Thŭn 2025 dơ̆ng jih, têt 2026 truh giăm, Nguyễn Trí Kiên ti ƀuôn hgŭm Sông Cầu, čar Dak Lak hnêč dưm čuh hlăm kdô bi kjăp guê gang êa, pruê čŭr mdjiê kman, mprăp phưi rông kan mrâo. Kiên brei thâo, angĭn êbŭ mrô 13 lehanăn klei êa lip êgao ngă êngăp leh 4 ênao êa rông, kpuh đung 28 êbâo drei kan ba čhĭ, luič liê hlăm brô 2 êklai prăk. Mbĭt hŏng bruă huai mdoh ênao rông, ñu lŏ čan prăk hlăm găp djuê, ngă hră mơar akâo čan ti knơ̆ng prăk čiăng lŏ rông êpul kan mrâo.

Ară anei kâo mưn mnuih mă bruă yua kdô čuah bi kjăp guê gang êa, huai bi mdoh mâo djăp hnơ̆ng êlam, bi mdoh kman, bi knar hnơ̆ng PH lehanăn kơh blei mjeh kan phưi. Sang kâo mprăp lŏ rông 28.000 kan mú, grăp ênao 7 êbâo drei. Êlâo hĭn, leh phưi kâo srăng blei kam kơ kan ƀơ̆ng, rông truh 10 mlan, bi prăk blei mjeh kan ară anei ka mâo ênŭm, kâo srăng nao čăn dŭm êtuh êklăk prăk ti knơ̆ng prăk.

Ăt mâo mĕ boh klei mơ̆ng dŭm gŏ sang rông kan, giăm 1.200 gŏ sang rông hdang prŏng ti Kplang Xuân Đài, ăt dôk krŭ wĭt bruă rông hdang – mâo êa lip lêc kpuh đung jih. Ayŏng Lê Văn Tú ti ƀuôn hgŭm Sông Cầu brei thâo, angĭn êbŭ mrô 13 ngă mčah, bi rai lu anôk rông, đung jih hdang mprăp ba čhĭ hlăm akŏ mlan 12 truh phă êa ksĭ, hlăm anăn êbeh 70 ñuăl rông amâo lŏ ƀuh. Leh kơnăn gưl êa lip lêč hƀuê ênuk ăt ngă 26.000 drei hdang mjeh djiê jih, ênoh luič liê hlăm brô 4,5 êklai prăk. Gŏ sang kâo mprăp čan prăk, kñăm krŭ wĭt bruă rông hdang.

Gŏ sang kâo dôk đuôm nư knơ̆ng prăk 1,2 êklai prăk ƀiădah ară anei diñu lŏ brei kâo čan 200 êklăk prăk čiăng mâo prăk lŏ wĭt rông mnơ̆ng, duh bi liê bi kjăp anôk rông. Gŏ sang kâo blei leh 4.000 drei mjeh hdang prŏng phưi hlăm 8 ñuăl rông yan mrâo. Sang kâo tĭng srăng pŏk mlar anôk rôn čiăng mâo prăk tla nư.

          Hluê si klei ksiêm yap mơ̆ng Knơ̆ng bruă Lŏ hma – Wăl hdĭp mda čar Dak Lak, angĭn êbŭ mrô 13 lehanăn gưl êa lip lêč mlan 12 êgao ngă luič liê kjham kơ krĭng rông mnơ̆ng hlăm êa phŭn mơ̆ng čar. Knŏng ti wăl krah Sông Cầu, čar Phú Yên hđăp, hlăm brô 10.000 anôk rông mơ̆ng êbeh 1.500 gŏ sang jhat rai, luič liê đăo tĭng giăm 1.900 êklai prăk. Nguyễn An Phú, Kơiăng khua knơ̆ng bruă Lŏ hma – wăl hdĭp mda čar Dak Lak brei thâo, alŭ wăl dôk mkŏ mkra hdră mtrŭn djŏ guôp, mjing klei găl kơ mnuih rông hnưm lŏ ngă bruă.

“Hmei ksiêm yap leh klei luič liê leanăn dôk čih mkra Hdră pŏk hluê ngă Hdră mtrŭn mrô 09 thŭn 2025 čiăng tĭng hdră đru kơ gŏ sang rông mnơ̆ng hmăi mơ̆ng angĭn êbŭ mrô 13 lehanăn klei êa lip ngă. Ênoh đru 30 êklăk prăk kơ grăp 100m3 êa rông. Mbĭt anăn, Knơ̆ng bruă ăt mâo hră mơar đru kčĕ kơ Knơ̆ng bruă sang čư̆ êa čar gĭt gai dŭm knơ̆ng prăk čuăl ênoh nư dôk đưm, bi hrŏ prăk mnga lehanăn lŏ brei čan thiăm, kñăm mjing klei găl kơ mnuih buôn sang hnưm bi hơĭt bruă lŏ rông.

          Nguyễn Kim Cương, Khua knơ̆ng prăk knŭk kna krĭng 11, ksiêm dlăng alŭ wăl Gia Lai lehanăn Dak Lak mrâo brei thâo, angĭn êbŭ mrô 13 lehanăn klei êa lip lêč mrâo êgao ngă êbeh 27.700 čô mnuih blei yua ti Dak Lak luič liê. Hlăm ênoh anăn, mâo dŭm êbâo čô ngă bruă rông mnơ̆ng, hlăk ba ênoh hrui wĭt lu. Hluê ngă klei gĭt gai mơ̆ng Knơ̆ng bruă sang čư̆ êa čar Dak Lak lehanăn Knơ̆ng prăk knŭk kna Việt Nam, Knơ̆ng prăk knŭk kna krĭng 11 dôk mjêč pŏk hdră đru, mjing klei găl lŏ krŭ wĭt hdră duh mkra, mnia mblei.

Knơ̆ng prăk knŭk kna krĭng 11 mtă kơ dŭm êpul brei čan prăk hluê ngă hdră mkŏ dăp wưng lŏ wĭt tla nư kơ phung tuê čan luič liê kyua adiê hjan angĭn êbŭ ngă. Hluê ngă hdră bi hrŏ prăk mnga kơ phung čan prăk luič liê kyua klei adiê hjan êa lip hluê si klei ba mdah mơ̆ng Knơ̆ng prăk knŭk kna Việt Nam hlăm brô  0,5 - 2%/thŭn kơ wưng bi hrŏ mơ̆ng 3 – 6 mlan. Leh kơnăn, dŭm knơ̆ng prăk ksiêm dlăng hdră brei čan mrâo čiăng kơ mnuih ƀuôn sang lŏ krŭ wĭt bruă duh mkra, mnia mblei”.

          Hŏng klei gĭr mơ̆ng mnuih rông mnơ̆ng mbĭt hŏng klei đru mơ̆ng bruă knŭk kna alŭ wăl lehanăn dŭm êpul bruă brei čan prăk, krĭng rông mnơ̆ng hlăm êa phŭn ti Dak Lak ƀrư̆ krŭ wĭt leh klei yan adiê ngă. Dŭm ñuăl rông, anôk rông hlăk bŏ hdang, lan t jing klei mơak lŏ wĭt ti ƀô̆ mta mnuih ƀuôn sang ktuê hang ksĭ. Mprăp mŭt hlăm thŭn 2026, sa yan mrâo lŏ truh, ba klei čang hmăng hơĭt kjăp, trei mđao kơ sa yan jăk jĭn ti anăp./.