Lăp Kơdră chĕp pơgơ̆r Kuô̆k hô̆i Trần Thanh Mẫn truh, bơngai tăh hla păng kon pơlei tơring Nga My, apŭng Phú Bình, dêh char Thái Nguyên hlôi tơroi tơbăt găh tơdrong hiong răm đơ̆ng ‘mi kial hơbŭt hơbông pơrăm păng pơma tơbăt jơhngơ̆m đon hơpơi ‘meh vă đei tơgŭm djru. “Kon pơlei Thái Nguyên pơma atŭm hăm kon pơlei Nga My pơma hơdrô̆ hơpơi ‘meh vă đei tơdrong tơgŭm djru vă kon pơlei yak hloh tơdrong hiong răm ou. Nhôn đei dôm yơ chŭn na, đei tŏ sĕt hiong tŏ sĕt, đei lơ hiong lơ, pă đei yă kiơ vă kĕch yoă bơih”.

          Ƀrơ̆k mơnat tơ̆ hơnăp tơdrong hiong răm đơ̆ng ‘mi kial hơbŭt hơbông pơrăm hnam oei, mŭk drăm păng chŭn na ƀa đak kon pơlei, Kơdră chĕp pơgơ̆r Kuô̆k hô̆i Trần Thanh Mẫn hơlêm păng sơkơ̆t hơdăh trong bơ̆ jang đơ̆ng Đảng păng Teh đak ling lang lăng ba truh tơdrong hơrih sa kơ kon pơlei.“Ih pă tơtăm yă kiơ bơih hơ mŏ hơ, Đảng păng Teh đak, Măt trân khul jang, rim hơnih bơ̆ jang jĭ ling lang lăng ba kơjăp truh tơdrong hơrih sa kơ kon pơlei, mă kăl dôm bơngai tơnap tap đơ̆ng rŏng kial hơbŭt kơsô̆ 3, pơm pơrăm găh hnam  mŭk drăm păng ‘long pơtăm kon pơlei. Pơm lơ liơ trong bơ̆ jang đơ̆ng Đảng, Teh đak hăm tơring ‘noh kăl tơtom pơm sơđơ̆ng hơrih sa ăn kon pơlei”.

Năm pơma dơnuh apĭnh jet gia hloi hăm kon pơlei oei tơ̆ tơring Nga My, tơring tŏk bŏk oei răm đak lip, Kơdră chĕp pơgơ̆r Kuô̆k hô̆i Trần Thanh Mẫn hlôi pôk ăn 200 tơnô̆ tơmam drăm ăn rim ŭnh hnam răm đơ̆ng kial hơbŭt kơsô̆ 3 păng ‘mi kial hơbŭt hơbông pơm ăn. Pôk ăn tơmam drăm păng apĭnh jet gia khul ƀô̆ đô̆i kŏng ang tơ̆ tơring Nga My, Kơdră chĕp pơgơ̆r Kuô̆k hô̆i pơma:“Ba jei ƀôh, jei băt dôm tơdrong jang kơ kang ƀô̆ ƀô̆ đô̆i kŏng ang tôch gleh hrat, tơgŭm djru ăn kon pơlei tơ̆ ou vă hơmet pơ ‘lơ̆ng đơ̆ng kial hơbŭt kơsô̆ 3 pơrăm. Mă kăl mưh đak tŏk kơtang, bơ̆n kăl yông hloi rim ŭnh hnam kon pơlei năm oei tơ̆ hơnih sơđơ̆ng. Dang ei ĭnh jei băt 100% kon pơlei hlôi brŏk vih tơ̆ hnam. Bơ̆n kăl hơdrin tơgŭm djru pơm sơđơ̆ng hơrih sa ăn kon pơlei, mă kăl tơgŭm ăn kon pơlei chă hium rơgoh pơ ‘lơ̆ng cham char”.

Tơroi tơbăt ăn Kơdră chĕp pơgơ̆r Kuô̆k hô̆i Trần Thanh Mẫn, Ƀĭ thư Đảng dêh char Thái Nguyên Trịnh Việt Hùng tơbăt, hlôi đei 4 ‘nu bơngai lôch; tơchĕng lăng hiong răm đơ̆ng kial hơbŭt hơbông pơrăm ou truh 300 ti hlak jên; hloh 25.000 ŭnh hnam măh yông oei tơ̆ hơnih anai hloi. Găh choh jang sa hiong răm hloh 10.000ha. hăm dôm tơring đak lip kơtang, lăp đơ̆ng rŏng đak och rŏ năng gô pơm đei tơdrong ‘mê̆ ‘mach kơtang, hơmơt đei pơrang jĭ kơtang.

Iung pơma tơ̆ jơ bơ̆ jang, Kơdră chĕp pơgơ̆r Kuô̆k hô̆i Trần Thanh Mẫn tơbăt, tơ̆ hơnăp tơdrong hiong răm kơtang đơ̆ng kial hơbŭt kơsô̆ 3 pơm ăn, Tổng bí thư, Kơdră chĕp pơgơ̆r Teh đak Tô Lâm hlôi đei nơ̆r krao hơvơn kon pơlei, kang ƀô̆, ƀô̆ đô̆i, kŏng ang lơ̆m teh đak akŏm vang hơmet pơ ‘lơ̆ng đơ̆ng ‘mi kial hơbŭt hơbông pơrăm tơ̆ rim dêh char găh Tu păng Hơnih tơm Hà Nội.

Kơdră chĕp pơgơ̆r Kuô̆k hô̆i jei athei dêh char Thái Nguyên kăl iung jang dăr lăng ŭnh hơyuh, đak sŏ nhă ăn kon pơlei; tơdrong hơmet pơ ‘lơ̆ng cham char kăl sơđơ̆ng ăn tơdrong jang tang găn pơrang jĭ pơrăm. Găh tơdrong ou, Kơdră chĕp pơgơ̆r Kuô̆k hô̆i lăng kơjăp truh tơdrong hơnih jang pơgang kăl iung jang kơtang hloh vă pơm sơđơ̆ng jơhngơ̆m pran jăng grăng akou kơ kon pơlei, ming hơmet rim hnam trương hŏk vă sơđơ̆ng ăn đĭ đăng đe hơ ioh hŏk tro jei đei năm tơ̆ hnam trương; sơđơ̆ng dơ̆ng kơjăp, sơđơ̆ng chinh trĭ, sơđơ̆ng tơpôl.“Ĭnh hơpơi lơ lou, hăm jơhngơ̆m đon ‘mêm kơ eng dih băl “hla ‘lơ̆ng glơng ba hla hiăh”, tơgum djru, tơgoăt tơgoăl dih băl lơ̆m jơ ‘năr ou ‘noh kăl hloh, bơ̆n kăl chă pơrô̆ hơvơn lơ̆m dêh char păng dêh char anai vă đei kon jên hơmet ming đơ̆ng ‘mi kial hơbŭt kơsô̆ 3 pơm ăn kiơ̆ trong jĭ hơtŏ hơnơ̆ng, ưh kơ lê̆ đei tơdrong ou to lơ̆m bơ̆ jang tơgŭm djru tang găn ‘mi kial hơbŭt hơbông pơrăm. Mĭnh ‘măng dơ̆ng, tang măt ăn Khul kơdră Đảng, teh đak, tang măt ăn khul bơ̆ jang, ĭnh hơpơi, pơtruh ăn khul kơdră Đảng, kơdră chĕp pơgơ̆r păng kon pơlei dêh char Thái Nguyên yak hloh tơnap tap, tơdrong long vă sơđơ̆ng hơrih sa ăn kon pơlei”.

Kơdră chĕp pơgơ̆r Kuô̆k hô̆i akhan, kial hơbŭt hlôi yak hloh, druh kiơ̆ đơ̆ng rŏng ‘noh jĭ đak lip păng mưh đak lip och, dôm tơdrong hăp pơm ăn jĭ tôch kơtang, ‘noh jĭ trong nơnăm hư răm kơtang; hnam oei kon pơlei, hnam trương hŏk kăl ming hơmet, ming man dơ̆ng; cham char ‘mê̆ ‘mach. Vă hơmet pơ ‘lơ̆ng đơ̆ng kial hơbŭt kơsô̆ 3 pơm ăn, Kơdră chĕp pơgơ̆r Kuô̆k hô̆i athei, pơđĭ khul chinh trĭ kơ dêh char Thái Nguyên, đơ̆ng Hơnih Đảng dêh char, Jơnŭm vei lăng kon pơlei dêh char, Hơnih vei lăng kon pơlei, Măt trân Tổ quốc Việt Nam, rim khul jang, rim hơnih bơ̆ jang kăl hrơ̆p vang iung jang hơmet ming, ưh kơ gơ̆h chă lăng pơhơi.