Lơ̆m 2 giĕng vih hăm xăh Cư Pơng, apŭng Krông Buk, dêh char Đắk Lắk, 15 ‘nu hơdruh năm jang tơgŭm găh khŭl jang Pơyan he rơgoh kơ dêh char kŭm hăm tơring jang đang 4 tơdrong jang hơdruh tơdăm. Mă đơ̆ng tŏ ‘mi kial kơ nê̆, rim bơngai năm jang tơgŭm oei hơdrin tơgŭm pơm trong jur tơ̆ đak hơdrơ̆m păng pơm hơmet ming đak hơdrơ̆m; pơm cham ƀê tŏng, cham păh ƀŏng lŏng lơ̆m hơnih hnam hŏk hôp tơpôl. Tơ̆ gơmăng, bơngai năm jang tơgŭm ‘noh ‘măn jơ pơhrăm hŏk he ăn kơ đe hơioh, pơgơ̆r 8 ‘măng hŏk pơhrăm he hơdai hăm roi tơbăt khôi luơ̆t.

‘Nhŏng Y Hlý Niê Kđăm, Bí thư Đoàn hơdruh tơdăm xăh Cư Pơng, apŭng Krông Buk tơbăt: “Sơnăm ‘nâu xăh Cư Pơng gô jang đang tơring tơrang ‘nao kơna jing dôm tơdrong jang mă hơdruh tơdăm năm jang tơgŭm tơ̆ xăh tôch kơ kăl vă vang jang đang dôm tơdrong hơgăt vă jang đang lơ̆m sơnăm ‘nâu. Đe buăl ƀơ̆t vih hăm tơring ‘noh ưh khan lăp păr ang um rup ‘lơ̆ng găh vei lăng cham char, pơhrăm hŏk he ăn kơ hơioh mă oei tơƀôh tơdrong đĭ jơhngơ̆m, tơiung pơm đon lui ăn jơhnơr mơlôh, vang tơgŭm tơgop ăn tơpôl.”

Tơ̆ apŭng Lắk, 15 hơdruh tơdăm năm jang tơgŭm kơ dêh char hlôi năm tơgŭm tơ̆ plei Đắk Sa, xăh Đắk Nuê. ‘Nâu jĭ pơlei đei đĭ đăng bơngai Mông năm mơ̆t oei kư̆ kă đơ̆ng păh Tu, tơdrong arih sa oei tôch kơ mơmat tat, tam mă đei ŭnh điên teh đak păng trong nơnăm. Hơdruh tơdăm năm jang tơgŭm hlôi klăih song grŭp năm tơroi tơbăt găh iŏk ŭnh om hrôih, tang găn jĭ hơbuh, tơgŭm ŭnh hnam teh đak tơgŭm kăt yuă, phĕ iŏk tơmam đơ̆ng choh jang sa, vei lăng cheh phe. Pơih 2 lăm pơhrăm hŏk he ăn kơ 40 ‘nu hơioh lơ̆m pơlei, kŭm hăm kon pơlei pơm hơmet ming 5km trong lơ̆m pơlei, chong pơ ‘ngoăih 1,2 trong tơ̆ rim pơlei păng pơtăm 100 tơnơm ‘long tơ gyĕr jih trong.

Yă H Me Tơr, oei tơ̆ xăh Đắk Nuê, apŭng Lắk hơlen lăng: “Tơdrong hơiă đơ̆ng đe oh ‘noh jĭ tơdrong hơdrin tôch bơneh. Tơ̆ tơring ‘noh tam mă đei ŭnh điên, tam mă đei đak, tam mă đei trong, đe oh athei drŏng đak ‘mi, gô đak ‘mi vă hum, sŏ dak vă pai sa. Mă lei đe oh tôch kơ chơt, đe oh ưh kơ ‘nhoen măng năr ling lang hơdrin vang jang đĭ đăng dôm tơdrong jang mă ưh kơ đei lai yơ tơtok yua kơ kiơ tơ̆ âu ưh kơ đei đak, ưh kơ đei ŭnh điên.”

Lơ̆m tơdrong jang Hơdruh tơdăm năm jang tơgŭm pơyan he rơgoh sơnăm ‘nâu, kŭm hăm hloh 7.000 hơdruh tơdăm năm jang tơgŭm kơ tă anih, Anih jang Đoàn dêh char Đắk Lắk hlôi ăn 180 hơdruh tơdăm năm jang tơgŭm tơ̆ 6 xăh găh 6 apŭng. Hơdai hăm ‘noh jĭ 6 khŭl joăt jang tơgŭm tơroi tơbăt, tơplih kơ sô̆ tơpôl, chĕp vei tơdrong joăt so hơdrĕch hơdrŭng, mơ̆t jang hơdai apŭng plĕnh teh, bơngai mơlôh hŏk jrŭ năm jang tơgŭm, yua kơ đe oh ‘mêm kơ eng. Kiơ̆ đơ̆ng noh hlôi jang kiơ̆ dôm jĭt tơdrong jang hơdăh ‘lơ̆ng.

‘Nhŏng Y Lê Pas Tơr, Phŏ Bí thư Anih jang Đoàn dêh char, kơdră Khŭl pơgơ̆r tơdrong jang hơlen lăng: “Đĭ đei lơ tơdrong jang, mă loi ‘noh lơ̆m khei ‘năr mă 2 giĕng pơgơ̆r tơdrong jang ‘noh tŏ ‘mi kial kŭm ưh kơ ‘lơ̆ng, ‘mi lơ. Kiơ̆ kơ ‘noh đe buăl năm jang tơgŭm kŭm hlôi jang lơ̆m dôm tơdrong jang đơ̆ng kơdih păng hơmet năr jang vă vei sơđơ̆ng jang kiơ̆ đei dôm tơdrong jang hai mă vei sơđơ̆ng dôm tơdrong tơm găh tơroi tơbăt khôi luơ̆t tơ̆ tơring păng hŏk hôp chi đoàn kŭm nhen pơtho pơhrăm he ăn kơ hơioh hai.”

Hăm dôm bơngai năm jang tơgŭm, ‘nâu jĭ pơyan he ‘lơ̆ng hơiă, tơgop pơm đei dôm kơjă ‘lơ̆ng hơiă ăn tơpôl. Sinh viên Đặng Thị Phương Thảo (hnam trưng Đại học Ngoại ngữ - Tin học pơlei tơm Hồ Chí Minh) tơroi: “Pơyan he sơnăm 2024 ‘nâu hăm oh ‘noh ưh khan lăp jing 1 pơyan he năm jang tơgŭm mă oei đei tơdrong hiôk ‘noh jĭ vă kơ băt lơ ƀiơ̆, gơh hơtŏk tơiung hloh ƀiơ̆, pơm ăn kơ dih 1 tơdrong arih sa ‘lơ̆ng, pơm đei kơjă kăp gĭt ăn tơpôl. Oh tŏk bŏk bơ̆jang trực tuyến ăn pơđĭ tơdrong jang Pơyan he rơgoh kơ pơlei tơm Hồ Chí Minh păng bơ̆jang kơtă, plang đĭ jơhngơ̆m kơ dih ăn Pơyan he rơgoh tơ̆ pơlei kơdih. Lơ̆m kơ plăh bơ̆jang hăm khŭl grŭp, rim ‘măng vang jang ‘noh oh adoi hŏk dơ̆ng 1 tơdrong ‘nao.”

Tơdrong jang Pơyan he rơgoh sơnăm ‘nâu tơ̆ Đắk Lắk hlôi pơdơh hăm lơ tơdrong hơiă lơ̆m jơhngơ̆m đon khŭl kơdră păng kon pơlei tơ̆ tơring. Dôm tơdrong jang đơ̆ng hơdruh tơdăm năm jang tơgŭm ưh khan lăp tơgop jang kiơ̆ dôm tơdrong jang vei sơđơ̆ng tơdrong arih sa tơpôl mă oei păr ang um rup ‘lơ̆ng găh jơhngơ̆m mơlôh, pơnam, plang jơhngơ̆m đơ̆ng sơnăm mơlôh Đắk Lắk yua kơ tơdrong arih sa tơpôl.