Sang Nguyễn Đình Phong ti djiêo hnoh krông Gianh. Tal gŭ mơ̆ng sang anei, jing anôk pioh kơ gŏ sang hdĭp mda. Đĭ jih boh êñan nao kơ tal dua, ƀuh yơh ti ală mta jing sa boh adŭ kriê pioh điêt. Adŭ anei, jih gŏ sang pioh Phong kriê pioh djăp mta hră mơar djŏ tuôm hŏng Awa Hô, hŏng Đại tướng Võ Nguyên Giáp, phung khua kahan prŏng, phung jhŏng ktang, lehanăn êngiă asei, phung amĭ Việt Nam jhŏng ktang mơ̆ng djuê ana Việt Nam.

Êgao leh 50 thŭn, jih jang klei tui duah, kriê pioh mơ̆ng Phong dưi mâo leh êbeh 3.000 pŏk rupp hră mơar yuôm bhăn lač kơ Awa Hô  hlăm grăp gưl ênuk, mơ̆ng hrue amĭ kkiêng, truh đĭ prŏng, lehanăn tui duah êlan sua wĭt klei êngiê, bruă cách mạng mơ̆ng Awa. Nguyễn Đình Phong yăl dliê, mâo lu klei čih, hră mơar kơ hƀuê ênuk mơ̆ng ƀuôn sang, lehanăn djuê ana hlăm klei ñu tui duah lehanăn kriê pioh:

 “Thŭn 1969, lăn čar dôk hlăm klei bi blah, hlăk anăn Awa Hô djiê leh. Truh thŭn 1975 lăn čar mâo klei êngiê, hluh lir, snăn amâo lŏ mâo awa ôh, Awa jih klei hdĭp kyua lăn čar kyua mnuih ƀuôn sang. Kâo tui duah lu mta rup čiăng kơ jih jang mnuih dưi thâo. Brei mâo klei khăp hŏng awa Hô snăn kâo tui duah, snăn dưi ngă klei anei, sa mta bruă amâo mâo djŏ jing ênưih ôh. Leh mâo tui duah lu mta kâo mĭn yơh si srăng kriê pioh, lehanăn dưi rang mdah kơ jih jang mnuih ƀuh, lehanăn hiu duah mdah ti dŭm boh sang hră pioh kơ phung hđeh ksiêm dlăng tui hriăm.”

Klei tui duah djăp mta hră mơar djŏ tuôm kơ awa Hô, mơ̆ng Phong ăt tuôm hŏng lu klei dleh dlan. Leh ñu wĭt mdei kyua amâo mâo klei suaih pral, asei mduôn leh kăn mâo prăk mlan leh wĭt mdei, klei hdĭp mda lĕ hlăm klei dleh dlan, snăn ñu ăt kƀah wư hlăm bruă čiăng tui blei hră mơar, rup, nao kpĭ plastic čiăng kriê pioh. Mâo wưng ñu ƀuh hdruôm hră jăk lač kơ Awa Hô, ñu akâo kơ pô hră, ƀiădah pô hră amâo mâo brei ôh, akâo blei ăt kan čhĭ. Mmông anăn ñu ik uêñ akâo mă rup, hŏng lu hdră ñu gĭr tui duah. Tăp năng, kyua knŏnbg khăp kơ rup siam, rup amâo jăk tuôm ƀuh ôh mơ̆ng Awa Hô, snăn ñu hlŏng blei jih sa hdruôm hră, knŏng kyua mâo hlăm anăn sa pŏk rup awa đuič.

Bruă tui duah jing dleh leh, ƀai hĭn bruă kriê pioh jing dleh, êjai anăn sang Phong ti djuêo hnoh krông Gianh, grăp thŭn tuôm nanao hŏng klei êa lip. Truh yan êa lip lêč, Phong mđuĕ tal êlâo anăn jing dŭm ngăn yuôm ñu jing hră mơar, lehanăn rup djŏ tuôm hŏng Awa Hô, ba kơ anôk êđăp ênang, kơ dlông hĭn.

Nguyễn Hồng Sâm, 90 thŭn, ti alŭ Tân An, să Quảng Thanh, kdriêk Quảng Trạch jing mah jiăng riêng gah kreh nao đru ñu hlăm bruă ksiêm duah, kriê pioh hră mơar djŏ tuôm hŏgn Awa Hồ. Sâm brei thâo Phong khăp kơ klei kriê pioh, tơdah ti anôk nao tuôm hŏng rup amâodah hră mơar djŏ tuôm hŏng Awa Hô, Sâm nao hưn yơh kơ Phong thâo lehanăn tui duah lŏ mbŏ kơ bruă kriê pioh. Tui si  Nguyễn Hồng Sâm, klei tui duah kriê pioh rup lehanăn hră mơar djŏ tuôm kơ Awa Hô, mâo đru leh kơ mnuih ƀuôn sang lŏ thâo săng hĭn kơ klei mĭn, knhuah hdĭp Hồ Chí Minh.

 “Tơdah yăl dliê kơ bruă tui duah, kriê pioh, snăn ƀiă snăk mnuih dưi ngă, lehanăn knŏng hjăn Phong dưi ngă leh hŏng klei ƀhĭ klĭ. Khădah Phong amâo mâo prăk mlan, amâo mâo mnơ̆ng dưi đru ñu ôh, leh ai khua awăt, ƀiădah ñu hŏng klei khăp ñu ngă, tăp năng leh kâo mă prăk mlan leh wĭt mdei, kâo lŏ đru kơ Phong mâo ƀiă pioh blei hră mơar, rup ñu tui duah. Phong tuôm ba leh mnơ̆ng ñu kriê pioh anei ba kơ anôk rang mdah, čiăng đru kơ jih jang mnuih thâo săng, kơ bruă knuă mơ̆ng Awa Hô, lŏ bi mjuăt hriăm kơ hđeh gưl mrâo lŏ čuê, lehanăn mâo klei thâo săng hĭn.”

Mlan 5 anei ƀri bi hdơr 135 thŭn hrue kkiêng kơ khua gĭt gai Hồ Chí Minh. Sa boh sang điêt ti djiêo hnoh krông Gianh mơ̆ng Phong lŏ mâo lu mnuih nao dlăng, dŭm pŏk rup siam kơ Awa Hô lehanăn dŭm mta hră mơar kơ hƀuê ênuk mâo Phong tui duah, kriê pioh.

 Trần Thị Vân, mnuih hlăm bruă êdam êra să Đoàn Quảng Thanh, kdriêk  Quảng Trạch lač, amâo mâo guôn đuĕ hiu kbưi ôh, phung mda asei čiăng ksiêm duah dŭm mta hră mơar kơ hƀuê ênuk, kơ phung hing ang hlăm dŭm ênuk gưl, lehanăn tui duah hră mơar kơ Awa Hôm snăn nao kơ sang Nguyễn Đình Phong ti anăn mâo lu mta:

 “Leh ƀuh anôk kriê pioh mơ̆ng Phong, kâo ƀuh klei ñu thâo mpŭ kơ khua gĭt gai mơ̆ng djuê ana, đru bi kriê pioh lehanăn lŏ bi lar dŭm mta hră mơar kơ Awa Hô. Anôk kriê pioh anei đru leh kơ phung mda asei dưi ksiêm duah kơ klei hdĭp, bruă knuă mơ̆ng Awa. Dŭm êbâo mta rup lač kơ Awa Hô, mâo leh awa Phong dăp djŏ pruĕ, msĕ si hrĭng jih dŭm klei yăl dliê, lehanăn lŏ yăl dliê hŏng jih jang mnuih thâo hlăm grăp knăm mơak, čiăng kơ phung hđeh gưl mrâo ksiêm duah, tui hriăm knhuah mngač Awa Hô”./.