Dŭm hruê anei, ti lu kdrăn lŏ ti să Tuy An Đông, să Hòa Thịnh, ƀuôn hgŭm Phú Yên, klei jhat êa lip ngă ăt adôk: lăn săr dơr, djah djâo đuôm hlăm mnuôr mđoh êa, lu kdrêč êlan klưh hroh, jhat rai. Klei rŭng răng hĭn jing êlan mđoh êa ka dưi ba yua hlăm hlăk êjai anôk rah mjeh êmưt leh mkă hŏng hruê mmông rah pla. Trần Thị Rạn, mnuih ƀuôn sang ƀuôn hgŭm Phú Yên brei thâo, hlue si hruê mmông, bruă rah mjeh hnui leh mkă hŏng dŭm thŭn êlâo, ƀiădah kyua êa lip đung leh amâodah ngă jhat rai msĕ si jih ngăn drăp mnuih ƀuôn sang mkiêt kriêm, kyua anăn  grăp čô amâo thâo ôh mphŭn yan mkra mjing mrâo hŏng ya hdră.

         “Thŭn anei kyua tal anei mâo klei yan adiê ngă snăn amâo mâo mjeh ngă ôh, êngăp jih leh, mdiê êngăp mơh, braih êngăp êa mơh, djăp mta êngăp jih leh. Ară anei knŏng guôn knŭk kna đru kơh mâo mjeh kơ pô ngă”.

Amâo djŏ knŏng kƀah mjeh mdiê ôh, lu anôk ti kdrăn lŏ Tuy Hòa, kdrăn lŏ lĕ hlăm klei amâo mâo êa leh yan êa lip. Nguyễn Văn Khoa, alŭ 4, să Tuy An Đông brei thâo, Knơ̆ng kdơ̆ng êa Tam Giang – phŭn mkăp êa phŭn kơ krĭng wăl - klưh hroh, ngă kơ bruă mkra mjing msĕ si luč jih.

“Boh klei mkra mjing ară anei jing knơ̆ng kdơ̆ng êa Tam Giang jhat rai, mnuih ƀuôn sang amâo dưi ngă lŏ ôh kyua amâo mâo êa. Kluôm să mâo truh giăm 1000 ha hmăi djŏ, mnuôr mđoh êa ăt khuôt, amâo mâo êa. Mnuih ƀuôn sang čang hmăng hnưm mkra mđĭ, kơrŭ wĭt mjing knơ̆ng kdơ̆ng êa čiăng dưi mkra mjing. Tơdah amâo dưi ngă snăn srăng amâo dưi ngă lŏ ôh”.

Gưl angĭn êbŭ mrô 13 mâo êa lip prŏng knhal jih mlan 11 ngă luč liê kjham kơ êlan mnuôr mđoh êa phŭn ti krĭng nah Ngŏ čar Dak Lak. Hlue si Nguyễn Văn Chiến,  K’iăng Khua Knơ̆ng bruă knơ̆ng kdơ̆ng êa Đồng Cam, jih jang êlan mđoh êa

Đồng Cam leh anăn Tam Giang hmăi djŏ sơăi, hmăi kơ hlăm brô 19.000 ha mdiê mơ̆ng krĭng nah Ngŏ čar. Ti anăp klei anăn, Knơ̆ng bruă iêô mkrum leh jih jang mnuih mă bruă, bi hgŭm hŏng anôk bruă pral mkra mđĭ dŭm anôk bruă jhat rai hlăm kluôm anôk.

“Truh wưng anei, jih jang dŭm anôk jhat rai hrăm mbĭt pŏk ngă msir mgaih. Knơ̆ng bruă ăt msĕ mơh Anôk bruă kriê dlăng bi liê nah Ngŏ čar iêô mkrum jih hnơ̆ng mnuih mă bruă, dŭm anôk bruă rŭ mdơ̆ng pŏk ngă msir mnuôr mđoh êa dŭm gưl leh anăn hlăm knơ̆ng bruă kriê dlăng, hnưm bi leh, rơ̆ng ba êa krih duh kơ bruă mkra mjing êlâo hruê 31/12.”

Bruă sang čư̆ êa alŭ wăl ti Dak Lak ăt dôk gĭr “bi tiŏ êran hŏng yan buh pla”. Hlăk êjai dŭm să dôk hrăm mbĭt hŏng mnuih ƀuôn sang ksiêm yap klei luč liê, mkŏ mjing klei kih mdoh anôk klưh hroh, lăn dơr snăn dŭm anôk bruă djŏ tuôm - hdră mnêč hlăm Knơ̆ng bruă lŏ hma - Wăl hdĭp mda dôk kƀĭn msir mgaih hdră bruă knơ̆ng kdơ̆ng êa jhat rai. Bi kơ mjeh mdiê,  Đặng Thị Thủy,  K’iăng khua Knơ̆ng bruă lŏ hma leh anăn wăl hdĭp mda čar Dak Lak brei thâo:

“Mjeh mdiê čiăng mkra mjing yan Puih Mnga kơ mnuih ƀuôn sang ară anei dưi rơ̆ng kơ phŭn mkăp ala čar, mơ̆ng dŭm hdră êlan đru mơ̆ng Knŭk kna leh anăn phŭn đru mguôp mơ̆ng dŭm anôk bruă duh mkra, phung mâo ai tiê kmah. Kyua anăn, mnuih ƀuôn sang hơĭt ai tiê mkra mjing amâo rŭng răng ôh kơ mjeh čiăng mkra mjing.”

Dưi ƀuh, leh êa lip, klei dleh dlan hĭn mơ̆ng yan mdiê Tuy Hòa, čar Dak Lak amâo djŏ knŏng kơ klei liê hlăm kdrăn lŏ ôh, ƀiădah klei jưh knang kơ hnơ̆ng kơrŭ wĭt êlan mđoh êa leh anăn mjeh. Klei phung ngă lŏ hma čiăng ară anei jing êa hnưm lŏ truh, mjeh hmao lŏ rah, čiăng kơ kdrăn mdiê Tuy Hòa, čar Dak Lak lŏ mtah mda leh gưl yan adiê ngă dleh dlan.