Thŭn 2022, ayŏng Nguyễn Thanh Đức ti să Sông Lũy, čar Lâm Đồng, kčưm kơ gru hmô rông lir bi mguôp hŏng rông wăt ba čhĭ kđeh čĭm. Ayŏng brei thâo: klei bi hmô anei yua klei găl mơ̆ng lăn hlăm gŏ sang, đru kơ klei čiăng hlăm anôk mnia mblei leh anăn đru mkŏ wĭt ana pla mjing, mnơ̆ng rông ba wĭt boh tŭ dưn…

Čô̆ kơ bruă hŏng klei bi hmô rông lir, wưng phŭn kčưm ayŏng Đức ka mâo klei hriăm kơ bruă anei, kyuanăn tuôm hŏng lu klei dleh dlan. Ƀiădah ƀuh klei čiăng kơ anôk mnia mblei mâo klei găl, ăt kăn djăp mkăp brei kyuanăn ñu jhŏng dih bi liê thiăm kơ kdrăp yua, hdră mnêč, ksiêm duah čiăng rông leh anăn bi lar, mkăp brei kơ anôk ba čhĭ lu hĭn.

Ayŏng Đức brei thâo, ênoh phŭn kčưm kơ grăp war rông lir (2m2/war) hlăm brô 300.000 prăk (mâo msei, ƀaih ksu čiăng mkra war rông leh anăn anôk lir mboh). sa war lir leh hlăm brô 35 hruê kriê dlăng dưi ba čhĭ. Mnơ̆ng ƀơ̆ng kơ lir jing mnơ̆ng ƀơ̆ng kơ wăt, dưi lŏ brei lir ƀơ̆ng dŭm mta djam msĕ si djam puăn, knăt hbei tao, knăt hƀei ƀlang, rơ̆k… grăp hruê čĭm lir 2 blư̆ (aguah, tlam). Čiăng rông lir doh, ƀiă klei ruă, knŏng luč mă ƀiă. Čiăng kơ lir đĭ hriê jăk, war rŏng lir čiăng thu, mngač, đăm brei msah srăng yua hla mtei krô amâodah mnơ̆ng đưm boh mnŭ….Ayŏng Nguyễn Thanh Đức yăl dliê:

Leh klei ruă tưp Covid-19 kâo hlŏng wĭt hlao amâo lŏ nao ti Sài Gòn ôh, mâo leh war rông lir hlăm sang mơ̆ng êlâo, kâo duh bi liê pŏk mlar thiăm war rông čiăng rông wăt, yua eh wăt pioh pruê kơ djam, leh anăn mă djam anăn jing mnơ̆ng ƀơ̆ng kơ lir leh anăn wăt.

Êjai klei bi hmô rông lir mâo prăk mnga, ayŏng Đức lŏ duh bi liê war rông wăt. Ayŏng Đức brei thâo, klei rông wăt srăng mâo war rông doh, êđăp, amâo mâo msah čiăng nĕ kơ klei ruă. Bruă brei wăt ƀơ̆ng mnơ̆ng srăng djŏ mmông, tơdah hơăi srăng hmăi kơ wưng mboh. Mơ̆ng mmông êđai truh kơ mboh knŏng hlăm 50 hruê leh anăn mmông mboh jing  7 - 8 mlan jing mlih phung mrâo.

Hrô kơ yua amlơ̆k blei, ñu lŏ lir bi mguôp hŏng djam mtah čiăng mkra mnơ̆ng ƀơ̆ng kơ wăt. Wăt sang ñu čhĭ mâo ênoh 12 êklăk prăk sa drei, lu hŏng hŏng wăt anôk rông lu jing 8000 prăk/ drei. Ayŏng Nguyễn Thành Đức brei thâo:

Čiăng rông wăt čhĭ kđeh tŭ dưn, pô srăng rông phưi, bi mguôp hŏng dŭm mnơ̆ng ƀơ̆ng mta msĕ si: djam, hbei, boh kroh…čiăng mđĭ hnơ̆ng jăk kđeh čĭm, leh anăn bi mbŏ mnơ̆ng ƀơ̆ng hlăm sang mâo msĕ si lir, brei ñu ƀơ̆ng čiăng mđĭ hnơ̆ng jăk kđeh čĭm.  Kyua anăn kđeh wăt tinei mdê hŏng wăt rông hlăm war đưm.

Hdră ngă mơ̆ng ayŏng Nguyễn Thanh Đức ba wĭt hnư prăk hơĭt, leh anăn dôk ƀrư̆ ƀrư̆ dưi pŏk mlar ti să Sông Lũy, čar Lâm Đồng. Ayŏng Nguyễn Mạnh Tường Huy, khua bruă êdam êra să Sông Lũy brei thâo, êngao kơ bruă mtrŭt mjhar phung êdam êra čô̆ kơ bruă mđĭ kyar, pŏk mlar gru hmô rông wăt, hlăm wưng kơ anăp, alŭ wăl srăng lŏ dơ̆ng ba dŭm gru hmô mkra mjing mrâo, klă klơ̆ng hŏng phung êdam êra leh anăn ƀĭng ngă lŏ hma.

Gru hmô anei dưi ngă mâo leh 2 thŭn, Đức mă mơ̆ng dŭm alŭ wăl mkăn leh anăn wĭt rông, kriê dlăng bi mguôp hŏng pla djam čiăng čhĭ mnia. Lu jing čhĭ mnia online. Anei jing gru hmô mrâo leh anăn hdră mnêč ăt msĕ mơh kriê dlăng ăt mâo klei klă. Anei jing gru hmô phŭn kčưm, hlăm wưng kơ anăp srăng lŏ pŏk mlar thiăm gru hmô anei đru kơ phung êdam êra mâo klei mĭn msĕ čô̆ kơ bruă leh anăn kpưn đĭ mơ̆ng pô.

Rông lir bi mguôp hŏng wăt ngă ênưih, amâo mâo guôn lu prăk bi liê, găl guôp hŏng phung êdam êra krĭng ƀuôn sang. Ayŏng Nguyễn Thanh Đức ti să Sông Lucy, čar Lâm Đồng mprăp nanao ai tiê đru mtô hdră mnêč ăt msĕ mơh mkăp brei mjeh kơ phung čiăng čô̆ kơ bruă anei./.