Mŏ H’Dốk Êban oei tơ̆ pơlei Ea Mấp, thĭ trân Ea Pôc, apŭng Cư Mgar ‘nao kĕch yoă đang ƀa pơyan. Mơjĭt ƀi ƀa hơdrom tơƀit tơ̆ mum hnam. Mŏ H’Dốk tơbăt, ŭnh hnam mŏ păng kon pơlei lơ̆m pơlei dang ei pă đei tơtăm găh phe sa ƀa sŏng bơih. Jang sa kiơ̆ kih thuơ̆t kơna ƀa plei đơ̆ng 4 truh 6 tân lơ̆m 1 ha, lơ ŭnh hnam ưh khan lăp măh tăh sa mă lei oei đei chă tĕch dơ̆ng. Kiơ̆ đơ̆ng mŏ H’Dốk, tơdrong đei tơplih ou gơnơm rim hơnih bơ̆ jang pơm ‘nhŏng oh hăm pơlei ‘noh Hơnih Ban Tuyên giáo Hơnih Đảng dêh char Dak Lăk hăm Công ty cổ phần văn hóa dêh char atŭm hăm kang ƀô̆ pơtrut choh jang sa chă pơtho ăn kon pơlei trong jang sa:“Gơnơm đei tơgŭm djru, ba jei jang kiơ̆ kơna ƀa ƀou phu lơ̆m 200m2 ‘noh đei 2 ƀi ƀa, găh ƀa lai ‘noh lơ̆m 200m2 đei 4 ƀi, găh ƀa ƀou phu ‘noh đei hơdrĕch plei ăl, đei hơdrĕch ưh kơ gan plei, ƀa lai ‘noh hơdrĕch hăp măt ƀiơ̆. Lơ̆m rei blŭng ‘noh chă prôi phŏng sunfat, mư̆h ƀa kơ jung ‘noh chă prôi dơ̆ng 2 ‘măng phŏng NPK jĭ hoei bơih”.

Ƀok Y Tha Mlô, Bí thư Chi ƀô̆ ƀuôn Ea Mấp tơbăt, lơ̆m pơlei ou đei 535 ŭnh hnam păng lăp đei 24 ŭnh hnam dơnuh. Ŭnh hnam dơnuh jei tŏk bŏk roi tơjur kơ yuơ dôm sơnăm ou kon pơlei jang sa đei iok yua kơjăp. Atŭm hăm tơdrong tơplih ‘nao pơlei pơla, bơ̆ jang atok tơ iung Đảng tơ̆ pơlei pơla jei đei lơ trong jang hơ iă. Đơ̆ng “Ư̆h kơ đei” đảng viên lơ̆m sơnăm 2004, truh dang ei, pơlei đei 1 chi ƀô̆ hăm 17 ‘nu đảng viên. Dôm tơdrong jơnei ‘noh gơnơm đei tơdrong tơgop tih tên đơ̆ng khul jang chinh trĭ tơring atŭm hăm ƀôh hơdăh tơdrong bơ̆ jang ‘lơ̆ng pơrô̆ pơrôp kon pơlei mă kăl ‘noh bơ̆ jang pơm ‘nhŏng oh ƀar păh rim hơnih bơ̆ jang teh đak hăm pơlei pơla. Ƀok Y Tha Mlô tơbăt:“Lơ̆m dôm sơnăm rim kơdră jang lơ̆m hơnih bơ̆ jang pơm ‘nhŏng oh hlôi pơma dơnuh tơgŭm ăn khul kơdră pơlei tơlĕch đei trong bơ̆ jang hle ‘lơ̆ng hơ iă. Mă kăl găh atŏk tơ iung mŭk drăm mă đơ̆ng hơnih pơm ‘nhŏng oh găh kon jên hu ưh kơ đei, mă kăl jơhngơ̆m đon păng tơdrong chă pơtho tơbăt đơ̆ng đe sư, đơ̆ng rŏng ‘noh khul kơdră pơlei pơla chă pơrô̆ pơrôp kon pơlei jang kiơ̆ trong tơlĕch jang ‘noh găh atŏk tơ iung mŭk drăm, tơpôl, vei lăng sơđơ̆ng dơ̆ng kơjăp lơ̆m pơlei pơla.”

Kiơ̆ đơ̆ng ƀok Huỳnh Chiến Thắng, Tỉnh ủy viên, Kơ iĕng Kơdră Ban Tuyên giáo kơ Đảng dêh char Dak Lăk, jĭ hơnih pơm ‘nhŏng oh hăm pơlei Ea Mấp, jơnei lơ̆m tơplih jơhngơ̆m đon hlôi vao choh jang sa kơ kon pơlei ‘noh jĭ hơnih pơm ‘nhŏng oh kăl tơjê̆ kon pơlei păng hlôh vao kon pơlei. Kơ yuơ lơ loh, lăp đơ̆ng rŏng pơm ‘nhŏng oh, hơnih ou hlôi pơjing khul chĕp pơgơ̆r, dăr lăng tơdrong ou to lơ̆m pơlei vă pơjing đei trong jang, trong pơprŏ jang tơgŭm djru kon pơlei trŏ lăp hloh. Hăm dôm ŭnh hnam tơnap tap ưh kơ đei teh jang sa ‘noh hơnih ou chă krao hơvơn tơgum djru kon jên răt kon tơrong tơgŭm ăn chă rong, chă pơma dơnuh hăm rim hơnih mơdro sa vang tơgŭm djru tơmơ̆t jang. Dôm ŭnh hnam kon pơlei đei teh jang sa, mă lei ‘long pơtăm ưh kơ gan plei, ưh kơ gan đei iŏk yua kơjăp ‘noh hơnih ăn kang ƀô̆ pơtrŭt choh jang sa jur tơ̆ pơlei pơtho ăn kon pơlei trong jang sa. Rim khei, hơnih ou jei hơnơ̆ng ăn đảng viên jur vang hop akŏm hăm chi ƀô̆ pơlei vă băt hơdăh tơtom dôm tơdrong hơpơi ‘meh vă đơ̆ng kon pơlei păng tơblang hơdăh dôm tơdrong mă kon pơlei oei ƀơ ƀreh ou to:“Jang kiơ̆ trong jang tơ iung pơjing chi ƀô̆ 4 ‘lơ̆ng kơ Hơnih Đảng dêh char, Ban tuyên giăo nhôn jei tơlĕch jang hơdoi hăm chi ƀô pơlei, rim khei ăn đảng viên vang năm hop akŏm vă tơgum djru chi ƀô̆ pơlei pơjing rim tơdrong tơchơt adoi xek tơlang rim tơdrong tơ̆ pơlei pơla. Kiơ̆ đơ̆ng noh băt hơdăh dôm tơdrong vă tơiung pơjing đei trong jang tơ̆ pơlei ‘lơ̆ng hơ iă hloh dơ̆ng.”

20 sơnăm ou ki, dêh char hlôi đei 1.780 hơnih bơ̆ jang, hơnih mơdro sa pơm ‘nhŏng oh hăm 556 pơlei kon kông. Kiơ̆ đơ̆ng Hơnih Đảng dêh char Dak Lăk, tơdrong iok đei jơnei lơ̆m bơ̆ jang pơm ‘nhŏng oh khei năr ou ki hlôi sơkơ̆t hơdăh ‘nou jĭ minh trong bơ̆ jang tôch trŏ ƀlep, trŏ lăp hăm jơhngơ̆m đon kon pơlei, jing tơdrong jang chinh trĭ, tơpôl gĭt kăl, ‘mêm mơnat dih băl hơ iă. Vă atŏk kơtang hloh dơ̆ng tơdrong  jang ou, Dak Lăk gô hơnơ̆ng tơplih ‘nao găh trong iung jang mă trŏ lăp hăm tơdrong ‘meh vă đơ̆ng kon pơlei. Ƀok Nguyễn Đình Trung, Kơdră jang lơ̆m Trung ương Đảng, Ƀĭ thư Đảng dêh char Dak Lăk akhan, pơm ‘nhŏng oh ưh khan lăp tơdrong ƀar păh rim hơnih bơ̆ jang teh đak-hơnih kơdro sa hăm kon pơlei kơ rim pơlei pơla đech ôh mă lei đei hloi tơdrong vang iung jang đơ̆ng khul kơdră chĕp pơgơ̆r đảng, chĕp pơgơ̆r tơring dơ̆ng. “Rim hơnih bơ̆ jang pơm ‘nhŏng oh kăl atŏk kơtang hloh dơ̆ng tơdrong tơgoăt kơjăp hăm kơdră đảng, kơdră chĕp pơgơ̆r tơ̆ tơring vă tơtom băt hơdăh tơdrong hơpơi ‘meh vă, tơdrong hơrih sa kơ kon pơlei lơ̆m pơlei pơm ‘nhŏng oh, đơ̆ng noh tơlĕch đei rim trong jang tơgŭm djru trŏ lăp, trŏ ƀlep hăm yan ou păng trŏ lăp hăm tơdrong jang lơ̆m chăl hle. Adoi, tơlĕch pơma dơnuh dih băl găh dôm tơdrong tơnap tap, tơhlăk tơhlĭn lơ̆m tơlĕch jang kiơ̆ bơ̆ jang pơm ‘nhŏng oh.”

Pơm ‘nhŏng oh đei lăng jĭ mĭnh jơ ‘năr tơgoăt tơgoăl dih băl kơjăp pơlei pơla, đei jing mĭnh tơdrong joăt lơ̆m hơrih sa kơ pơlei pơla rim hơdrung Việt Nam. 20 sơnăm ou ki, tơdrong joăt ‘lơ̆ng rŏ ‘noh hlôi đei tơlĕch jang kiơ̆ lơ̆m mĭnh tơdrong tơchơ̆t tơlĕch jang tih tên đơ̆ng Hơnih Đảng dêh char Dak Lăk, đei tơlĕch jang kiơ̆ tơ̆ rim tơdrong jang pơm ‘nhŏng oh ƀar păh rim hơnih bơ̆ jang hăm rim pơlei pơla bơngai kon kông, kiơ̆ đơ̆ng noh pơm hơtŏk ‘lơ̆ng liĕm hloh dơ̆ng găh jơhngơ̆m đon tơgoăt tơgoăl dih băl kơjăp rim hơdrĕch hơdrung; tơgop vei lăng sơđơ̆ng ‘lơ̆ng hơ iă chinh trĭ, sơđơ̆ng dơng kơjăp tơpôl, atŏk tơ iung ‘lơ̆ng tơdrong hơrih sa, mŭk drăm-jơhngơ̆m đon kơ kon pơlei oei tơ̆ tơring kon kông.