Pô mbruă Y Kŭt Niê kčưm lŏ siă suôr hŏng klei kưt mnuiñ lehanăn kdrăp pĕ tông kdrăp djuê ana pô mơ̆ng hlăk ñu mrâo 18 thŭn. Ñu lač: Mphŭn dô amâo mâo hdruôm hră mơar msĕ si ară anei, drei knŏng tui hriăm mơ̆ng phung khua mduôn, mnuih mbruă khua thŭn, hmư̆ diñu muiñ, dlăng diñu tông čing lehanăn tui hriăm ƀrư̆ ƀrư̆.

“Kâo thâo kưt ei rei lehanăn thâo hlăp kdrăp pĕ tông mơ̆ng hlăk  18 thŭn. Êlâo anăn, kâo kreh mđing hmư̆ phung mbruă nao êlâo lehanăn tui hriăm. Ƀrư̆ ƀrư̆, kâo dơ̆ng thâo, lehanăn lŏ dơ̆ng mtô bi hriăm anak čô hlăm ƀuôn. Thŭn 2007, kâo mâo klei myun mtô bi hriăm phung hđeh ti sang hră knŭk kna čiêm rông. Knŏng leh 3 mlan tui hriăm, phung hđeh hriăm tông čing  knah hŏng klei raih. Leh kơ anăn, nao mŭt hlăm êpul tông čing ti Đồng Mô, Sơn Tây, Hà Nội lehanăn siă suôr hŏng êpul tông čing hlŏng truh thŭn 2019.”

Hluê hŏng thŭn mlan, dŭm ênhiang kưt muiñ djuê ana Êđê, ênai čing kwang, lehanăn ênai đĭng năm jing leh sa kdrêč amâo mâo dưi kƀah ôh hlăm klei hdĭp Y Kŭt Niê. Amâo mâo djŏ knŏng raih thâo hlăm klei tông, ñu lŏ thâo mkra kdrăp pĕ tông djuê ana pô. Klei năng mđing hĭn jing Y Kŭt Niê amâo mâo djă pioh ôh klei thâo anăn kơ hjăn pô. Hŏng ñu, klei lŏ mtô bi hriăm kơ phung hđeh gưl mrâo:

 “Čiăng dưi mkra sa boh đĭng năm, luič truh mkrah mlan. Tơdah lŏ kpăk lu bruă mkăn, snăn truh sa mlan mtam leh sa boh. Tui si kâo, phung mduôn khua bi mâo bruă klam lŏ mtô bi hriăm kơ anak čô pô, čiăng đăm luič ram ôh ôh knhuah gru dhar kreh djuê ana pô. Bi phung hđeh msĕ mơh bi tui duah, hriăm mjuăt hŏng phung nao êlâo, lŏ mjuăt hriăm bi kjăp.”

 Pô mbruă Y Kŭt Niê mâo nanao klei mnuih ƀuôn sang mpŭ, kyuadah ñu thâo bi hmô, lehanăn mâo ai tiê đua klam. Ñu gĭr kriê pioh, lehanăn bi lar knhuah gru dhar pô, mơ̆ng bruă mkra mjing, ayŭ đĭng năm, tông čing hlŏng truh kơ mâo bruă hlăm ƀuôn sang mkŏ mjing, lŏ mtô bi hriăm kơ čô anak hlăm krĭng. Y Tía Niê, ti buôn Ea Mlay, ƀuôn hgŭm Mdrak, čar Daklak, jing mnuih hlăm êpul tông čing mơ̆ng Y Kŭt Niê mtô bi hriăm:

“Y Kŭt Niê jing mnuih thâo bi hmô hlăm ƀuôn sang. Êjai anăn klei bhiăn, knhuah gru dhar kreh djuê ana pô hlăk dơ̆ng luič ram, ñu ăt gĭr kriê pioh lehanăn lŏ bi lar, mơ̆ng klei ayŭ đĭng năm, tông čing, lehanăn nao hgŭm dŭm bruă hlăm ƀuôn. Boh nik, ñu jih ai tiê lŏ mtô bi hriăm kơ phung hđeh, čang hmăng kơ phung hđeh thâo săng, khăp lehanăn lŏ kriê pioh dhar kreh djuê ana pô.”

Hŏng klei gĭr ktir jih ai tiê, lehanăn klei khăp prŏng hŏng dhar kreh djuê ana pô, ñu hlăk đru mguôp yuôm bhăn hlăm bruă kriê pioh, lŏ dơ̆ng bi lar knhuah gru dhar kreh djuê ana Êđê. Dŭm bruă mă hŏng klei ñăt kriêp amâo mâo djŏ knŏng kriê pioh ênai čing čhar, klei kưt eirei truh kơ ară anei, ƀiădah lŏ mjuăt bi hriăm kơ hđeh gưl êdei./.