Khei năr ou ki, hơnih vei lăng hnam trương pơtho pơhrăm dêh char Dak Lăk hlôi iung jang kơtang tơlĕch pơtho pơhrăm tơroi ‘moi kiơ̆ mŭk drăm joh ayŏ, tơklep hăm tơdrong pơjing oei sa ‘lơ̆ng tơdrong joăt hnam trương. Lơ hnam trương hlôi tơlĕch pơtho hloi găh dôm tơdrong oei sa joh ayŏ gĭt kăl dăr sơnăm, hơbĕn ao, tơdrong hơ-‘mon, tơdrong tơroi kră sơ̆ lơ̆m pơgơ̆r hŏk pơhrăm găh ‘ngoăih. Tơ̆ hop akŏm, lơ bơngai tang măt hlôi tơbăt ăn lơ trong jang hơ iă vă pơtho tơbăt tơdrong oei sa ‘lơ̆ng ăn hŏk tro đơ̆ng jăl kơđeh truh jăl pêng. Rim nơ̆r tơgop jei drơ̆ng mĭnh nơ̆r akhan, tơdrong pơtho tơbăt tơdrong kăp gĭt oei sa joh ayŏ đơ̆ng hrôih gô tơgŭm ăn jơhnơr mơlôh băt hlôh ƀôh hơdăh tơm a la chă tơdrong oei sa joh ayŏ sơ̆ ki, tơgop pơm hơtŏk hlôh vao lơ̆m kon pơlei pơla păng atŏk kơtang tơgoăt kơjăp tơpôl, mă kăl ‘noh tơring đei lơ hơdrĕch hơdrung vang hơrih sa nhen Tây Nguyên.