Hŏng drone HD580 yua kơ bruă lŏ hma mâo ênoh 364 êklăk prăk, mâo boh ktrŏ êbeh 70kg, dŭm hruê êgao, ayŏng Hoàng Văn Thiện (45 thŭn, să Ea Ô, čar Dak Lak) mă bruă krih êa drao kơ đang durian leh anăn kruĕ hruĕ. Ênhă pla mjing mơ̆ng gŏ sang ayŏng êbeh 10ha, kyuanăn drone anei dưi bi lar boh tŭ dưn. Ayŏng Thiện brei thâo:

“Grăp hruê kâo dlăng kriê đang kphê, kruê̆ hruê̆. Êngao kơ yua dreone kơ đang pla mjing gŏ sang, hlei mưm nao krih êa drao mdiê, kphê, durian, kruĕ hruê̆ mâo nao jih. Grăp hruê kâo dưi krih truh kơ dŭm pluh ha, prăk mưn mơ̆ng 3 - 4 êklăk prăk sa hruê. Mâo măi anei găl êdi, kriê dlăng đang pla mjing tŭ dưn, dưi lŏ mă bruă mưn, mđĭ hnư hrui wĭt, đru kơ klei hdĭp lu êdi.”

Ayŏng Đinh Văn Nguyên, dôk ti să Bờ Y, čar Quảng Ngãi brei thâo, gŏ sang mâo 3 ha durian. Yan ngă bruă mjêč, mnuih mă bruă kƀah, kyuanăn ñu blei êdeh phiơr amâo mâo pô mgăt. Yua mâo 1 mlan, ñu ƀuh klă boh tŭ dưn mơ̆ng kdrăp anei: mkiêt mkriêm ai mă bruă leh anăn êđăp ênang hĭn kơ gŏ sang:

“3 ha durian tơdah mưn arăng krih srăng 4 čô sa ha leh anăn 3 ha jing 12 čô, tơdah krih hŏng êdeh phiơr anei knŏng luč 2 - 3 mmông leh yơh. Yua êdeh anei dưi mkiêt mkriêm êa, hbâo pruê, ai mă bruă leh ană găl hĭn jing răng mgang klei suaih prăk kơ grăp čô.

Lăn Dap Kngư jing krĭng pla kphê, tiu, durian prŏng hĭn hlăm lăn čar hŏng hlăm brô 800.000ha, ka yap ôh dŭm êtuh êbâo ha boh kroh. Hluê si Trịnh Thị Vân, k’iăng khua Bruă sang čư̆ êa să Ea Knuêč (Dak Lak), să mâo êbeh 10.000ha lăn lŏ hma, mkrah wah jing durian. Hŏng boh dlông êbeh 10m hlăm wưng mboh, čiăng kơ dŭm pluh gưl kriê dlăng grăp thŭn, bruă yua dreone ƀrư̆ hruê ƀrư̆ lu.

“Să mkŏ mjing dŭm mmông bi hriăm, mtô kơ hdră mnêč čiăng kơ mnuih ƀuôn sang yua êdeh phiơr amâo mâo pô mgăt hlăm bruă lŏ hma msĕ si krih êa drao, pruê hbâo, rah mdiê hŏng klei tŭ dưn. Mbĭt anăn bi mguôp hŏng dŭm anôk bruă đru kčĕ hdră êlan, mtô kơ mnuih ƀuôn sang yua, bi klă krĭng phiơr. Êjai phiơr mnuih ƀuôn sang ăt hưn hŏng anôk bruă kriê dlăng čiăng kơ bruă dlăng kriê ana pla mjing mâo klei găl leh anăn êđăp ênang hĭn.”

Hlăm klei kƀĭn Bruă Kbĭn ala mrâo anei, pô bi ala Trần Thị Thu Phước (Quảng Ngãi) lač klă, drone ară anei amâo djŏ knŏng jing kdrăp yua bruă lŏ hma, ƀiădah lŏ jing mnơ̆ng yua đru dŏng hlăm klei truh yan aduê. Êjai êa lip truh, drone dưi đru dŏng mnuih ti krah êa êtăng, ba ao mlut, mnơ̆ng ƀơ̆ng, êa mnăm kơ phung mâo klei truh.

Anei jing klei bi klă kơ boh tŭ dưn ba yua klei kreh knhâo mrâo mrang hlăm klei hdĭp. Pô bi ala Trần Thị Thu Phước lač čiăng mkŏ mjing klei găl mkra mjing drone hlăm lăn čar đĭ kyar, bi mâo djăp klei čiăng ba yua:

“Knŭk kna čiăng mâo hdră êlan mtrŭt mđĭ čiăng kơ dŭm knơ̆ng bruă lăn lăn čar ksiêm duah, mkra mjing dŭm kdrăp yua mrâo mrang. Drei čiăng dŭm mnơ̆ng dhơ̆ng hlăm ênuk êđăp ênang jing kdrăp yua đru mđĭ kyar bruă lŏ hma, dŭ mdiăng, dăng kông, ƀiădah êjai mâo klei truh yan adiê amâodah bruă klam lĭng kahan dưi bi mlih mtam msĕ si êdeh phiơr amâo mâo pô mgăt.”

Ƀrư̆ hruê ƀrư̆ mâo lu ƀĭng ngă lŏ hma Lăn Dap Kngư ba yua drone hlăm bruă kriê dlăng đang pla mjing, brei ƀuh boh tŭ dưn êjai mkiêt mkriêm ai mă bruă leh anăn mđĭ hnơ̆ng ana pla mjing. Dŭm drone mdiăng ktrŏ dưi dŏng mtlaih anak mnuih hlăm êa lêč. Klei kpăk prŏng ară anei jing ênoh čhĭ adôk yuôm kyua brei drone mơ̆ng ala tač êngao. Tơdah mâo hdră êlan mtrŭt mđĭ klei mkra mjing hlăm lăn čar, ênoh čhĭ drone srăng ênưih hĭn, bruă lŏ hma dưi đru jăk hĭn leh anăn bruă tui duah đru dŏng ăt tŭ dưn hĭn.