Kiơ̆ đơ̆ng yă Nông Thị Thu, Kơ iĕng Kơdră chĕp pơgơ̆r Hơnih bơ̆ jang Mặt trận Tổ quốc Việt Nam dêh char Dak Lăk, dôm năr ou ki, hăm jơhngŏm đon tơgŭm djru dih băl “Hla ‘lơ̆ng glơng ba hla hiăh” hlôi lang să jơ̆p tơring tơrang pơlei pơla lơ̆m dêh char. Đơ̆ng đe hơ ioh teh nhŭng lân, rim đe kră iŏk kon jên pơkom vă tơgum djru ăn kon pơlei tơring ‘mi kial pơrăm. Jô̆ truh dang ei, Mặt trận Tổ quốc Việt Nam dêh char Dak Lăk hlôi sơng iŏk đei kon jên tơgum djru hloh 16 ti 300 triu hlak jên. Atŭm hăm ‘noh hlôi đei dang 50 khul gre đơ̆ng Dak Lăk chơ ba tơmam drăm năm truh rim dêh char găh Tu hăm kơjă kơjên hloh 9 ti hlak jên.