VOV4.Sêdang - Kơxê lơ 25/3, a Tíu pêi cheăng Chin phuh, pôa Nguyễn Xuân Phúc, Ngế pro xiâm hnê ngăn tơnêi têa pơkuâ roh trâm mâ mơgêi hneăng cheăng Chin phuh hneăng 2016 – 2021. Xông tơpui a roh trâm mâ, pôa Nguyễn Xuân Phúc tối rơdêi, 5 hơnăm hiăng hluâ cho hneăng cheăng pêng păm tơdroăng ki rơrêk tung hiâm mơno, cho mâu khế hơnăm ki pâ vế ƀă Ngế pro xiâm hnê ngăn Chin phuh ƀă mâu kăn tung Chin phuh.

Chin phuh hiăng môi tuăn, rơtế dêi pó tơkâ hluâ hên pơloăng mơnúa. Mâu kăn tung Chin phuh phiu ro hiăng mơ-eăm tâi ivá tơná kum ăm tơnêi têa, kum ăm kuăn pơlê. Mơhno tơdroăng ki rơrêk ing tơdroăng ki khŏm mơ-eăm tơdjuôm ki mâu kăn tung Chin phuh kơbố xuân mơ-eăm pôu râng hnoăng cheăng tung 5 hơnăm hiăng hluâ, Ngế pro xiâm hnê ngăn tơnêi têa mơnê hên khât troh mâu kăn tung Chin phuh, mâu kơ koan ối tung Chin phuh đi đo rơtế, môi tuăn.

Ngế pro xiâm hnê ngăn tơnêi têa pêi kêi đeăng hnoăng cheăng Đảng, Tơnêi têa pơcháu. Ngế pro xiâm hnê ngăn tơnêi têa pói vâ mâu kăn tung Chin phuh, mơhé tung la ngiâ pôu râng hnoăng cheăng ki klâi lơ pơtê cheăng xua hơnăm hiăng krâ, xuân pơtối mơnhông hiâm mơno pêi tiô troăng kăch măng, kum ăm Đảng, ăm kuăn pơlê, ăm tơnêi têa, kum djâ tơnêi têa Việt Nam mơnhông tơtêk tŭm  tơdroăng.

A Sa Ly tơplôu ƀă tơbleăng