Hăt hot hăm tơdra đing buôt brông brŏng, Y Puen Niê tơpă nhen minh bơngai hơgei gah tơdra hơri kră sơ̆ đơ̆ng rŏng kơ sơnong jang kan ƀô̆ jang tơ̆ Rađiô rapor xah Čư̆ Pui, apŭng Krông Bông, dêh char Đăk Lăk. Đơ̆ng rŏng kơ um ai ƀônh ƀŏ noh akŏm ƀenh jơhngơ̆m hăm tơdra chĭng chêng păng dôm kơluăi brŏ kră sơ̆ kơ bơngai Êđê.

Hŏk đang hnam trưng Trung kâ̆p Đam San, Y Puen Niê hlôi băt vao păng tơgĭt kơ dôm kơjă joh ayŏ mă yă ƀok pơsư̆ ăn. Y Puen Niê ăn tơbăt, tơklep hăm joh ayŏ kon kông, tŏk 15 sơnăm, sư hlôi chă pơm đei đing hlôm đing buôt mă blŭng kơ po: “Tơroi gah joh ayŏ kơ bơngai Êđê, nhen tôn chĭng chêng, hlôm đing năm, đing buôt, hơri  Eirei jơh hram lơ̆m klak klơm inh đơ̆ng oei 'lơ̆p. Inh hŏk tôm tơdrong ou đơ̆ng yă ƀok, đe mih ma duch nă yă yăng... Truh ah tih vơ̆, tơdrong lăp chă pơhrăm hlôm, reh dôm brŏ kon kông roi kơ dêh hloh. Inh hơdrin vă chă pơm đei brŏ kon kông păng gơh reh tơdra. Brŏ mă blŭng inh pơm đei noh đing buôt, đơ̆ng rŏng kơ noh gông, brô̆, đing tŭt… Tơdrong kăp gĭt hloh noh tơdrong lăp đơ̆ng kơdih po”

Y Puen Niê hlôi 'măn lơ jơ năr hăt hot chă hơlen băt tơm a la chă, tơdrong kăp gĭt kơ rim kơluăi brŏ, đơ̆ng nơ̆r chĭng chêng truh tơ̆ nơ̆r t’rưng (chĭng klơk) hiôk 'lơ̆ng, nơ̆r đing hlôm Êđê hăm tơdra hơri kưt vang vơch dah mă nơ̆r tơgiĕp đing năm hăm tơdra eirei sô̆ ang. Păng sư pơtoi pơdjoi dôm tơdrong lăp ou ăn đe sơnăm mơlôh: “Ah inh hlôi gơh pơm, inh pơtho ăn kôn mon kon sou lơ̆m pơlei, lơ̆m xah lơ̆m apŭng. Inh đei đe hơvơn năm pơtho ăn đe buăl mơlôh tơ̆ lơ tơring phara băl. Lơ̆m khei 4 ou ki, inh pŭn ai đei năm pơtho gah brŏ juăt jue nhen chêng kong, chêng kram, tơgiĕp, rơwŏng, đing brô̆, gông păng dôm kơluăi brŏ nai tơ̆ Hà Nội. Đe hơ-ioh vao tenh mă lei hăm tơpôl hrei ou đe mon akŏm lơ tơdrong joh ayŏ lơ̆m mạng tơpôl nhen facebook, tiktok adoi tơrĕk truh tơdrong hŏk hơlen gah joh ayŏ kon kông po”

Dôm lăm pơhrăm tôn chĭng chêng, t’rưng.. kơyuơ Y Puen Niê pơtho hlôi jing cham pơhiơ̆ 'lơ̆ng hăm đe hơ-ioh tơ̆ lơ pơlei pơla. Oh H’Tra Ƀuôn Yă (10 sơnăm), 'nao đei iŏk tơmam hơpah lơ̆m 'măng pơlong hơri tơdra kră sơ̆ kơ apŭng Krông Bông tơroi: “Nhôn lăp hơri tơdra hơri hơsuang kră sơ̆ đơ̆ng đunh bơih. Truh ah tơƀơ̆p đei met Y-Puen Niê nhôn đei pơhrăm gah tôn chĭng chêng, tôn chêng kram, hơri eirei, hlôm đing tŭt... Inh păng đe buăl pơtơm băl năm pơhrăm. Nhôn đei akŏm dôm tơdrong pơlong păng nhôn sô̆ lăp tơpă”

Y Puen Niê hlôi jing minh bơngai tơnăp lơ̆m khul tôn chĭng chêng, brŏ kơ xah Cư Pui, tơgop pơlan să joh ayŏ kon kông Êđê truh lơ tơring teh nai. Y Phinh Ƀuôn Yă, pơtho tơ̆ hnam trưng jăl kơđeh Dang Kang 1, xah Dang Kang, apŭng Krông Bông tơroi: “Tơmơ̆ng đơ̆ng hơtaih nhen lĕ nơ̆r sem asi sơng tŏ 'lơ̆ng, tơmơ̆ng tơjê̆ nhen lĕ tơdra chĭng chêng pơyan tŏ 'mi. Inh lăp tơmơ̆ng 'nhŏng Y Puen Niê reh brŏ, hiôk tơpă lah. Dôm brŏ mă sư pơm đei tơtă đơ̆ng kram, pơle pơ-o phat, 'lơ̆ng hăm cham char, tơguăt hăm kon pơlei đơ̆ng iĕ khĕ 'lŏ kră. Hơpơi 'meh 'nhŏng Y Puen Niê ling lang grăng pran vă pơlan să tơdrong 'lơ̆ng tơdra juăt jue kon kông po kơdih”

Hăm tơdrong rơgei păng đon lăp, Y Puen Niê hlôi đei iŏk lơ jơnei lơ̆m tơdrong pơlong reh brŏ tơ̆ apŭng, dêh char. Hơdah nhen Mê đai Mah ah 'măng pơlong joh ayŏ kon kông tơ̆ dêh char păng iŏk hơpah B gah pơlong joh ayŏ khul linh dêh char Đăk Lăk. Lơ̆m Năr akŏm joh ayŏ kon pơlei kon kông dêh char Đăk Lăk sơnăm 2023, khul chêng kram kơyuơ sư chĕp kơ̆l hlôi đei iŏk hơpah B hăm tơdrong tôn chêng kram păng hơsuang hơvơn et tơdrô sô̆ choh jang đei yua.

Tơdrong tơroi kơ Y Puen Niê, minh bơngai lăp kơ joh ayŏ juăt jue kră sơ̆ jĭ minh tơdrong pơdah ăn tơdrong hơrih kăp gĭt kơ joh ayŏ Tây Nguyên. Lơ̆m khei năr tơdrong hơrih kiơ̆ trong 'nao hrei ou, adoi oei đei dôm bơngai sơnăm mơlôh 'lăn thĕng vei răk tơƀăk mong păng pơlan să dôm kơjă kăp gĭt joh ayŏ. Ngê̆ nhơ̆n mơlôh Y Puen Niê tơpă jing um ai ang hơdah, tơdrong pơ-ư pơ-ang kơ kon pơlei Êđê tơ̆ Đăk Lăk.