Ưh pă kăl krao điên thoăi ăn rim bơngai, dăh mă năm truh tơ̆ hnam đảng viên vă roi tơbăt năr hôp chi bộ kŭm nhen dôm tơdrong jang kăl kơ tơlĕch jang, dang ei, lăp hăm grŭp Zalo, ƀok Lò Văn Oai, bí thư chi bộ pơm hloi bơngai pơgơ̆r pơlei plei Mạt, xăh Mường Lèo, apŭng Sốp Cộp, Sơn La đĭ gơh akŏm đảng viên ƀônh ƀŏ.

Tam mă đei pơtho pơhrăm găh kơmăy kơmŏk kơtơ̆ng ang, mă lei nhôn kŭm hơdrin răt 1 pôm kơmăy tĭnh, 1 pôm kơmăy in vă hŏk pơhrăm răh. Chi bộ nhôn hlôi pơjing păng akŏm đei 31 ‘nu bơngai lơ̆m grŭp Zalo, ưh kơ jô̆ đảng viên kră gô roi tơbăt kiơ̆ trong pha. Đei grŭp zalo kơ chi bộ dang ei, roi tơbăt năr hôp ăn kơ đảng viên păng mĭnh ƀar tơdrong jang nai kŭm hiôk ƀônh hloh.

Tơdrong hŏk hôp đơ̆ng Chi bộ plei Mạt kŭm roi ‘năr roi tơplih iŏk đơ̆ng bơngai chĕp kơ̆l kơdră đảng băt đei kơmăy kơmŏk. Dôm tơdrong tơm chĕp kơ̆l, pơgơ̆r lơ̆m pơjing tơring tơrang ‘nao, tơplih ‘long pơtăm, kon tơrong hơdrol sơ̆ tơhlăk găh trong jang, ‘noh dang ei đei hlôh vao, ki thuơ̆t đơ̆ng Internet.

Plei Mạt xăh Mường Lèo hơdrol sơ̆ tôch kơ mơmat tat, dang ei kon pơlei băt iŏk yua khoa hŏk ki thuơ̆t lơ̆m choh pơtăm, jang hloh 50 hek tar ƀa, 25 hek tar hơƀo, 25 hek tar ‘long sa plei; vei rong vă jê̆ 4.000 tơ̆ kon tơrong; pơjing đei 2 Hơp tak xăh choh jang sa... kơ sô̆ ŭnh hnam dơnuh hin, vă jê̆ dơnuh hin kơ pơlei gơnang đơ̆ng ‘noh jur lơ, truh dang ei lăp oei pă 6%. Mŏ Lường Thu Hương, đảng viên chi bộ plei Mạt tơroi:

Ĭnh hlôi iŏk yua khoa hŏk ki thuơ̆t, hŏk pơhrăm dơ̆ng lơ̆m mạng trong vei rong kơpô, choh pơtăm vă iŏk yua lơ. Jĭ đảng viên ĭnh kŭm hơtŏk hơnăp jang, tơroi tơbăt ăn kon pơlei trong vei rong kon tơrong đei yua lơ.

Dôm tơdrong tơroi hơiă, trong jang đei yua vă hơtŏk tơiung mŭk drăm tơpôl, pơjing tơring tơrang ‘nao đơ̆ng lơ tơring, lơ hơdrĕch hơdrŭng.... đei bí thư chi bộ, tơpôl kơdră đảng kŭm hăm dôm đảng viên kơ pơlei hơdrin vang tơroi lơ̆m trang kơdih, dôm khŭl, grŭp. Ƀok Giàng A Dệnh, Bí thư chi bộ pơm hloi bơngai pơgơ̆r plei Sam Quảng pơma:

Lăng lơ̆m mạng tơpôl kŭm đei lơ ƀai chih hơiă găh đảng viên pơm jŭk yŭk trong hơlâu, bơngai ‘lơ̆ng tơdrong ‘lơ̆ng, ĭnh tơroi truh đảng viên lơ̆m chi bộ. Lơ̆m tivi păng dôm tơdrong kơtơ̆ng ang tơpôl ‘noh kŭm hlôi hŏk pơhrăm, iŏk yua khoa hŏk tơmơ̆t lơ̆m jang sa; kơdră chi bộ kŭm hlôi tơchĕng hơlen, hŏk pơhrăm vă tơmơ̆t lơ̆m tơlĕch ăn kon pơlei.

Ƀok Phan Thanh Lăng jĭ kang ƀô̆ apŭng, đei ăn năm jang pơm Bí thư đảng tơ̆ xăh sơlam mơmat tat hloh Mường Lèo, apŭng Sốp Cộp, Sơn La tơbăt: Anih jang Đảng xăh hlôi krao hơvơn dôm chị ƀộ răt kơmăy tĭnh, pơyua ăn tơdrong jang atŭm. Truh dang ei, 10/17 chi bộ tơ̆ xăh hlôi đei kơmăy tĭnh; đe bí thư chi bộ adoi kơchăng chă hơlen lăng, hŏk pơhrăm vă iŏk yua kơmăy kơmŏk kơtơ̆ng ang lơ̆m pơgơ̆r vei lăng. Hơdai hăm ‘noh, Anih jang Đảng xăh kŭm vei kơjăp truh đĭ đăng kang ƀô̆, bơngai jang teh đak đảng viên hơtŏk dôm tơdrong ‘lơ̆ng đơ̆ng kơmăy kơmŏk.

Ĭnh hlôi athei kang ƀô̆, bơngai jang teh đak roi tơbăt tôm dôm tài khoản trang mạng tơpôl, dôm grŭp Zalo vă pơm liơ đei hơnăp jang lơ̆m tơdrong iŏk yua păng hiôk lơ̆m vei lăng đơ̆ng kơdră kơpal. Hơdrin vang tơroi kơtơ̆ng ang đơ̆ng dôm trang trŏ ƀlep kơ hla ar tơroi, radiô TW, tơring; vei kơjăp ưh kơ vang tơroi dôm tơdrong kơtơ̆ng ang tam mă đei hơlen lăng rơđăh, kơtơ̆ng jang kơ nê̆, ưh kơ ‘lơ̆ng...pơm ăn tơpôl bơngơ̆t, tơchĕng ưh kơ ‘lơ̆ng, tơ jur đon lui hăm tơpôl, hăm Đảng, Teh đak. Hơdai hăm ‘noh, pơtrŭt rim chi bộ phĭn rup, kuay phim găh dôm tơdrong jang ‘lơ̆ng kơ pơlei, chi bộ, đơ̆ng dôm tơdrong iĕ hloh... kiơ̆ trong jang kăl ‘noh iŏk tơdrong ‘lơ̆ng, hŭt tơdrong kơ nê̆.

Gơnang đơ̆ng iŏk yua kơtơ̆ng ang, hơtŏk tơdrong ‘lơ̆ng đơ̆ng mạng tơpôl, dôm đảng viên tơ̆ xăh sơlam Mường Lèo, apŭng Sốp Cộp, Sơn La hơmet pơ ‘lơ̆ng dôm tơdrong mơmat at tơ̆ tơring lơ̆m kơplăh pơjing tơring tơrang ‘nao nhen: tơring hơtăih, kon pơlei oei răh rai, tơdrong hlôh vao đơ̆ng kon pơlei ưh kơ dang ăi, ưh kơ hlôh vao, ƀônh đei đe pơhlŭ pơhlôm, lui kiơ̆ dôm tơdrong lui hlĭch ưh kơ đei teh đak ăn phep. Kiơ̆ đơ̆ng noh ăn ƀôh hơnăp jang iung jang pơm jŭk yŭk trong hơlâu đơ̆ng đảng viên đei tơƀôh lơ̆m rim tơdrong jang.