Tơdrong pơgơ̆r ou đei pơgơ̆r lơ̆m gơmăng năr 14/5 tơ̆ Hnam joh hơri tih Hà Nội, tơbăt hơdăh jơhngơ̆m đon hôn bơnê kơtang păng jơhngơ̆m đon ‘mêm kơ eng tôch bach hmach tôch dêh đơ̆ng kon pơlei lơ̆m teh đak hăm Ƀok Hô-Kơdră chĕp pơgơ̆r nuih mơng gơh hơgei, Bơngai nuih mơng kơ hơdrĕch hơdrung, Bơngai gơh hơgei hloh. ‘Moi kiơ̆ dôm tơdrong pơgơ̆r ‘lơ̆ng hơ iă, tơdrong pơgơ̆r ou tơƀôh hơdăh tơdrong gĭt kăl kơ jơhngơ̆m đon ‘lơ̆ng păng mŭk drăm pơsư̆ gĭt kăl hloh mă Ƀok Hô pơsư̆ ăn kĕch mang Việt Nam păng ăn tơdrong atŏk tơ iung kơ hơdrĕch hơdrung. Tơdrong pơgơ̆r joh ayŏ kơdŏ soang đei pơjing 3 hơyuh đơ̆ng um rup mĭnh ‘nu bơngai hơ ioh Nguyễn Sinh Cung ƀĕnh ƀang jơhngơ̆m đon hơpơi ‘meh; Dôm trong mă Ƀok hlôi yak truh băt dôm yơ teh đak vă tơchă trong dŏng teh đak; Um rup Ƀok Hô oei sa ‘lơ̆ng rŏ hơbŏ nhen yan ou, muh măt ‘lơ̆ng rŏ hơbŏ nhen, phăl hơlăng hăm kon pơlei pơla, ƀô̆ đô̆i …, đĭ đăng đei pơgơ̆r kiơ̆ dơ̆ng lơ̆m ‘măng pơgơ̆r joh ayŏ kơdŏ soang păng tơƀôh tơbăt dôm rup phim pơdăh pơm ăn rim răih bơngai chă lăng ƀrơ̆k jơhngơ̆m.