Tơƀưh sơnăm 74, lĭnh so Nguyễn Đức Thành, tơ̆ phường Cheo Reo, thị xã Ayun Pa, dêh char Gia Lai oei nŏng kơ jang tơ̆ teh xă vă jê̆ 1 héc ta pơgar jang kơ ŭnh hnam păng hơnơ̆ng iŏk đei 130 triệu truh 150 triệu hlak jên rim sơnăm. Pơgar jang să klăih song jing dôm hơnih rong kon tơrong, hơlŭng rong ka, ‘long sa plei păng ƀum hơ ƀo pro hơ mrĕ, hơnhăk ăn iŏk yua prăt sơnăm, tơ jur lơ ưh kơ pŭn ai găh anih tĕch mơdro. Kiơ̆ kơ ƀok Nguyễn Đức Thành, kŭm hăm ‘meh vă mŭk drăm đơ̆ng kơdih kâu, tơdrong 2 ‘nu klo kăn ƀok kră hơnơ̆ng hơdrin hăm jang pơgar, ‘noh jĭ yua kơ ‘meh vă đei tơgop lơ̆m tơdrong jang atŭm kơ Khŭl lĭnh so thị xã: “Nhen Ƀok Hồ hlôi pơma, so mă lei ưh kơ so, kơna kơ dih kâu hơdrin hơtŏk tơiung mŭk drăm pơgar, rong ka, rong kon tơrong. Ĭnh kŭm hăm dôm bơngai jang lơ̆m khŭl hơdrin pơm liơ ‘nhŏng oh adoi hơdrin hơtŏk tơiung mŭk drăm lơ̆m pơlei, kueng ƀôt.”

Kŭm tơ̆ sơnăm “ki hei hui kơ đei”, lĭnh so Nguyễn Văn Tuyến tơ̆ phường Hòa Bình, thị xã Ayun Pa oei pơvei jên thu kơ hrĕng triệu hlak jên rim sơnăm đơ̆ng tơ pang ti bơ̆jang đơ̆ng kơdih. Pơlei tơ̆ apŭng Hương Sơn, dêh char Hà Tĩnh, đei tơdrong jang rong  joei iŏk rơnôp kơna ŭnh hnam hơtŏk iŏk yua ‘nâu. Ƀok Tuyến tơroi, rong joei kăl lơ hloh ‘noh jĭ tơdrong hlôh vao, oei sa tơmam hiĕm đei kơ tă tơ̆ tơring, ưh kơ hoach lơ năr vei lăng: “Tơdrong jang rong joei đơ̆ng ĭnh lăp hoach jên blŭng a, đơ̆ng rŏng âu hiĕm sa ‘noh ĭnh tơ gĕch yua jơhngơ̆m ĭnh vă pơtăm ‘ngiĕt, hla păng kăt ăn kơ joei sa. Nhen joei hơ kăn 1 sơnăm tuh 1 pôm kon ‘noh kŭm tĕch đei dang 12 - 13 triệu hlak jên. Oei joei tơno 1 sơnăm iŏk 2 ‘măng rơnôp, ‘măng blŭng ‘noh đei vă jê̆ 7 lạng, ‘măng đơ̆ng rŏng dang 3 lạng ‘noh 1 sơnăm kŭm đei mĭnh kĭ”.

Tơdrong jang “Lĭnh so pơm jŭk yŭk trong hơlâu” ưh khan lăp pơdơh tơ̆ tơdrong hơtŏk tơiung mŭk drăm kơdih, mă oei păr ang truh dôm tơdrong jang nai nhen “Lĭnh so tơgŭm băl tơ jur dơnuh hin, jang mŭk drăm hơgei”, “Lĭnh so mĭnh jơhngơ̆m pơjing tơring tơrang ‘nao”. Lơ lĭnh so hlôi hơdrin vang plang song teh, tơgop năr jang, tơgŭm dôm anih mong jên hăm kơ sô̆ jên lơ... ƀôh hơdăh nhen lĭnh so Ksor Khoan, hlôi plang song hloh 500m2 teh vă pơm trong nơnăm tơring tơrang tơ̆ xăh Chư Băh, thị xã Ayun Pa. Ƀok kŭm ling lang jang hơdrol vă kon pơlei lơ̆m pơlei hŏk păng pơm kiơ̆ lơ̆m tơdrong jang pơjing tơring tơrang ‘nao tơ̆ tơring. “Ĭnh hlôi hơrih lơ̆m hơnih khŭl lĭnh vih tơ̆ tơring mă hơdrol jang ‘lơ̆ng tơdrong tơroi tơbăt krao hơvơn kon pơlei jang kiơ̆ ‘lơ̆ng tơdrong jang sa, sut pơngot tơ jur dơnuh hin vă hơtŏk iŏk yua. Vang jang tôm dôm tơdrong jang, hơmet ‘yâu rơgoh pơm ‘lơ̆ng pơlei, kueng ƀôt.”

Hăm lơ tơdrong hơdrin, tơdrong jang “Lĭnh so pơm jŭk yuưk trong hơlâu” tơ̆ thị xã Ayun Pa hlôi iŏk đei lơ jơnei nhen: đĭ đăng khŭl tơ̆ tơring adoi iŏk đei hơnăn jang đang hơnăp jang tơ̆ kơpal, kơ sô̆ bơngai jang lơ̆m khŭl pơm jŭk yŭk trong hơlâu hloh 90%, kơsô̆ ŭnh hnam arih sa ‘lơ̆ng đei hloh 85%. Ƀok Nay Phong, Kơdră vei lăng Khŭl lĭnh so thị xã Ayun Pa, dêh char Gia Lai tơbăt, kŭm hăm dôm tơdrong jang, khŭl jang kŭm tôch kơ bơngơ̆t truh hơtŏk ‘lơ̆ng đon nuih chĭnh trĭ, hơtŏk jơhngơ̆m đon ‘lơ̆ng Ƀô̆ đô̆i ƀok Hồ hăm rim bơngai jang lơ̆m khŭl, vă rim bơngai jang lơ̆m khŭl lĭnh so hơtŏk ‘lơ̆ng hloh dơ̆ng hơnăp jang đơ̆ng kơdih: “Tơ̆ hơnăp kơnh, hơnơ̆ng dôm tơdrong jang pơjei băl nhen lĭnh so pơm jŭk yŭk trong hơlâu tơklep hăm tơdrong hŏk pơhrăm păng pơm kiơ̆ jơhngơ̆m đon ‘lơ̆ng Hồ Chí Minh, pơjing khŭl pran kơ jăp găh chính trị păng đon tơchĕng. pơgơ̆r hơtŏk ‘lơ̆ng đei yua tôm tơdrong găh rim tơdrong jang, hơdrin jang đei păng yak hloh dôm tơdrong hơgăt, hơnăp jang”.

Tơdrong jang “Lĭnh so pơm jŭk yŭk trong hơlâu” hlôi jing 1 tơdrong tưk tơiung tih, pơtrŭt bơngai jang lơ̆m khŭl lĭnh so tơ̆ thị xã Ayun Pa dêh char Gia Lai hơdrin jang sa, vang jang dôm tơdrong jang pơjei băl, sơkơ̆t hơdăh hơnăp jang gĭt kăl lơ̆m tơdrong arih sa tơpôl. Đe sư hlôi păng tŏk bŏk tơgop jơhngơ̆m pơjing pơlei pơla Ayun Pa roi ‘năr roi pơdrŏng ‘lơ̆ng, hơgei.