Kiơ̆ kơ ‘nŏh 6 ‘nu bơngai thi đei điêm lơ hlŏh đei pôk pơ ư. Bơngai thi Tạ Tuấn Anh truh đơ̆ng plt Hồ Chí Minh iŏk đei yaih như̆k, yaih 2 jei kơ bơngai thi Nguyễn Hương truh đơ̆ng Đắk Nông, yaih 3 jei kơ Lê Đức Mạnh, tơ̆ dêh char Đắk Lắk păng 3 yaih pơ čhơp jơhngâm jei kơ dôm bơngai thi đei: Phan Hồng Phong (dêh char Quảng Trị), Hồ Hoàng Minh Thắng (dêh char Kon Tum) păng Mai Hoàng Phát (Plt Hồ Chí Minh).

Kiơ̆ khul châm hơlen, tơdrong châm hơlen chĕh phe ‘lơ̆ng lơ̆m tơdrong thi ‘moi kiơ̆ dôm tơdrong hơgăt ‘nao đơ̆ng Khul jang chĕh phe ‘lơ̆ng - SCA tơlĕch, hlôi pơm tơlĕch lơ tơdrong nol, pơmat tat hăm dôm bơngai vang thi sơnăm ‘nâu. Mă lei, dôm bơngai thi hlôi yak hlŏh rim tơdrong păng iŏk đei điêm tôch lơ lơ̆m kơsô̆ điêm đơ̆ng apŭng plenh teh hơgăt. Tơdrong ‘nâu hơnơ̆ng tơƀôh hơdăh khul hơdrĕng chĕh phe Việt Nam roi đunh bơ̆ jang roi rơgei.