Hăm tơdrong bơngơ̆t truh đơ̆ng khŭl kơdră păng dôm bơngai đei jơhngơ̆m đon ‘mêm mơnat, tơdrong chơt hơiă Trung thu tŏk bŏk păr ang truh hơioh rim pơlei pơla tơ̆ Đắk Lắk. Lơ̆m jơ năr trung thu, hơioh Đắk Lắk đei dôm tơdrong jang hơdăh vang tơgŭm, lăng găh đe buăl ‘lơ̆p tơ̆ tơring ‘mi kial hơbŭt pơrăm. Tơ̆ pơlei tơm Buôn Ma Thuột, 1,2 hnam trưng hŏk jăl 1 hlôi pơdơh pơgơ̆r Tết Trung thu, ‘măn jên vă răt hla ar hŏk gơih ăn kơ đe buăl ‘lơ̆p dôm dêh char găh Tu. Tơdrong tơlĕch jang tơgŭm kon pơlei tŏk bŏk pŭ ƀơm kơ nê̆ đơ̆ng ‘mi kial hơbŭt kŭm păr ang lơ̆m rim hnam trưng hŏk.

Dôm tơpu tơmam, tơdrong tơgop đơ̆ng đe oh hơioh tơ̆ Đắk Lắk mă đơ̆ng ưh kơ lơ ră mă lei tơƀôh tơdrong vang tơgŭm lăng truh đe buăl tơring ‘mi kial hơbŭt pơrăm. ‘Nâu kŭm jing tơdrong jang ‘lơ̆ng hơiă, pơtho đe oh hơioh jơhngơ̆m đon tơgoăt tơgoăl, tơdrong joăt “Hla ‘lơ̆ng bơ̆ng hla hlăh” ‘lơ̆ng hơiă đơ̆ng hơdrĕch hơdrŭng bơ̆n.