Ŭnh hnam  ƀok Hà Văn Tân, tơ̆ thôn 11, xăh Ya Tờ Mốt jĭ 1 lơ̆m dôm ŭnh hnam kon pơlei pơm tơlĕch jơnei hơdrĕch ƀa Briêt iŏk đei pơkăp ƀa rơgoh hơlen hloh kơ ƀa hmă, phŏng, pơgang hơdrông athei hăm mơ̆r ngăl. Tơplih dơ̆ng jơhngơ̆m pran ‘lơ̆ng yua ưh kơ tơjê̆ hăm dôm pơgang hoă chơ̆t. Jên jang blŭng tơjur truh 40%, mă lei tĕch sơđơ̆ng păng kơjă tĕch măk hloh 1,5 ‘măng pơting hăm kơjă ƀa hmă:

"Kiơ̆ đơ̆ng trong jang hơdai hăm hơp tak xăh tơjur dơnuh hin Ea Súp pơm tơdrong hiôk ăn ŭnh hnam nhôn jang ƀa Briêt rơgoh, mă mônh ‘noh jĭ vei lăng cham char, mă 2 vei lăng jơhngơ̆m pran păng mă 3 dơ̆ng hơnhăk ăn mŭk drăm ăn ŭnh hnam, Truh dang ei, nhôn hlôi jang đơ̆ng iĕ truh tih. Truh âu kơnh nhôn krao hơvơn dôm ŭnh hnam vă jang lơ hloh dơ̆ng.”

Briêt jĭ kơloăi phe ƀa ‘lơ̆ng kơ Tây Nguyên, oei đei krao ‘noh phe tơh Briêt. Kơloăi phe âu, đei kơchơ̆t bek ‘lơ̆ng lơ, đei lơ sắt, prai, vitamin păng dôm kơchơ̆t tơjră oxy hóa kơna roi ‘năr roi đei bơngai răt yua ‘meh vă. Ƀok Nguyễn Việt Đức, Kơdră vei lăng Hơp tak xăh Tơjur dơnuh hin Ea Súp, apŭng Ea Súp, dêh char Đắk Lắk tơbăt: ‘Moi kiơ̆ đơ̆ng lơ tơdrong hơdrol, Hơp tak xăh hơnơ̆ng jang hơdai hăm kon pơlei, rơih iŏk tơring lăp rei pơtăm hơdrĕch ƀa Briêt. Lơ̆m noh, đei đak, teh, hơyuh rơgoh ‘noh kăl hloh. Sơnăm sơ̆, Hơp tak xăh hlôi bơ̆jang jơnei tơdrong jang pơtơm tơlĕch jang ƀa Briêt kiơ̆ trong rơgoh ‘lơ̆ng JAS (Nhật Bản) să 3 hek tar păng tơmam phe Briêt đei asong hla ar pơkăp OCOP 3 hơnglŏng kơ dêh char.

Kiơ̆ kơ ƀok Nguyễn Việt Đức, Kơdră vei lăng Hơp tak xăh Tơjur dơnuh hin Ea Súp, tơ̆ hơnăp kơnh, Hơp tak xăh gô hơnơ̆ng jang hơdai hăm kon pơlei hơtŏk hơgăt teh pơtăm ƀa rơgoh, ƀrư̆ ƀrư̆ tơplih đon tơchĕng, trong jang đơ̆ng kon pơlei, tơgop hơtŏk ‘lơ̆ng păng kơjă kăp gĭt ƀa, phe tơring.

“Mă mônh ‘noh jĭ nhôn akŏm lơ̆m dôm tơmam hlôi iŏk đei hla ar pơkăp rơgoh hlôi đei hơnăn ‘lơ̆ng. Mă 2, nhôn pơih să dơ̆ng teh kiơ̆ pơkăp ‘lơ̆ng Global GAP vă pơih să hơgăt teh vă lơ kon pơlei jang ƀa đei sa yua hloh.”

Kiơ̆ kơ ƀok Nguyễn Bá Bân, Kơdră Anih vei lăng găh choh jang sa apŭng Ea Súp, mă đơ̆ng hơgăt teh tam mă lơ ră mă lei tơmam phe Briêt đei pơjao hla ar pơkăp rơgoh ‘noh jĭ tơƀôh hơdăh ăn tơdrong tơplih lơ̆m đon tơchĕng jang sa đơ̆ng kon pơlei tơring sơlam Ea Súp, pơma ưh hăm hoă chơ̆t, pơm tơlĕch tơmam rơgoh. Hơdai hăm ăn ƀôh, tơdrong tơplih hơmet ming choh jang sa kiơ̆ trong rơgoh đơ̆ng dêh char Đắk Lắk tŏk bŏk jĭ trong năm ƀlep, hơnhăk ăn kơjă mŭk drăm lơ tơgop pơm tơplih tơdrong arih sa kơ kon pơlei tơring sơlam:

“Tơdrong hơp tak xăh Tơjur dơnuh hin Ea Súp đei asong hla ar pơkăp pơm tơlĕch rơgoh, ‘noh jĭ hơyak pơih blŭng đơ̆ng lăng truh pơm tơlĕch rơgoh. Tơ̆ hơnăp kơnh, gô đei lơ khŭl jang, rim bơngai tơgŭm dôm hơp tak xăh, anih mơdro sa iŏk đei hla ar pơkăp rơgoh roi ‘năr roi lơ hloh hơnhăk ăn đei hla ar pơkăp đơ̆ng tơmam drăm”.