Kpuih Trí, 10 sơnăm oei tơ̆ plei Nú mơ ti đơ̆ng ‘lơ̆p. Sư hơrih hăm yă păih mĕ kră pă jăng păng tôch kơ dơnuh hin. Khei ‘năr tơ̆ hơnăp kơ Trí ưh kơ băt gô thoi yơ tơdăh ưh kơ đei tơdrong tơgŭm đơ̆ng đe kang ƀô̆, khŭl lĭnh kơđông vei lăng tơring sơlam Ia Nan, Ƀô̆ đô̆i vei lăng tơring sơlam Gia Lai:

“Kon ƀôh tôch kơ chhôk hơiă păng tôch kơ chơt đei đe ma iŏk rong. Đe ma pơtho akhan kon hŏk, pơtho sŏng sa, pơtho tep, oei sa rim năr athei mă ‘yâu, rơgoh ưh kơ gơh ‘mê̆.”

Kpuih Trí lăp jing 1 lơ̆m lơ oh hŏk tro kơ hnam trưng hŏk Jăl 1 Kơ Pă Kơ Lơng đei tơdrong arih sa tôch kơ mơmat tat, đei Kơđông lĭnh vei lăng tơring sơlam Ia Nan iŏk tơgŭm. Đei oh đei đe ma, đe mih iŏk brŏk tơ̆ kơ đông rong ‘me, vei lăng, đei oh đei kơ đông tơgŭm jên 500 rơbâu hlak jên rim khei vă tơgŭm ăn tơdrong hŏk. Thiếu tá Rơ Lan Thức, Chính trị viên phŏ kơđông lĭnh vei lăng tơring sơlam Ia Nan tơbăt:

“Anih jang hlôi kơchăng, kơtă tơgŭm kon pơlei. Mă loi ‘noh anih jang tơlĕch tơdrong jang kon rong kơđông lĭnh vei lăng tơring sơlam, tơdrong jang ‘nhot rơgoh yak hơdai hăm hŏk tro oei sa kơtă tơ̆ kơ ‘năr, bô̆i phe ‘mêm kơ eng. Đe kang ƀô̆ khŭl lĭnh kŭm hlôh vao, hơtŏk ‘lơ̆ng đei hơnăp jang, ưh kơ ‘nhoen mơmat, hơdrin bơ̆jang kiơ̆ đei hơnăp jang.”

Hnam trưng hŏk jăl 1 Kơ Pă Kơ Lơng đei 371 ‘nu hŏk tro đơ̆ng lăm 1 truh lăm 5, 100 % hŏk tro ‘noh jĭ bơngai Ja Rai. Lơ̆m tơring, kơsô̆ ŭnh hnam dơnuh hin lơ, ƀơ̆t mă hlôh vao păng ‘meh vă hŏk pơhrăm đơ̆ng 1,2 ‘nu kon pơlei kon kông oei tŏ sĕt. Kô pơtho Trần Thị Nhung, Kơdră vei lăng Hnam trưng tơroi: dôm sơnăm âu ki, hnam trưng hơmet pơ ‘lơ̆ng rim tơdrong mơmat tat vă hơtŏk ‘lơ̆ng pơtho păng hŏk. Yua đơ̆ng lơ ŭnh hnam năm jang mir ưh kơ đei jơ rơvơn ba kon truh tơ̆ hnam trưng kơna găh lơ đe oh hŏk tro athei năm jơ̆ng hoh tŏk tơ̆ lăm. Vă kơ hiôk ăn tơdrong hŏk đơ̆ng đe oh, hnam trưng hơmet ăn hŏk tro lăm 1, lăm 2 gơh hŏk tơ̆ dôm hnam trưng jê̆ hnam. Oei đe oh ‘lŏ ƀiơ̆ hŏk tơ̆ hnam trưng tơm. Lơ ŭnh hnam tơ̆ hơtăih, đe thây kô pơtho kŭm hăm kang ƀô̆ khŭl krao hơvơn tơpôl kơ Đông lĭnh vei lăng tơring sơlam Ia Nan truh tơ̆ rim hnam iŏk hŏk tro. Kô pơtho Trần Thị Nhung oei tơbăt, ‘ngoăih kơ hơtŏk jơ pơtho tơm môn Nơ̆r yuăn, hnam trưng pơgơ̆r 2 ‘măng hŏk ‘ngoăih ưh kơ iŏk jên. Đĭ đăng hŏk tro adoi đei asong hla ar hŏk, hla ar chih, tơmam yua hŏk pơhrăm vă pơtrŭt đe oh ‘mêm kơ hnam trưng, ‘mêm kơ lăm, đei jơhngơ̆m hiôk truh tơ̆ hnam trưng rim năr:

“Tơgŭm găh gre hao, hla ar hŏk, tơmam yua, chơ khŏ vă đe oh truh tơ̆ hnam trưng. Blŭng sơnăm athei hơmet ăn hla ar hŏk, tơmam yua hŏk pơhrăm. Tơchĕng hơdrol bơ̆n đei 370 ‘nu oh hŏk tro ‘noh bơ̆n athei mong răk dôm yơ hla ar hŏk, hla ar chih vă đe oh năm ba ăn kơ oh mơng ‘noh hŏk đĕch.”

Lơ̆m xăh Ia Nan, apŭng Đức Cơ, dêh char Gia Lai lơ̆m 7 - 8 sơnăm tơ jê̆ âu, 100% hơioh lơ̆m sơnăm truh tơ̆ hnam trưng đei năm hŏk. Hơdrin đơ̆ng hnam trưng kŭm hăm rim kơdră, rim khŭl tơpôl khŭl lĭnh ƀô̆ đô̆i vei lăng tơring sơlam hlôi tơgop tơgŭm tơdrong truh tơ̆ hnam trưng đơ̆ng hŏk tro dơnuh hin tơring groi kông dă ƀiơ̆ kơ mơmat tat.