Meng bruk ba tangin tame ngak di abih gah, bruk jum pataom gauk, njauk hatai, pachreih tui di bol bhap rahra, di doanh nghiệp, bruk pacang caga jit di taneh ia drei hu dom siam lagaih. Tal urak ini, jaik abih dom tỉnh, ban jeng daok khik hu dom bruk sản xuất, pablei salih di dom labik pabak hu bruk pacang jit, patakik klaih klaoh bruk ngak tabiak pandap, pabak pandap saong hu rilo siam mekre dalam tani tanat raidiuk bhap bini. TS Nguyễn Minh Phong hu kadha vak angaok blah web di Rajaei ka dom jak jeng praong di taneh ia drei dalam thun blaoh saong bruk pasiam veik yaok gah dalam bruk KTXH thun 2022:

Tui Sở Y tế ban raya Hồ Chí Minh, dalam thun 2020 hu 597 urang jakar y tế likau padeih bruk saong dalam 10 bilan thun 2021 hu tal 968 urang tra padeih bruk. Dalam nan rilo meng lac điều dưỡng, bác sỹ saong dom urang ngak bruk di balai y tế likau padeih kayua hu bruk sang. Rilo urang y tế, abih di nyu lac dom urang daok ngak bruk di labik y tế gah ala brei thau lac drei daok gaok trak damak bruk ngak biak prong, abih di nyu lac dalam dom mbang tabung glaong pacang cakak jit COVID-19, dalam tuk nan jien bilan oh samu haong pren buh tabiak. Anak bruk yau nan, ban raya Hồ Chí Minh hu ngak hagait piah khik takai saong dui pachreih dom urang jakar y tế gah ala? Kadha vak di Thu Hương – Xuân Anh angaok báo điện tử di Thông tấn xã Việt Nam hu ndom tal bruk ini:

Pathau mikva saong taong abih gauk! Pataom tame tabung glaong pathau khan meng di tuk peih tabiak, bruk “Abih bhap bini hu mbaok tame pacang caga jit COVID-19 saong tabiak, tame negar suan hukum” piah paglaong akaok sahneng, tacei tabiak cambaih bruk njauk ngak di yaok menuac urang anak bala praong di jit Covid-19; bộ đội biên phòng hu ieu pataom prein khang bhap bini tame pacang caga jit saong tabiak, tame negar suan hukum, rik daong pacang cakak oh caik ka jit ruak njaom mbak meng gah lingiu tame taneh ia saong pambak tabiak dalam bhap bini.

Yaom lac jit ruak Covid-19 rah tabiak khang ngan haong manuac njauk ruak di mbang jit ka 4 tagok tal labaih 290.000 urang (kuhria tal harei 27-12), tỉnh Bình Dương jeng daok khik hu tanut patagok biak siam, daok lac labik hadah di bhum Đông Nam bộ saong dalam negar ka bruk dui pachreih urang buh jien tame ngak mbang. Piah hu siam mekre yau nan, Bình Dương oh padeih pasiam veik bruk đầu tư saong dui pachreih urang meng rilo jalan ngak. Kadha vak di Văn Phong angaok báo SGGP hu pok meyaom bruk ngak hu dalam dui pachreih urang negar langiu buh jien tame ngak mbang di Bình Dương:

Tui pasang iek di Uỷ ban Bangsa, dom baoh sang kathaot bhum bangsa takik di bhum ceik, glaong jang 2 mbang meteh dut haong kuhria rah tapa dalam negar. Jien mek tame di bhap bani bangsa takik jeng tok samu 1/3 dut haong jien mek tame kuhria rah tapa dalam negar. Kadha vak hadei ini di Urang vak di Rayo Sap ndom VN brei thau sa dalam dom jalan ngak hu ba tabiak piah pasiam dom kan kandah di bhum urang bangsa takik, nan lac bruk khik ginup pren peih ngak dom sarak buh jien tame ka bhum bangsa:

Dalam tỉnh Kon Tum urak ini hu labaih 360.000 ha glai pabak brei gah dịch vụ môi trường glai; dalam nan, jaik 45.000 ha hu jao brei ka 3.612 baoh sang saong 22 kapul rah ra di labik daok mong iek pacang khik. Daok veik nan hu jao ka dom Công ty ngak glai, Ban khik iek glai đặc dụng, glai pacang caga saong UBND dom xã, ban sit khik iek pacang caga. Sarak Bayar jien dịch vụ môi trường glai patagok hu dom siam lagaih dalam bruk pacang khik glai khang kajap yau habar? Panuac javap jaleiy hu dalam kadha vak hadei di ini. Daa mikva saong taong abih gauk tui pang:

Pathau mikva saong taong abih gauk! Dom harei ini, angaok dom mblang hamu di phường Văn Hải, Phước Mỹ (ban sit Phan Rang – Tháp Chàm) saong xã Nhơn Hải, Vĩnh Hải (huyện Ninh Hải), tỉnh Ninh Thuận, urang nong daok jan van trun pajaih dom janih njam patam, baoh karaoh piah pablei Tết. Yaom lac langik tasik oh siam laghaih saong yaom kaom khak drak phun pajaih tagok glaong, min urang pala njam patam di Ninh Thuận thei jeng caong mong njam patam pala njauk saong pablei hu yaom piah hu jien mbang Tết ka nyu trei sil. Kadha vak di Jasi – urang vak di rayo sap ndom VN daok di TP.HCM.

Urak ini di rilo tinh, ban, bhap bini bangsa takik thau patagok dom yaom glaong ilamo pambuak haong cak rok patagok kinh tế, rik daong tame bruk padang ngak palei pala bahrau saong bruk patagok di dom tinh, ban. Anak tal, tuk Danak dak bruk ngak pakat negar cak rok patagok kinh tế xã hội bhum bangsa takik saong bhum ciek tukvak 2021 – 2030 hu peih tabiak ngak, ye bruk khik ramik ilamo pambuak haong patagok kinh tế meda ba mai dom salih bahrau biak siam.

Peih tabiak ngak di akaok bilan 7/2021 - lac tuk jit COVID-19 mbang ka 4 tamuh tabiak khang, Sarak 68 di Rajaei ka dom sarak daong urang ngak ngan haong yaom jien 26 ribau tỷ đồng piah daong ka urang ngak saong urang pandar manuac ngak gaok kan kandah kayua jit praong COVID-19 hu makna biak praong, bak hatai anit ranam. Sarak ini hu brei mboh jalan diukrai siam gheih “Sa candaih tuk eik samu sa paok tuk trei”. Kadha vak di urang vak di rayo sap ndem VN hu brei thau ka dom siam lagaih di sarak ini.

Meng bhum taneh dang tagok mesruh pacang khamang dahlau daih, hu bruk daong prein di tapon nyaom bol pan phao kraong Quân khu 7, Bình Hòa Nam harei ini daok salih bahrau tapa yaok harei, raidiuk di bhap bini dak harei dak tagok, jeng labik hadah ka padang ngak palei pala bahrau di bhum taneh tapen negar huyện Đức Huệ, tỉnh Long An. Tapa nan brei mboh cambaih ka bruk dak padang thế trận lòng dân dak harei dak khang kajap angaok bhum taneh mesruh metak dahlau daih di tapon nyaom bol pan phao kraong QK 7. Di tuk pahadar 77 thun Harei padang Bol bala Bhap bini Việt Nam (22/12/1944 - 22/12/2021) saong 32 thun harei Quốc phòng abih bhap bini, da-a mikva saong taong abih gauk pang kadha vak di Thu Cúc saong Tuấn Anh, brei thau bruk dak padang thế trận lòng dân dak harei dak khang kajap angaok bhum taneh mesruh metak Bình Hòa Nam, huyện Đức Huệ, tỉnh Long An- bhum taneh kak kajap haong bruk tabiak rai di tapon nyaom bol pan phao kraong Quân khu 7.