Hăm tơdrong jang tơm “bu đei kiơ tơgop ‘noh, bu đei năr tơgop năr, bu đei tơmam tơgop tơmam, bu đei lơ tơgop lơ, bu đei tŏ sĕt tơgop tŏ sĕt”, pơgê (18/9), tơ̆ pơlei tơm Kon Tum, dêh char Kon Tum pơgơ̆r Lêh tơlĕch jang tơdrong jang pơjei băl “Vang tơgŭm sut hnam pơgia, hnam hiăh hiot” hăm tơdrong hơgăt truh đĭ sơnăm 2025 gô ưh pă đei ŭnh hnam dơnuh hin, vă jê̆ dơnuh hin athei hơrih lơ̆m hnam pơm pơgia hiăh hiot. Lơ̆m dôm sơnăm âu ki, mă đơ̆ng hlôi bơngơ̆t truh tun pran tơdrong jang ‘nâu, mă lei yua đơ̆ng mŭk drăm - tơpôl oei lơ mơmat tat, truh dang ei dêh char Kon Tum oei hloh 1.500 ŭnh hnam kăl kơ đei tơgŭm sut hnam pơgia, hnam hiăh hiot; lơ̆m noh đei hloh 1.000 ŭnh hnam kăl kơ man ‘nao vă jê̆ 500 ŭnh hnam kăl kơ pơm hơmet ming.

Pơma tơ̆ lêh tơlĕch jang, ƀok Lê Ngọc Tuấn, Kơdră Anih vei lăng kon pơlei dêh char Kon Tum tơbăt tơdrong hơgăt truh sơnăm 2025 đĭ đăng rim ŭnh hnam lơ̆m dêh char sơđơ̆ng hơnih oei ngăl. Tơ̆ lêh tơlĕch jang pơjei băl “Vang tơgŭm sut hnam pơm pơgia, hnam hiăh hiot” đơ̆ng dêh char Kon Tum, rim khŭl tơpôl, bơngai đei jơhngơ̆m đon ‘mêm mơnat hlôi kơtă tơgŭm hloh 500 triệu hlak jên păng chih măt tơgŭm akŏp kơ sô̆ jên hloh 3 ti hlak jên.