Pơyan Puih mak âu vih hăm xăh Ea Hồ, apŭng Krông Năng, dêh char Đắk Lắk, đơ̆ng tŏk bŏk xăh năm truh tơ̆ dôm pơlei pơla dang ei đei dơ̆ng lơ hnam ‘nao man kơjăp ‘lơ̆ng tơter trong. Lơ jăl trong trôk rơbơ̆r adrol sơ̆ hlôi đei man hăm bê tông. Unh điên chô̆ truh tơ̆ rim hnam. Hnam hŏk, hnam pơgang đei man ‘nao ƀrao ‘lơ̆ng. Lơ̆m hơkâu đĭ đei et 1,2 kơ li hơlăk pơyan puih mak bơih, ƀok kră pơlei Y Nút Niê, xăh Ea Hồ, apŭng Krông Năng chơt hơiă tơroi, tơdrong jang tơm pơjing tơring tơrang ‘nao tưiung dơ̆ng jơhngâm pran ăn kon pơlei vă kon pơlei jang tŏk klăih đơ̆ng tơnuh hin, oei xa kơjăp tơ̆ pơlei pơla.

“Adrol sơ̆, jang mir roh tôch pơmat tat, jang 2-3 ha mă oei ưh kơmăh sŏng xa ‘mơ̆i. Teh đak pơngơ̆t ăn kon pơlei tơ̆ âu jang xa, pơtho ki thuơ̆t choh jang kơna kon pơlei jang kiơ̆, tơplih ming lơ kơloăi ‘long pơtăm đei kơjă măk nhen sâu riêng, tiu, kon hơ ‘lơ̆p đei năm hŏk ngăl”.

Mât hơdai lơ̆m tơpôl lơ̆m tơdrong chơt hơiă kơ pơyan Puih mak, vang tôn chĭng, et xa tơmam đơ̆ng kon pơlei pai tơ̆ Hnam hŏk hôp tơpôl xăh Ea Hleo, apŭng Ea Hleo, dêh char Đắk Lắk, ƀok Lê Quang Bảng, 1 ‘nu kon pơlei tơ̆ xăh tôch čhôk ‘nă: Hnam hŏk hôp tơpôl âu đei man đơ̆ng 3 sơnăm adrol ki. Hnam hŏk hôp jing hnam ngôi pơchơt atŭm kơ kon pơlei, dôm tơdrong hơri hơxoang, tơplŏng kơdâu đei anih pơgơ̆r ngăl, lơ khul grŭp joh hơri hơxoang đei pơjing vă tưk tơiung, chĕp vei kơjăp dôm tơdrong juăt ‘lơ̆ng lơ̆m tơpôl.

“Nhôn đei hnam hŏk hôp âu, jĭ hnam atŭm kơ tơpôl kon pơlei, đei kon pơlei tôch lăp đon vei lăng păng pơgơ̆r rim tơdrong ngôi pơchơt, pơtih gia năr trung thu dăh mă tết rim khul grŭp nhen khul linh so, khul drŏ kăn pơlei păng dôm năr lêh kon pơlei hơnơ̆ng truh akŏm tơ̆ âu, tôch hơiă, thoi kơna bơnê kơ Đảng, teh đak tơlĕch đei trong jang ‘lơ̆ng vă kon pơlei bơ̆ jang kiơ̆ tơdỏng pơjing tơring tơrang ‘nao”

Truh hăm xăh Yang Tao, apŭng Lắk, dêh char Đắk Lắk, tơmoi đei jơ vang pơm bơ̆n bô̆i, pơnhan, gŏ dăh mă pơm sem tơrong hăm lơ̆n hơdai hăm đe mĕ, đe yă tôch hơiă. Ƀok Y Wu Sruk, Phŏ Kơdră vei lăng kon pơlei xăh Yang Tao, ăn tơbăt: Tơdrong jang pơm bô̆i đơ̆ng sơ̆ kơ kon pơlei M’Nông tơ̆ Yang Tao, tôch hơiă yoa pơm hăm ti ngăl. Tơdrong jang 1 xăh 1 tơmam pơih đei 1 trong jang ‘nao tơgŭm ăn tơring pơjing đei jơhngâm pran păng pơm hơtŏk kơjă tơmam, hơnhăk iŏk yoa roi lơ ăn kon pơlei gơnơm đơ̆ng pơm bô̆i âu:

“Nhôn oei chĕp vei hơnơ̆ng pơlei đei tơdrong jang so kŭm nhen hơpơi ‘mĕh atŏk tơiung păng hơnhăk tĕch tơ̆ anih tĕch mơdro. Hrei ‘nâu nhôn hlôi chih măt pơm tơmam OCOP bơih. Dang ei lơ bơngai truh tơ̆ apŭng Lắk hơnơ̆ng jreng lăng lơ̆m pơlei, lăng năng đe pơm bô̆i tơ̆ yăn âu. Tơ̆ tơring kŭm đei 1 kơsô̆ druh dăm tơlĕch trong jang tŏk chă tơmang lăng lơ̆m tơpôl. Kiơ̆ tơdrong tơchơ̆t đơ̆ng Khul kơdră chĕp kơ̆l Đảng ƀô̆ apŭng vă pơjing apŭng Lắk jing anih tơm chă tơmang lăng kơ dêh char Đắk Lắk truh sơnăm 2030. Dôm bơngai gơ̆h pơm bô̆i oei adrin pơm thoi yơ vă tơmam đơ̆ng pơlei đei tơdrong jang gơ̆h truh hăm đĭ đăng tơring nai, băt truh tơmam pơm đơ̆ng tĕh lơ̆n đơ̆ng nhôn”.

Kiơ̆ ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk, truh dang ei lơ̆m dêh char đei 78/151 xăh jang kĕh tơring tơrang ‘nao. Lơ̆m noh đei 5 xăh tơring tơrang ‘nao đei ƀôh. Tơ̆ hơnăp kơnh, kŭm hăm tơdrong tơgŭm tơmât jên jang pơm trong, anih jang, Đắk Lắk hơnơ̆ng tơrĕk truh tơdrong chĕp vei, tưk tơiung dôm kơjă kăp gĭt đơ̆ng joh ayŏ kơ dŏ xoang so kiơ̆ trong kơjăp ‘lơ̆ng, hăm rim tơdrong juăt ‘lơ̆ng đơ̆ng sơ̆. Lơ̆m noh, akŏm jơhngâm tưk tơiung tơdrong jang 1 xăh, 1 tơmam vă pơjing đei tơdrong juăt ‘lơ̆ng tơ̆ rim tơring, rim hơdrĕch hơdrung, hơdai hăm ‘nŏh vă pơm tơplih đon hlôh vao găh tơdrong jang xa vă gơ̆h tơjur tơnuh hin kơjăp ‘lơ̆ng.

Ƀok Nguyễn Hoài Dương pơma hơdăh: “Hăm 1 dêh char đei lơ tơdrong ‘lơ̆ng găh tơmam đơ̆ng choh jang xa  păng tơdrong joh ayŏ kơ dŏ xoang Tây Nguyên, dêh char Đắk Lắk đei lơ trong jang tôch hơdăh păng vă tơlĕch jang tơ̆ jơ̆p tơring. Hăm tơdrong tơgŭm đơ̆ng Anih vei lăng choh jang xa păng atŏk tơiung tơring tơrang kŭm hăm dôm anih jang tơ̆ dêh char ‘nâu jĭ trong jang tôch trŏ vă pơjing đon kơchăng mưh roi tơbăt, pôk pơ ư dôm tơmam OCOP vă gơ̆h tĕch mơdro sơđơ̆ng ‘lơ̆ng, đơ̆ng noh vang tơgop pơm hơtŏk iŏk yoa ăn kon pơlei tơ̆ tơring păng jang tŏk pẻan hlŏh dơ̆ng tơ̆ tơring tơrang ‘nao”.

Mĭnh pơyan Puih mak ‘nao hlôi vih, hăm ƀĕnh jơhngâm đon chơt hơiă ‘nă hal, tơdrong hiôk chơt hlôi truh hăm rim unh hnam, rim pơlei pơla. Ƀrach ‘năr rŏ, tŏ hơlăng kơ pơyan Puih mak, lơ pơlei pơla, tơring tơrang ‘nao tơ̆ Đắk Lăk nhen đei dơ̆ng jơhngâm pran ‘nao vă jang tŏk. Dang ei, pơjing tơring tơrang ‘nao ưh lăp hơnăp jang đơ̆ng khul kơdră pơgơ̆r tơring, khul grŭp tơpôl đech mă sư hlôi jing tơdrong jang atŭm đơ̆ng đĭ đăng kon pơlei. Đĭ đăng vang akŏm jơhngâm vă pơjing đei lơ pơlei pơla tơgăl kơ arih.