Mơ̆ng anôk ngă yang Lạc Sơn, ênai čing kwang mơ̆ng aguah ưm, msĕ si klei iêo jak jih jang mnuih nao hlăm knăm yuôm bhăn leh ruĕ Tết. Phung mduôn khua hđeh êlăk bi mprăp kdrăp djuê ana pô nao hlăm knăm pŏk yan pla mjing mrâo.

Tui si klei bhiăn mơ̆ng mnuih ƀuôn sang Mường, gơ̆ng ngă yang mâo mdơ̆ng mơ̆ng hrue 27 mlan knhal tuič thŭn, kruak knăl kơ wưng dơ̆ng mdei Tết. Leh mdlưh hĕ gơ̆ng ngă yang ăt jing jing mjưh ruĕ klei hiu mơak thŭn mrâo, mnuih ƀuôn sang lŏ trŭn kơ bruă lŏ hma. Knăm mdlưh gơ̆ng ngă yang  kñăm bi knăl kơ gưl mă bruă mrâo, hơĭt ai tiê kơ sa yan mrâo dơ̆ng buh pla hlăm klei jăk mơak.

Bùi Văn Thành, pô kiă kriê knăm ngă yang ti anôk ngă yang Lạc Sơn brei thâo, knăm mdlưh gơ̆ng ngă yang  hŏng klei čang hmăng mâo klei êđăp ênang trei mđao. “Čiăng kơ ƀuôn sang mâo klei êđăp ênang, lăn čar hnŭk êngiê. Mnuih ƀuôn sang Mường akŏ thŭn trŭn kơ bruă pưk hma, hlei trŭn kơ lŏ, ngă lŏ, đĭ hlăm hma ngă hma pla mdiê ktơr hbei mtei bi mboh mnga, amâo mâo klei hluăt ƀơ̆ng mnơ̆ng ngă, lehanăn brei kơ mnuih ƀuôn sang Mường amâo mâo klei djiê ƀrŭ, knŏng mâo klei drông klei bi kuôl ung mô̆, mnuih ƀuôn sang dôk hlăm klei hnŭk ênang.

Ti ƀuôn hgŭm Tân Lập ară anei mâo 7 anôk ngă yyang kơ mnuih ƀuôn sang Mường kbiă hriê mơ̆ng dưr. Mơ̆ng hrue 7 truh hrue 10 mlan tal êlâo, grăp anôk ngă yang bi mkŏ mjing bruă mdlưh gơ̆ng ngă yang , mjing leh bruă trŭn nao hlăm yan mnga:

 Bùi Thị Hợi, ti êpul anôk dôk mrô 2B, ƀuôn hgŭm Tân Lập brei thâo, mnuih ƀuôn sang mprăp leh kơ knăm mơ̆ng lu hrue êlâo, hŏng klei čang hmăng bi kriê pioh knhuah gru anei kơ gưl êdei. “Êjai pô ngă msĕ snăn, jing brei kơ anak čô ƀuh klei bhiăn djuê ana Mường pô msĕ snăn, truh êdei diñu srăng lŏ kriê pioh, djă yua truh kơ gưl čô anak diñu mơh.”

Leh ruĕ jih knăm anăn, snăn nao hlăm klei hlăp mbul hlue knhuah djuê ana Mường, mâo lu snăk mnuih ƀuôn sang nao hlăp mbul jing bhĭr boh đúm tung kơ dlông adiê, ti krah klei ur driâo mơ̆ng jih jang mnuih, čang hmăng kơ mâo klei kkiêng bi lar êngŭm, trei mđao. Mâo klei bi lông ktŭng klei, đĭ gơ̆ng êbhơr, čăm gŏ lăn, tiŏ mă bip… tinăn mâo klei mơak mñai snăk.

Dŭm thŭn giăm anei, knăm anăn lŏ mâo tue mơ̆ng jĕ giăm taih kbưi truh mbĭt, hlăm anăn mâo wăt tuê ala tač êngao. Mark Schmidt, tue hriê mơ̆ng Canada lač leh nao hlăm knăm anei: “Kâo mơak mâo hriê mbĭt hŏng knăm anei. Anei jing sa hdră čiăng lŏ hyuă klei thâo bi mguôp hlăm yang ƀuôn, gŏ sang, lehanăn lăn čar. Knăm anei, lŏ hdơr knga kơ gưl êlâo, kơ ară anei lehanăn mĭn kơ êdei anăp. Hmăng hmưi mâo nanao klei jăk mơak. Kâo čang hmăn kơ lăn čar mâo klei mdrŏng sah, klei jăk mơak kơ mnuih ƀuôn sang. Anei jing sa klei bi knăl jăk siam, lehanăn kâo čang hmăng dưi mâo bi mguôp hŏng dŭm knăm msĕ snăn lu hĭn”.

Knăm mdlưh gơ̆ng ngă yang mơ̆ng djuê ana Mường ti Daklak mâo ngă nanao leh hlăm dŭm thŭn êgao, kñăm kriê pioh knhuah gru dhar kreh mơ̆ng djuê ana Mường ti ƀuôn sang mrâo. Knăm mdlưn gơ̆ng ngă yang leh ruĕ jih klei hiu čhưn akŏ yan mnga, pŏk kơ gưl trŭn hlăm bruă pla mjing mrâo hŏng klei đăo knang kơ sa thŭn duh mkra pla mjing, lehanăn hdĭp mda hnŭk ênang jăk mơak./.