Tơdrong jang kăl mă blŭng ‘noh jĭ Anih vei lăng kon pơlei apŭng Ia H’Drai pơgơ̆r Lêh roi tơbăt tơdrong tơchơ̆t đơ̆ng Anih vei lăng kon pơlei dêh char Kon Tum drơ̆ng ăn xăh Ia Đal jang đang tơring tơrang ‘nao. ‘Nâu jĭ xăh sơlam mă 7 lơ̆m akŏp kơ sô̆ 13 xăh sơlam kơ dêh char  Kon Tum jang đang tơring tơrang ‘nao. Lơ̆m dôm sơnăm âu ki Đảng bộ, khŭl kơdră chĕp kơ̆l păng vă jê̆ 5.000 ‘nu kon pơlei xăh sơlam Ia Đal hlôi mĭnh jơhngơ̆m đon bơ̆jang Tơdrong jang tơm teh đak pơjing tơring tơrang ‘nao păng iŏk đei lơ jơnei ‘lơ̆ng. Đơ̆ng lơ jên xăh hlôi hơvơn đei hloh 49 ti hlak jên tơmơ̆t jang ming man vei sơđơ̆ng dôm tơdrong hơgăt găh anih jang kăl; iŏk yua jô̆ păh lăp kơ̆l bơngai rim sơnăm đei hloh 43 triệu hlak jên 1 ‘nu 1 sơnăm; kơsô̆ ŭnh hnam dơnuh hin, vă jê̆ dơnuh hin jur oei pă hơla kơ 12%. Ƀok Lò Văn Nịa, plei Ia Đal, xăh Ia Đal, tơbăt:

“Kon pơlei tôch kơ chhôk hơiă yua kơ pơjing tơring tơrang ‘nao ‘noh pơm ăn kon pơlei, pơm ăn kơ dih kâu bơ̆n vă kơ hơtŏk tơiung. Pơjing tơring tơrang ‘nao kon pơlei tơgop năr jang, jơhngơ̆m jang hơdai hăm ‘noh jĭ plang song teh pơm trong tơring tơrang ‘nao. Pơjing tơring tơrang ‘nao kon pơlei đei yua tôch kơ lơ, pơm tơdrong hiôk hơtŏk tơiung mŭk drăm ŭnh hnam yak hloh klăih đơ̆ng dơnuh hin kơjăp. Joh ayŏ, mŭk drăm hơtŏk tôch kơ rơđăh pơting hăm năr hơdrol kơ tam mă pơjing tơring tơrang ‘nao.”

Hăm tơdrong đei drơ̆ng ăn jang đang tơring tơrang ‘nao, xăh Ia Đal jĭ xăh sơlam mă 7 lơ̆m akŏp kơsô̆ 13 xăh sơlam kơ dêh char Kon Tum jang đang tơring tơrang ‘nao. Truh dang ei lơ̆m dêh char Kon Tum hlôi đei 48 lơ̆m kơ sô̆ 85 xăh kơ dêh char jang đang tơring tơrang ‘nao, lơ̆m noh đei 4 xăh jang đang tơring tơrang ‘nao ‘lơ̆ng rŏ păng 1 xăh jang đang tơring tơrang nao ‘lơ̆ng.

Hăm đon pơhnŏng jang đang dôm tơdrong hơgăt hơtŏk tơiung mŭk drăm - tơpôl tơlĕch ăn lơ̆m sơnăm 2024, tơ̆ lêh iung jang pơjing tơring tơrang ‘nao păng anih kơdrơ̆m hơgei, 10 apŭng, pơlei tơm kơ dêh char Kon Tum hlôi tơlĕch jang dôm tơdrong tơm hơdăh vă hơdrin bơ̆jang kiơ̆. Lơ̆m noh, akŏm lơ̆m tơdrong pơjing dôm tơdrong jang pơm tơlĕch, choh klăng hơmet chŭn na, hơtŏk tơiung tơmam OCOP; pơjing ‘nao, pơm hơmet ming trong nơnăm, dơnâu đak, hnam hŏk hôp; tơgŭm dôm ŭnh hnam teh đak tơgŭm đei tơdrong arih sa mơmat tat pơm hơmet ming hnam oei, choh hơmet pơgar ‘long hơtŏk tơiung mŭk drăm; hơtŏk loi dơ̆ng tơdrong jang vei lăng păng hơtŏk tơiung bri....

Jĭ apŭng đei hloh 79km trong sơlam tơ jê̆ teh đak buăl Campuchia, tơ̆ Lêh iung jang pơjing tơring tơrang ‘nao đei pơgơ̆r tơ̆ xăh Ia Đal, ƀok Võ Anh Tuấn, Kơdră Anih vei lăng kon pơlei apŭng Ia H’Drai tơbăt:

“Đảng bộ, khŭl kơdră păng kon pơlei kơ apŭng tơlĕch tơdrong hơgăt pơjing apŭng truh hơtuch sơnăm 2025 apŭng jang đei dôm tơdrong hơgăt đơ̆ng apŭng tơring tơrang ‘nao. Kiơ̆ lơ̆m dôm Tơdrong tơchơ̆t đơ̆ng Anih jang Đảng dêh char, apŭng kŭm hlôi tơlĕch ăn trong vă jang hơdăh vă rim xăh jang đang tơring tơrang ‘nao. Hăm tơdrong tơm kŭm nhen trong tơlĕch jang hlôi tơlĕch ăn nhôn tŏk bŏk hơdrin đĭ jơhngơ̆m kŭm nhen hlôi đei trong jang hơdăh vă hơnhăk xăh Ia Tơi truh hơtuch sơnăm 2024 jang đang tơring tơrang ‘nao.”

Lăng ƀôh bơngai Xơ Đăng đei đon kơchăng, jang tơnăp hăm tơpôl tôch kơ ‘lơ̆ng hiôk lơ̆m tơdrong hơtŏk tơiung tơdrong jang mŭk drăm tơpôl, đơ̆ng dôm bơngai jang tơm, tơ̆ xăh Đăk Na, apŭng Tu Mơ Rông, dêh char Kon Tum hlôi pơjing đei 3 Hơp tak xăh păng 3 Grŭp jang hơdai. Tơdrong vang jang lơ̆m dôm Hơp tak xăh hlô tơgŭm kon pơlei tơplih đei đon tơchĕng lơ̆m jang sa. Ƀok Võ Nguyên Sinh, Kơdră Jơnŭm vei lăng pơm hloi Kơdră vei lăng Hơp tak xăh tơmang lăng păng pơgang hla ‘long rơgoh Siu Puông hăm 43 ‘nu bơngai jang lơ̆m hơp tak xăh vă đĭ đăng ‘noh bơngai Xơ Đăng, tơbăt:

 “Bơngai jang lơ̆m Hơp tak xăh ‘noh đe sư tơplih đei trong tơchĕng jang jang sa, tơchĕng jang mŭk drăm. Vang jang lơ̆m Hơp tak xăh vă pơtăm sâm Ngọc Linh ‘noh vei đei bri păng hơtŏk tơiung kơjăp. Yua kơ đe sư tơplih đei đon tơchĕng đơ̆ng noh pơjing đei dôm tơdrong jang mŭk drăm nai. Kơđeh năr ‘noh pơtăm sâm hro, đang kơ ‘noh rong iĕr, rong nhŭng vă pơyua ăn tơmang lăng. Oei đunh đai ‘noh đei sâm Ngọc Linh. Đe sư đei jên iŏk yua kơđeh năr păng đunh năr.”

Hăm hơnăp jang ‘noh jĭ tơ ‘ngla tơm lơ̆m pơjing tơring tơrang ‘nao, lơ tơpôl bơngai kon kông kơ dêh char Kon Tum hlôi hơdrin lơ̆m jang sa hơtŏk ‘lơ̆ng đei iŏk yua păng tơgop tơplih ‘lơ̆ng um ai tơring tơrang. Jô̆ truh hơtuch sơnăm 2023 hlôi đei 32 pơlei tơring kon kông kơ dêh char Kon Tum jang đang tơring tơrang ‘nao. Đĭ đăng dôm xăh lơ̆m dêh char jang đang đơ̆ng 15 tơdrong hơgăt tơring tơrang ‘nao tơ̆ kơpal. Lơ̆m dêh char Kon Tum dang ei đei 42 xăh jang đang tơring tơrang ‘nao, lơ̆m noh lơ xăh kon kông hlôi jang đang tơring tơrang ‘nao.