Khăp hmư̆ ênai đĭng buôt, Y Puen Niê (Ama Phiu) klă sĭt jing leh sa čô mnuih mbruă kơ dhar kreh djuê ana pô, leh ñu klam ngă knuă druh bruă mđung asăp să Čư̆ Pui, kdriêk Krông Bông, čar Daklak. Mơ̆ng lam ai tiê ñu mâo nanao klei dôk bi mĭn kơ ênai čing čhar, lehanăn dŭm mta kdrăp pĕ tông djuê ana Êđê.

Leh hriăm ruĕ gưl krah Đam San, Y Puen Niê mâo leh dŭm klei thâo săng pioh bi kriê pioh lehanăn dưn yua dhar kreh mơ̆ng aê ama pô. Y Puen Niê brei thâo, ñu khăp kơ dhar kreh djuê ana mơ̆ng hlăk ñu mâo 15 thŭn, ñu čŏng mkra hjăn ñu đĭng buôt:

 “Lač kơ dhar kreh anak Êđê pô msĕ si tông čing čhar, ayŭ đĭng năm, đĭng buôt, Eirei jiă leh hlăm ai tiê mơ̆ng điêt. Kâo tui mơ̆ng aê aduôn, di neh aprŏng… leh truh kơ prŏng, klei mhao čiăng anăn bluh hlăm ai tiê tui nao hriăm ayŭ, pĕ tông dŭm kdrăp djuê ana pô ƀrư̆ ƀrư̆. Kâo mâo klei gĭr êdi čiăng thâo lŏ mkra lehanăn ba yua mnơ̆ng anăn. Dŏ tal êlâo kâo hriăm anăn jing đĭng buôt, leh kơ anăn gông, brô̆, đĭng tŭt… klei yuôm bhăn hĭn jing klei khăp mơ̆ng asei kâo pô”.

Y Puen Niê pioh leh lu thŭn mlan ksiêm duah kơ phŭn agha, klei yuôm bhăn mơ̆ng mdê bi kdrăp pĕ tông, dơ̆ng mơ̆ng hmư̆ ênai čing kwang hlŏng truh kơ kŏk, đĭng buôt hŏng asăp kưt, amâodah ênai đĭng năm nao mbĭt hŏng ei rei bi k’ưt. Lehanăn ñu lŏ dơ̆ng ba ai tiê klei thâo khăp anăn truh hŏng phung hđeh:

 “Kâo dưi ngă leh, kâo lŏ mjuăt bi hriăm phung hđeh jing anak čô amuôn adei hlăm ƀuôn, hlăm să, kdriêk. Kâo mâo klei tiŏ nao mtô truh kơ lu anôk mkăn. Hlăm mlan 4 leh êgao, mâo klei myun nao mtô tông čing knah, čing kram, đĭng buôt, ki pah, brô̆, gông lehanăn lu mta kdrăp pĕ tông mkăn truh kơ Hà Nội. Phung hđeh pral tui hriăm, ƀiădah hŏng ênuk hlăm klei hdĭp ară anei, lu mnuih tuôm hŏng lu dhar kreh mkăn hlăm hla pŏk yang ƀuôn, msĕ si facebook, tiktok ăt hmăi mơh ƀiă lu kơ klei khăp čiăng bi hriăm êmuh.”

Dŭm boh adŭ bi hriăm tông čing, tôk tŏk t’rưng.. mơ̆ng Y Puen Niê ktrâo atăt jing leh sa anôk hlăp jăk kơ phung hđeh hlăm lu boh ƀuôn. Amuôn H’Tra Ƀuôn Yă (10 thŭn), mrâo mâo mă klei pah mni mrô 2 klei muiñ ênhiang djuê ana ti kdriêk Krông Bông, lač:

 “Hmei khăp snăk kơ ênhiang klei kưt muiñ djuê ana pô mơ̆ng sui leh. Mơ̆ng leh tuôm hŏng amiêt Y-Puen Niê hmei mâo hriăm tông čing čhar, čing kram, hriăm ei rei, ayŭ đĭng tŭt… Kâo lehanăn ƀĭng găp bi jak nao hriăm. Hmei nao hlăm klei bi lông, lehanăn hmei khăp êdĭ.”

Y Puen Niê jing leh sa čô mnuih hur har êdi hlăm êpul tông čing, kdrăp pĕ tông ti să Cư Pui, đru bi lar leh dhar kreh Êđê hlŏng truh kơ lu krĭng lăn mkăn. Y Phinh Ƀuôn Yă, nai mtô sang hră gưl sa Dang Kang 1, să Dang Kang, kdriêk Krông Bông lač:

 “Hmư̆ msĕ si ênai čĭm dôk mñê, drông mđiă hriê, hmư̆ giăm msĕ hŏng ênai čing yan bhang. Kâo khăp êdi hmư̆ Y Puen Niê pĕ tông kdrăp djuê ana pô. Hŏng jih jang kdrăp ñu mkra anăn hŏng đĭgn đrao, dŏ mơ̆ng dliê, jĕ giăm hŏng mnuih ƀuôn sang, dơ̆ng mơ̆ng hđeh hlŏng kơ mduôn. Čang hmăng kơ Y Puen Niê mâo nanao klei suaih pral, čiăng bi lar knhuah gru jăk siam anei.”

Hŏng klei mbruă lehanăn ai tiê hur har, Y Puen Niê mâo ba wĭt leh lu boh tŭ dưn mơ̆ng dŭm anôk bi lông kdrăp pĕ tông ti gưl kdriêk, čar. Msĕ si mâo tŭ mă mêđai êa mah klei bi lông ti gưl čar, lehanăn klei pah mni ênoh B mơ̆ng êpul bruă lĭng kahan čar Daklak mkŏ mjing. Hlăm hrue mơak dhar kreh dŭm djuê ana čar Daklak thŭn 2023, êpul čing kram mâo ñu ktrâo atăt mâo mă leh klei pah mni ênoh B klei bi lông tông čing kram lehanăn kdŏ čhuang iêo mnăm huă mơak boh mnga.

 Klei yăl dliê kơ Y Puen Niê, sa čô mnuih thâo khăp êdi kơ dhar kreh djuê ana pô, jing leh sa klei bi klă kơ ai hdĭp ktang mơ̆ng knhuah gru dhar kreh lăn dap kngư. Ti krah klei hdĭp hlăm ênuk mrâo, ăt dôk mâo mnuih thŭn mda asei tuh êyuh jih ai tiê duh myơr, kơ bruă kriê pioh lehanăn lŏ bi lar dŭm klei tŭ dưn mơ̆ng dhar kreh yuôm bhăn anei. Pô mbruă Y Puen Niê klă sĭt jing leh sa gu bi hmô jăk, sa klei myưng m’ang kơ mnuih ƀuôn sang anak Êđê ti čar Daklak./.