô kiơ̆ rim jăl sơnăm, tih vơ̆ djơ̆ ‘lơ̆ng păng iung yak tơchă trong dŏng teh đak, tơdrong jang kĕch mang kơ Ƀok Hô. Ƀok Nguyễn Đình Phong tơroi, lơ ƀai chih, hla bơar kăl găh chăl sơnăm kơ pơlei pơla păng hơdrĕch hơdrung jei đei ƀok tơchă akŏm pơsư̆ ăn kơ dih ‘lơ̆ng hơ iă. “Sơnăm 1969, teh đak oei tơblăh vang, lơ̆m mă noh Ƀok Hô hiong bơih. Truh sơnăm 1975 teh đak rơngei keh kong ‘noh Ƀok Hô pă đei bơih, Ƀok ling lang bơ̆ jang kơ yuơ kơ teh đak, kơ yuơ kơ kon pơlei. Ba hlôi mong răk dôm rup ou vă rim bơngai băt truh, kăl đei jơhngơ̆m đon ‘mêm kơ eng kơ Ƀok Hô kơna ba mă tơchă mong răk, pơjing đei tơdrong ‘nou păng tơdrong ‘nou ưh kơ ƀônh ƀŏ ôh. Mưh tơchă răk đei lơ ‘noh ba tơchĕng truh mong răk pơsư̆ ăn kơdih dôm rup ou, đơ̆ng noh chă pơdă vă rim bơngai chă lăng păng mă kăl hơnhăk chă pơdă ăn đe chă lăng tơ̆ rim hnam trương vă kôn kon kon sou hŏk tro chă lăng”.

Tơdrong jang tơchă mong răk dôm rup, hla bơar găh Ƀok Hô đơ̆ng ƀok Phong jei tơƀơ̆p tôch kơ lơ tơdrong tơnap tap. Ƀok pơdơ̆h bơ̆ jang kơ yuơ jĭ jăn, mưh ‘lŏ kră jei ưh kơ đei sa jên khei, tơdrong hơnih sa kơ ŭnh hnam kơƀăh kơƀôch pơm ăn kơ ƀok tơƀơ̆p tôch mơmat tat lơ̆m tơdrong chă răt kơsơ̆p hla bơar, rup, ep plastic vă mong răk. Đei ‘măng ƀok ƀôh kơsơ̆p hla bơar hơ iă, đei dôm rup gĭt kăl kơ Ƀok Hô mă ƀok tôch kơ ‘meh đei mă lei tơngla kơsơ̆p hla bơar ‘noh mưh apĭnh ưh kơ ăn, apĭnh răt jei ưh kơ tĕch. Lơ̆m mă noh ƀok hơlŏk chă apĭnh hơsong phĭn iŏk rup gĭt kăl ‘noh, hăm lơ trong ƀok hơdrin tơchă mong dĭng mă đei. Đei ‘măng, kơ yuơ ƀok ‘meh đei rup ‘lơ̆ng, rup hui kơ đei găh Ƀok Hô kơna ƀok măh răt hloi kơsơ̆p hla bơar lăp vă iŏk đei 1 hlak rum ou. Tơdrong tơchă mong răk hlôi mơmat, tơdrong vei lăng năng tông dôm rup, hla bơar jei sa roi mơmat tat hloh dơ̆ng, mưh pơbŭng hnam ƀok Phong tơjê̆ đak kroong Gianh, sơnăm ayơ đak jei lip mơ̆t lơ̆m hnam. Mưh truh pơyan ‘mi kial hơbŭt hơbông, ƀok Phong, iŏk pơ đĭ mŭk drăm gĭt kăl hloh hăm ƀok ‘noh dôm rup, hla bơar gĭt kăl găh Ƀok Hô năm ming tơ̆ hơnih sơđơ̆ng, hrĕng.

Ƀok Nguyễn Hồng Sâm, 90 sơnăm, oei lơ̆m thôn Tân An, tơring Quảng Thanh, apŭng Quảng Trạch ‘noh bơngai boăl koeng ƀôt hơnơ̆ng tơgŭm djru ƀok Phong lơ̆m tơdrong tơchă mong răk rup, hla bơar găh Ƀok Hô. Ƀok Sâm băt ƀok Phong hưch hanh hăm tơdrong tơchă akŏm kơna rim ‘măng ƀôh rup, hla bơar kăl găh Ƀok Hô, ƀok Sâm jei tơroi ăn kơ ƀok Phong hloi vă tơchă trong iŏk mă đei rup, hla bơar kăl ou chă mong răk. Kiơ̆ đơ̆ng ƀok Nguyễn Hồng Sâm, rup rup, hla bơar mong răk găh Ƀok Hô hlôi tơgop tơgŭm ăn bơngai chă lăng băt hlôh ƀôh hơdăh hloh dơ̆ng jơhngơ̆m đon ‘lơ̆ng, trong bơ̆ jang gơ̆h hơgei kơ Ƀok Hô.“Tơdăh pơma truh tơdrong akŏm răk păng chă pơdă ‘noh hui bơngai jang gơh, păng lăp đei ƀok Phong hlôi jang gơh tơdrong ou tôch hơlen. Mă đơ̆ng ƀok Phŏng ưh kơ đei jên khei dăh kon jên tơgŭm djru kơ yuơ ưh kơ kĕ jang sa mă lei ƀok tôch hưch hanh, rim khei đei ‘măng mưh ba iŏk kon jên khei ‘noh chă tơgŭm ăn ƀok Phong tŏ sĕt vă tơgŭm ăn sư răt dôm hla bơar, rup vă mong răk. Ƀok Phong hlôi chĕp ba dôm hla bơar, rup mă sư tơchă akŏm năm pơdă tơ̆ hnam trương vă tơgŭm ăn rim bơngai băt hlôh ƀôh hơdăh hloh dơ̆ng găh jơhnơr hơrih păng tơdrong bơ̆ jang kơ Ƀok Hô, pơtho pơhrăm ăn jơhnơr mơlôh kiơ̆ yok rok jơ̆ng păng hlôh vao hloh dơ̆ng”.

Khei 5 ou jĭ jơ ‘năr tơbăt 135 sơnăm năr rơneh Ƀok Hô. Pơbŭng hnam iĕ ƀơ̆t jih đak kroong Gianh kơ ƀok Phong iơ iơ̆r iơ iăr hloh dơ̆ng đơ̆ng dôm bơngai năm tơmang lăng dôm rup ‘lơ̆ng liĕm găh Ƀok Hô păng dôm hla bơar gĭt kăl chăl sơnăm mă ƀok hlôi tơchă akŏm mong răk.

Mŏ Trần Thị Vân, đoàn viên hơnih Đoàn tơring Quảng Thanh, apŭng Quảng Trạch pơma akhan, ưh kơ kăl yak tơ̆ hơtăih ôh, rim đe boăl mơlôh tơdăh ‘meh vă băt hơdăh chăl sơnăm gĭt kăl, dôm kơdră gơ̆h hơgei rim chăl jang păng dôm hla bơar chih tơbăt kơ Ƀok Hô lei lăp kăl năm tơlang lăng “hơnih mong răk” iĕ kơ ƀok Nguyễn Đình Phong:“Mưh ƀôh hơnih mong răk kơ ƀok Phong ou, ba ƀôh hơdăh jơhngơ̆m đon lui yom kơtang hăm kơdră chĕp pơgơ̆r teh đak gơh hơgei kơ hơdrĕch hơdrung, tơgop vei răk tơ ƀăk mong păng lang să dôm hla bơar gĭt kăl chih tơbăt găh Ƀok Hô. Hơnih mong răk ou jei tơgŭm ăn khul mơlôh băt hlôh ƀôh hơdăh hloh dơ̆ng găh tơdrong hơrih sa, tơdrong bơ̆ jang kơ Ƀok Hô. Rơbou hlak rup kơ Ƀok Hô đei ƀok Phong chă ming hơmet tôch kơ trŏ lăp, pơjing đei jing tơdrong tơroi păng tơbăt ăn rim bơngai chă lăng lơ̆m dôm năr lêh, vă jơhnơr mơlôh băt hlôh, hŏk pơhrăm, kiơ̆ yok rok jơ̆ng jơhngơ̆m đon ‘lơ̆ng kơ Ƀok Hô”.