VOV4.Bahnar - Sơ̆ jĭ tơ ring kăn kư̆ tơ̆ tŏk bŏk tơ ring hơ yăt oei vei lăng, hơ nơ̆ng đei hơ yăt tơ blăh ƀa trui, tĕh dong, rôp phak lơ̆m khei ‘năr tơ blăh vang, dang ei um ai thôn 1, xăh Hòa Thuận, pơ lei tơm Buôn Ma Thuột, dêh char Dak Lak đei tơ plih ‘lơ̆ng hơ iă, pơ drŏng, đei ƀôh, hnam, trong man kơ jăp ‘lơ̆ng. Mă lơ̆m chăl rơ ngei dăh mă chăl tơ blăh, tơ drong tơ guăt 1 ƀơ̆r đon jang tŏk păng bơ̆ jang kăch mang oei hơ nơ̆ng đei kon pơ lei tơ̆ âu vei kơ jăp, tưk tơ iung 'lơ̆ng tơ̆ tơ ring tơ̆ tơ ring iung tơ blăh sơ̆ âu.

Hơ tăih kơ anih kơ drơ̆m pơ lei tơm Buôn Ma Thuột - hơ nih tŏk bŏk đei lăng ‘noh jĭ “ tơ ring ƀrê” jĭ hơ buh Covid-19, hloh 13km, mă lei truh  khei ‘năr âu, thôn 1 (vă khan thôn Kiên Cường hơ drol sơ̆), xăh Hòa Thuận, pơ lei tơm Buôn Ma Thuột, dêh char Dak Lak oei tŏk bŏk jing “ tơ ring jơk” tam mă đei bơ ngai hơ yơ jĭ Covid-19. Ƀok Bồ Xuân Thanh, Phŏ Bí thư Chi bộ thôn 1 tơ roi, gơ nang đơ̆ng tơ drong 1 jơ hngơ̆m đon păng hlôh vao đơ̆ng rim kon pơ lei, dôm trong jang tang găn jĭ tă kơ đei jang kiơ̆ 1 trong tơ păt.

            Thôn ‘noh jĭ tơ ring oei hơ drô̆ kơ na tơ drong tơ roi tơ băt krao hơ vơn kon pơ lei jang kiơ̆ ‘lơ̆ng dôm tơ drong tơ chơ̆t, trong jang đơ̆ng kơ dră kơ pal ‘noh tôch kơ ‘lơ̆ng. Rim kon pơ lei pơm kiơ̆ tơ drong tơ chơ̆t 15 dăh mă 16 đơ̆ng Khŭl kơ dră teh đak ‘noh adoi tơ păt ngăl. Kon oh tơ̆ tơ ring nai brŏk, nhen Sài Gòn, Đà Nẵng ‘noh kŭm tơ tom tơ roi tơ băt hăm hnam pơ gang xăh vă pơ klep kơ ƀlang ăn oei hơ drô̆ tơ̆ hnam.

100% trong nơ năm lơ̆m pơ lei, trong vih vơ̆t tơ̆ plei nai tơ̆ thôn Kiên Cường hrei ‘nâu tă kơ đei pơm hăm ƀe tŏng, nhươ̆ ‘lơ̆ng ngăl

            Jơ hngơ̆m đon tơ goăt tơ goăl, ‘mêm kơ eng băl đơ̆ng kon pơ lei thôn Kiên Cường hlôi jing tơ drong joăt joe, đei pơ hrăm kiơ̆ dôm khei sơ năm tơ blah vang krưp krĕnh sơ̆. Yă Võ Thị Hường, bơ ngai jang hrĕp vei lăng sơ đơ̆ng, bơ ngai tơ klep hăm tơ ring teh âu ƀlŏk dơ̆ng, đơ̆ng sơ năm 1961, ŭnh hnam yă ‘noh jĭ 1 lơ̆m kơ sô̆ 105 ŭnh hnam kon pơ lei găh đe jâu đei ƀôm truh kach mang đei ayăt ba đơ̆ng dêh char Quảng Nam năm tơ̆ âu oei sa vă ƀônh kơ vei lăng. Ƀơ̆t doh sơ̆ lăp kăl đei đe jâu tŏ sĕt ‘noh đe sư pơm tôm trong vă rôp, teh dong. Truh sơ năm 1975, ƀơ̆t rơ ngei Buôn Ma Thuột, lơ̆m pơ lei lăp oei pă 38 ŭnh hnam oei kơ tă. ‘Nâu jĭ dôm ŭnh hnam nŭih mơng, 1 jơ hngơ̆m đon kiơ̆ kach mang. Hnam hơ yơ kŭm đei bơ ngai năm jang pơ ma dơ nuh, asong phe sŏng, tơ mam sa dăh mă tơ roi tơ drong kơ tơ̆ng ang ăn anih jang kach mang. Lơ bơ ngai hlôi plang hơ kâu, lơ̆m noh đei hloi klo yă Hường - linh lôch dŏng teh đak Trần Lang, kang ƀộ Kinh tài H6. Yă Võ Thị Hường tơ roi, lơ̆m tơ blăh vang, mă đơ̆ng đei ơh sơ ‘ngon, hiong hơ kâu, đĭ đăng adoi jing 1 jơ hngơ̆m hơ drin “ vei hla kơ” vei rim tơ ƀôt teh tơ ring kăn kư̆.

            Đĭ đăng vei hla kơ, ayăt tŏk ‘noh nhôn teh, sư prăh hiăh hla kơ nhôn hơ tol hla kơ nai dơ̆ng. Sư teh hŭt tơ mam kiơ ‘noh nhôn oei năm lĕch đang kơ ‘noh ôn năm trong hơ yơ vă tơ roi tơ băt mă đei ayăt năm trong hơ yơ, băt hơ dăh tơ drong ‘noh jĭ tơ roi vă găh bơ̆n hơ met ăn tơ blăh. Păh bơ̆n iung tơ blăh hăm ayăt vei rim tơ ƀôt teh tơ ring nhôn kơ na ayăt ưh kơ gơh iŏk. Kon pơ lei bơ̆n ưh chu pơm đĭch đam, ưh kơ chu hiong teh đak, đei plang hơ kâu lôch đơ̆ng dôm bơ ngai linh ‘mơ̆i mă đei đăi năr ‘nâu phĭ dơ nŏ hiôk hian.

            Dôm tơ drong plang hơ kâu ơh sơ ‘ngon đei kon pơ lei pơ jing jing jơ hngơ̆m pran, kơ tang vei kơ jăp tơ gŭm kach mang, rong ôn ƀô̆ đô̆i. Yua thoi noh, mă đơ̆ng lăp oei pă 38 ŭnh hnam kon pơ lei oei kơ tă truh năr rơ ngei ră mă lei pơ lei đei truh 39 ‘nu linh lôch dŏng teh đak, 6 ‘nu mĕ Việt Nam nuih mơng, 10 ‘nu linh jĭ rơ ka. Đei ƀă păng ‘nhŏng sư ‘noh jĭ linh lôch dŏng teh đak kơ na ƀok Võ Tấn An lăng ƀôh tơ drong ơh sơ ‘ngon păng hiong răm mă tơ blăh pơm ăn. Ƀok ƀlŏk dơ̆ng sơ năm oei ‘lơ̆p kơ sư sơ̆.

            Sơ̆ tơ blăh vang 1 hnam 1 hơ lŭng, kơ tơ̆ng phao đôh ‘noh mơ̆t lơ̆m hơ lŭng đĭ, năm hŏk ‘noh kŭm hŏk hăi loh đĕch mă ưh kơ đei nhen dang ei ôh. Teh đak bơ̆n đei rơ ngei, kon pơ lei bơ̆n đei arih hiôk hian ‘noh ƀôh chhôk ‘nă koh. Trong nơ năm dang ei kŭm ‘lơ̆ng bơ̆ih, tơ mam tôm, gre hao kŭm tôm đĭ.

Hnam soi kơ linh lôch dŏng teh đak - hơ nih chih hơ năn 39 ‘nu linh lôch dŏng teh đak kơ thôn Kiên Cường lôch lơ̆m khei ‘năr tơ blang vang sơ̆

            Tơ blăh vang đĭ đunh hloh 46 sơ năm, thôn Kiên Cường dang ei hlôi hơ nhăk um ai ‘nao. 38 ŭnh hnam kon pơ lei oei kơ tă, dang ei ‘noh hlôi hơ tŏk tơ iung 365 ŭnh hnam hăm 1.653 ‘nu bơ ngai. Hơ tŏk jơ hngơ̆m đon tơ goăt tơ goăl, kon pơ lei lơ̆m pơ lei ‘noh tơ gŭm băl hơ tŏk tơ iung mŭk drăm, hơ tŏk jang sa. Vă jê̆ 1/3 kơ sô̆ ŭnh hnam lơ̆m pơ lei găh ŭnh hnam pơ drŏng, ŭnh hnam đei ƀôh, păng lăp oei pă 1 ŭnh hnam dơ nuh hin. Um ai tơ ring tơ rang kŭmtơ plih ‘lơ̆ng ƀơ̆t đĭ đăng trong nơ năm lơ̆m pơ lei păng trong vih vơ̆t tơ̆ plei nai tă kơ đei pơm ƀê tŏng păng nhươ̆ ngăl. Kiơ̆ kơ yă Nguyễn Thị Hương, Phŏ kơ dră Anih vei lăng kon pơ lei xăh Hòa Thuận, thôn Kiên Cường hlôi đei lơ tơ gop ‘lơ̆ng kŭm hăm khŭl kơ dră tơ ring pơ jing tơ ring tơ rang ‘nao ‘lơ̆ng rŏ. ‘Nâu jĭ 1 lơ̆m dôm pơ lei mă blŭng kơ dêh char jang đei 15/15 tơ drong hơ găt lơ̆m pơ jing tơ ring tơ rang ‘nao.

            Hơ tŏk jơ hngơ̆m đon đơ̆ng kon pơ lei vang jang hăm khŭl kơ dră tơ ring lơ̆m tơ drong jang tơm găh pơ jing tơ ring tơ rang ‘nao đơ̆ng xăh. 15 tơ drong hơ găt kơ pơ lei tă kơ jang đei ngăl, truh sơ năm 2014 ‘noh xăh Hòa Thuận hlôi đei drơ̆ng găh tơ ring tơ rang ‘nao mă blŭng kơ dêh char, truh sơ năm 2020 đei drơ̆ng xăh tơ ring tơ rang ‘nao ‘lơ̆ng rŏ ‘noh lơ̆m noh đei tơ drong tơ gop đơ̆ng thôn 1. Đơ̆ng kơ dră đảng, chi bộ, khŭl vei lăng kơ dih kơ pơ lei ding truh rim khŭl grŭp kŭm nhen kon pơ lei tơ ring hơ nơ̆ng vang hơ dai hăm khŭl kơ dră tơ ring pơ jing xăh Hòa Thuận roi ‘năr roi hơ tŏk tơ iung hloh, hơ drin truh sơ năm 2022 tŏk bŏk pơ jing tơ ring tơ rang ‘nao ‘lơ̆ng rŏ.

            Pơ tôch lê̆ dôm tơ drong ơh sơ ‘ngon hiong răm yua đơ̆ng tơ blăh vang, kon pơ lei thôn Kiên Cường, xăh Hòa Thuận tŏk bŏk hơ nơ̆ng hơ drin vang jang sa, hơ tŏk tơ iung mŭk drăm, vei kơ jăp tơ drong sơ đơ̆ng chinh trĭ, hơ drin pơ jing pơ lei, xăh tơ ring tơ rang ‘nao ‘lơ̆ng rŏ.

 H’Xíu H’Mốc: Chih

Thuem: Tơ blơ̆