VOV4.Bahnar - Đơ̆ng rŏng 5 sơ năm jang đang tơ ring tơ rang ‘nao, xăh Đạ Kho, apŭng Đạ Tẻh, dêh char Lâm Đồng hlôi tơ plih ‘lơ̆ng tơ pă. Mŭk drăm hơ nơ̆ng tŏk lơ, 1,2 tơ drong jang đei pơ jing păng hơ nhăk ăn iŏk yua lơ... Dôm jăl trong man rơ goh ‘lơ̆ng đei pơm hơ iă hăm kơ mâu pơ kao, hla 2 păh jih trong. Hnam hŏk hôp, hnam trưng, hơ nih ngôi pơ hiơ̆ ‘lơ̆ng hlôi păng tŏk bŏk đei ming man... Dôm tơ drong ‘noh sư pơm đei um ai tơ ring tơ rang ‘nao ‘lơ̆ng rŏ tơ̆ tơ ring năm mơ̆t kơ apŭng Đạ Tẻh, dêh char Lâm Đồng.

            Nhôn đei măt tơ̆ xăh Đạ Kho, vă jê̆ ‘năr dơ̆ng, kon pơ lei rim Thôn 5, 6 oei nŏng kơ jang. Đei bơ ngai pơm hơ met rơ goh, đei grŭp jang ming man lơ̆m pơ lei ‘noh tŏk bŏk hăt kơ hrâu xi măng, man hơ nă... vă pơm cham ngôi pơ hiơ̆ iĕ tơ̆ hnam hŏk hôp pơ lei. Tŏk bŏk ‘năr dơ̆ng tŏ, tơ drong jang ‘noh kŭm đei gleh lăp mă lei hăm đon tơ chĕng chhôk ‘nă, lăp đon ƀơ̆t kon pơ lei lơ̆m pơ lei vă jê̆ đei dơ̆ng 1 hơ nih ngôi tơ pôl rơ goh ‘lơ̆ng vă hŏk hôp kơ na kon pơ lei oei hơ drin jang đĭ tơ drong đơ̆ng kơ dih.

            Ƀlŏk dơ̆ng dôm năr blŭng pơ tơm jang pơ jing tơ ring tơ rang ‘nao, yă Nguyễn Thị Hiền, Bí thư Chi bộ Thôn 6, xăh Đạ Kho chhôk hơ iă tơ roi: Tơ̆ khei ‘năr tơ lĕch jang tơ drong jang pơ jing tơ ring tơ rang ‘nao, xăh Đạ Kho hlôi tơ ƀơ̆p lơ mơ mat tat, oei hơ drô̆ Thôn 6 ‘noh đei jang blŭng tôch kơ mơ mat lơ̆m xăh. Mă lei, dang ei 2 păh trong xăh, pơ lei, kueng ƀôt, dôm hnam kem săng sa, tơ khyor tơ khyônh năr yơ dang ei đei tơ plih hăm dôm hnam tơ̆ng ‘lơ̆ng rŏ. Dôm trong tŏ ‘mui, ‘mi dơ̆k đĭ pă đei, tơ plih lơ̆m ‘noh dang ei hlôi pơm man đĭ, trong rơ goh ‘lơ̆ng, pơ kao chôh 4 pơ yan.

            Iŏk đơ̆ng jang kiơ̆ tơ drong jang pơ jing tơ ring tơ rang ‘nao, khŭl kơ dră xăh hlôi athei, tơ roi tơ băt, tơ lĕch jang lơ trong jang truh tơ̆ rim pơ lei găh vei lăng cham char... Ƀôh hơ dăh đei jang tơ năp lơ̆m vei lăng cham char pơ ma hơ drô̆, kon pơ lei hlôi hơ drin vang jang lơ tơ drong jang hơ dăh ‘lơ̆ng vă hơ tŏk tơ iung cham char rơ goh ‘lơ̆ng hơ iă. Lơ ŭnh hnam kon pơ lei lơ̆m pơ lei hlôi hơ met ming pơ gar, pơ tăm ‘long đei kơ jă mŭk drăm, ‘long pơm yơ̆p vei lăng cham char. Rim khŭl tơ pôl kơ pơ lei oei jang hơ dai pơ gơ̆r lơ lăm  pơ tho tơ drong hlôh vao pơm rơ goh cham char, chă hơ len lăng tơ drong pơ răm đơ̆ng râm răk.

            Ƀok Nguyễn Trọng Hiệp, Phŏ Bí thư Đảng xăh Đạ Kho tơ băt: Đơ̆ng rŏng 5 sơ năm tơ lĕch jang, tơ drong jang tơ ring tơ rang ‘nao hơ tŏk ‘lơ̆ng hlôi jing tơ drong jang đei pơ đĭ khŭl jang chĭnh trĭ păng lơ̆m tơ pôl, mă loi ‘noh jĭ kon pơ lei lơ̆m xăh lăp đon vang tơ gŭm. Kon pơ lei hlôi hơ tŏk đei hơ năp jang tơm lơ̆m pơ jing tơ ring tơ rang ‘nao nhen: Vang jang ming man anih jang kăl kiơ̆ trong jang “ Kon pơ lei jang, teh đak tơ gŭm tơ mam”; vang jang pơ keh dôm tơ drong hơ găt xăh tơ ring tơ rang ‘nao hơ tŏk ‘lơ̆ng, mă loi ‘noh jĭ tơ drong hơ găt cham char.

            Vă jang kiơ̆ tơ drong hơ găt cham char hơ tŏk ‘lơ̆ng, anih jang Đảng xăh Đạ Kho hlôi pơ gơ̆r ăn rim anih jang, khŭl tơ pôl chĭnh trĭ athei pơ jing tŏ sĕt hloh 1 tơ drong jang pơm cham char ‘lơ̆ng rŏ. Anih vei lăng kon pơ lei xăh oei pơ jing trong tơ lĕch jang tơ roi tơ băt, krao hơ vơn kon pơ lei ‘noh jĭ bơ ngai jang găh cham char ‘moi kiơ̆ rim tơ drong jang yua đơ̆ng xăh, pơ lei tơ lĕch jang. Kiơ̆ đơ̆ng noh, khŏm khŏm rim kang ƀô̆, kon pơ lei hlôi pơ jing tơ drong joăt lơ̆m tơ drong pơ vei rơ goh atŭm lơ̆m hnam, trong pơ lei.

            Hơ drô̆, Jơ nŭm vei lăng kon pơ lei jang chŭn mir xăh Đạ K’ho tŏk bŏk đei 2 tơ drong jang vei lăng cham char ‘noh đei tơ drong jang iŏk akŏm tơ pu, kơ đoh pơ gang pơ lôch hơ drông păng tơ drong jang tơ plih râm rĕk jing jên;  tơ drong jang trong pơ kao yua đơ̆ng Khŭl drŏ kăn xăh bơ̆ jang; tơ drong jang trong vei lăng kơ dih đơ̆ng Đoàn hơ druh tơ dăm xăh hăm kơ jung 7 km găh trong lơ̆m lơ pơ lei. Rim tơ drong jang âu hlôi sơng đei 4.500 ‘nu bơ ngai vang jang. ‘Ngoăih kơ ‘noh, Mặt trận Tổ quốc păng rim khŭl grŭp xăh Đạ Kho oei hơ nơ̆ng tơ roi tơ băt, krao hơ vơn bơ ngai jang lơ̆m khŭl păng kon pơ lei vang jang rim tơ drong jang pơm rơ goh cham char ‘moi kiơ̆ rim tơ drong jang krao hơ vơn kon pơ lei hơ gei nhen: Ŭnh hnam 5 ư̆h, 3 rơ goh; pơ jing trong ư̆h kơ đei râm rĕk; trong pơ kao rơ goh ‘lơ̆ng rŏ....

            Gơ nang đơ̆ng noh, truh khei ‘năr dang ei, lơ̆m xăh hlôi đei hloh 50% kơ sô̆ trong xăh, pơ lei đei hơ bong pơ ro đak păng đei pơ tăm ‘long pơm yơ̆p dăh mă pơ tăm pơ kao, ‘long pơ rŏ lơ̆m trong. Hloh 85% kơ sô̆ ŭnh hnam vei rong kon tơ rong lơ̆m tơ ring đei hơ drong rong ‘lơ̆ng rơ goh; đĭ đăng anih pơm tơ lĕch tĕch mơ dro lơ̆m xăh pơm kiơ̆ hơ met ‘lơ̆ng râm rĕk, đak ‘mê̆ ‘mach. Râm rĕk đơ̆ng oei sa, râm rĕk hơ răng lơ̆m chŏh jang sa đei ƀôh lơ̆m tơ ring hlôi đei iŏk akŏm tơ̆ hơ nih pơm tơ lĕch păng hơ met ‘lơ̆ng ƀlep tơ drong hơ găt.

            Ƀok Nguyễn Trọng Hiệp, Phŏ Bí thư Đảng xăh Đạ Kho pơ ma hơ dăh:

“Vă tơ drong vei lăng cham char bơ̆ jang ‘lơ̆ng hloh dơ̆ng dơ̆ng, tơ̆ hơ năp kơnh, Đạ Kho hơ nơ̆ng pơ vei tơ drong jang pơm rơ goh cham char lơ̆m tơ ring mă hơ nơ̆ng. Hơ dai hăm ‘noh tŭn pran tơ roi tơ băt vă kơ kon pơ lei hlôh hơ dăh păng jang kiơ̆ tơ păt pơm rơ goh cham char lơ̆m oei sa, vei rong kon tơ rong, hơ nih tơ pôl. Pơ vei ‘lơ̆ng tơ drong jang pơm rơ goh lơ̆m năr pơ̆h rim giĕng tơ̆ rim pơ lei, hnam trưng, kơ chơ....”.

 Thuem: Tơ blơ̆