Hlăm krah adiê adôk êăt, mâo dhul k’uă djiêo ping čư̆, êjai krah adiê mđiă dôk mtrang dlăng mngač siam, ênai čing kwang hlăm alŭ wăl mdei msăn Ênao Gia Trang Lâm Hà, Lâm Đồng. Jŭm mkăm pui dôk trơ̆ng, phung mniê K’Ho hŏng kdrăp djuê ana pô, kdŏ čhuang bi kđrăp hlue ênai čing. Hlăm ênai čing kwang msĕ si lŏ bi hdơr kơ ênuk aê aduôn pô đưm. Tue hiu čhưn Phạm Thị Vân, khăp dlăng êpul tông čing mniê gtông, hŏng knhuah siam jăk êdi:

Êpul tông čing mniê hŏng klei êun juat kdŏ êjai tông čing êjai, djŏ hŏng ênai čing, dlăng jing jăk hĭn hŏng êpul êkei, jing guôp hŏng dhar kreh mă djuê tĭng kơ amĭ mơ̆ng djuê ana K’Ho”.

Kreh mdah nanao hlăm alŭ wăl hiu čhưn ênguê ti Lâm Hà jing êpul tông čing mniê Bồ Liêng. Êpul mâo êbeh 20 čô, hlăm anăn mâo 6 čô mniê kăp tông čing, dŭm adôk jing bni kdŏ čhuang. Grăp knhuang čhuang kdŏ lehanăn kngan êyŭn êyuh dưi bi êdah knhuah siam mơ̆ng phung mniê. Amâo mâo djŏ knŏng siam hlăm đĭng kdriêk, ƀiădah klei siam diñu lŏ hlue hŏng ênai čing bi êdah mơ̆ng lam ai tiê. Pô mbruă K’Phèn, hlăm êpul tông čing mniê Bồ Liêng, ti ƀuôn hgŭm Đinh Văn Lâm Hà, čar Lâm Đồng, lač:

“Kâo khăp kơ čing čhar djuê ana pô, anei jing dhar kreh mơ̆ng aê aduôn pô đưm. Mơ̆ng klei khăp anăn kma leh hlăm klang êrah. Snăn truh ară anei thâo tông leh lu ênhiang tông mdê mdê mơ̆ng djuê ana K’Ho pô”.

Hlăm êpul tông čing Bồ Liêng, pô mbruă K’Phôn lŏ mâo đŏk muiñ siam ênhiang klei muin djuê ana K’Ho. Ñu brei thâo:

 Nao mdah thâodah nao bi lông, êpul tông čing mniê, hmei mâo leh lu klei bi mni mơ̆ng mnuih dlăng. Kyuadah phung amai adei tông čing juăt raih leh, hŏng ênhiang jăk êdu êun, thâo leh lu ênhiang tông mdê mdê, hŏng kdrăp čŭt hơô djuê ana pô, mjing leh klei jăk siam êdi hŏng mnuih dlăng. Wưng tinăp, hmei srăng lŏ mtô bi hriăm kơ phung hđeh mniê, êlâo hĭn hlăm gŏ sang, găp djuê, srăng lŏ čuê hlăm êpul tông čing. Asei mlei kâo pô srăng mtô bi hriăm phung hđeh, čang hmăng kơ dhar kreh djuê ana pô dưi djă pioh nanao”.

Pô mbruă K’ Bes- pô mkŏ mjing êpul tông čing mniê Bồ Liêng mâo 15 thŭn hŏng anei leh, ară anei ăt dôk tui tiŏ jih jang bruă mơ̆ng êpul. Hlăm dăl dŭm thŭn dôk mtô bi hriăm kơ êbeh 200 čô mnuih tông čing, ñu ƀuh jăk êdi hlăm klei bi hriăm jing hŏng amuôn adei mniê:

Ară anei kâo ăt dôk mtô tông čing kơ hđeh gưl mrâo, Thŭn dih mtô leh kơ hđeh hriăm hră adŭ 5 adŭ 6, lehăan kơ phung hlăk ai mơ̆ng 30 - 40 thŭn. Tơdah bi mkă hlăm klei phung hđeh hriăm, wăt hŏng phung mduôn leh, ƀuh jing phung hđeh mniê hriăm djăl thâo hĭn mkă hŏng êpul mkăn. Adŭ hriăm êpul mniê khăp tui hriăm, hriăm djŏ mmông, snăn kâo mđĭ ai mơh bi hriăm. Mâo hrue kâo lŏ mtô thiăm pral snăk phung hđeh tui, êmăt năng bi mni êdi.”

 Wưng leh êgao, êpul tông čing mniê Bồ Liêng tuôm hiu mdah leh hlăm lu anôk, hlăm dŭm knăm mơak, hrue knăm prŏng djuê ana Việt Nam.

Diñu mâo dŭm anôk hiu čhưn ênguê hlăm alŭ wăl iêo nao mdah, hgŭm ngă bruă hiu čhưn ênguê yan ƀuôn. Khădah ti anôk mdah, diñu ăt hŏưng jih ai tiê mpŭ kơ čing čhar pô , klei bi knăl yuôm bhăn hlăm klei hdĭp dhar kreh djuê ana K’Ho. Klei êdu êun mơ̆ng êpul tông čing mniê Bồ Liêng djiêo hnoh krông Đạ Đờng mjing leh klei iêo jak yuôm bhăn êdi mơ̆ng bruă hiu čhưn ênguê Lâm Đồng. Nguyễn Văn Thạnh- K’iăng khua anôk bruă hgŭm Đinh Văn Lâm Hà, čar Lâm Đồng brei thâo: 

Alŭ wăl mkŏ mjing lẻh dŭm tuôr hiu čhưn ênguê dhar kreh, tue hiu čhưn khăp êdi ƀuh klei tông čing. Snăn anei jing sa hdră iêo jak lehanăn hưn mdah kơ dhar kreh čing čhar pô hŏng tue. Mơ̆ng anăn lŏ mjing bruă knuaư mă kơ phung tông čing, mđĭ hĭn ai tiê thâo krie epioh dhar kreh đưm aê aduôn pô.”

Êpul tông čing mniê Bồ Liêng amâo mâo djŏ knŏng lŏ mđĭ knhuah siam mơ̆ng čing čhar djuê ana K’Ho, ƀiădah lŏ đru mguôp yuôm bhăn kơ dhar kreh djuê ana pô, mjing atur kơ bruă mđĭ kyar duh mkra, ala ƀuôn hŏng sa hdră kjăp krĭng mnuih djuê ƀiă Lâm Hà, Lâm Đồng.