Ti ƀuôn Sut M’đưng, să Quảng Phú, čar Dak Lak hlăm dŭm thŭn giăm anei, ênai čing kwang kdrăm kơah hlăm klei bi kƀĭn êpul êya. Hnêč mmông wăn, êpul kdŏ mmuñ ênhiang djuê ana ti ƀuôn hriăm, tăp năng tông čing, tăp năng ayŭ buôt, khan. Amâo djŏ knŏng mdah hlăm ƀuôn, hlăm să ôh, klei kdŏ mmuñ  anei lŏ mdah kơ tue hiu čhưn, amâodah ti knưl klei bi lông. Hlue si H Riết Êban, Khua ƀuôn Sut M’đưng, amâo djŏ knŏng ênai knăm mơak, čing čhar ară anei jing klei mkŏ dŭm gưl ênuk hlăm ƀuôn.“Ai tiê phung mbruă leh anăn phung hđeh snăn ƀrư̆ hruê jăk hĭn. Anôk bruă kriê dlăng hlăm ƀuôn ăt msĕ mơh jing êpul phung mbruă gĭr bi đru hdơ̆ng pô čiăng kơ phung hđeh ƀuh klei mơak tơdah hriăm tông čing, mjing ai êwa mơak mñao, jăk mơak kơ phung hđeh ênưih tŭ mă hĭn”.

Mbĭt hŏng ƀuôn Sut M’đưng, lu ƀuôn sang ti Dak Lak dôk grăp knhuang kơrŭ wĭt wăl dhar kreh djuê ana, mơ̆ng klei mdah tông čing, kdrăp tông ayŭ djuê ana, truh kơ kơrŭ wĭt knăm mơak leh anăn klei bi kƀĭn êpul êya. Kluôm čar mđĭ lar lu gru hmô dhar kreh djuê ana nah gŭ, hŏng dŭm êtuh gưl phung mbruă, phung thâo săng dhar kreh djuê ana đru mtô kơ phung mda asei.

 Ti să Ea Sup (hlăm kdriêk knông lăn Ea Sup êlâo dih), êpul tông čing ƀuôn Ea Sup mâo mkŏ mjing êbeh 10 thŭn. Mơ̆ng klei knŏng mâo giăm pluh čô tal êlâo, ară anei êpul mâo leh lu mnuih ƀuôn sang hgŭm, hlăm anăn mâo lu phung hlăk ai, êdam êra ngiêk. Pô mbruă Niê Khăm Ta, Khua êpul brei thâo, hŏng klei mđing uêñ mơ̆ng dŭm gưl, dhar bruă, klei mtô bi hriăm ƀrư̆ đưi mđĭ lar jăk.

“Mơ̆ng thŭn 2024, mâo Knơ̆ng bruă dhar kreh ăt msĕ mơh Adŭ bruă dhar kreh leh anăn bruă sang čư̆ êa alŭ wăl mđing uêñ pŏk adŭ mtô  bi hriăm kơ phung hđeh. Ară anei, hlăm êpul bi mŭt thiăm kơ phung hlăm êpul anăn. Ênoh phung hlăm êpul mđĭ lar truh 46 čô, hlăm anăn, phung khua thŭn kkiêng thŭn 1949 leh anăn điêt hĭn kkiêng thŭn 2015. Boh nik jing mâo leh sa êpul tông čing hđeh điêt kơ êpul, mđĭ lar êpul bruă čing čhar, dhar kreh.”

 Hlăm thŭn 2025, čar Dak Lak bi leh leh anăn hưn mdah ksiêm dlăng 46 hră mơar anăn knăl Pô mbruă yang ƀuôn, pô mbruă êdah kdlưn, mơ̆ng anăn bi mklă bruă klam mơ̆ng êpul kmeh kriê pioh dhar kreh djuê ana. Čar ăt mkŏ mjing leh tŭ jing lu dhar kreh  prŏng msĕ si: Klei bi lông dhar kreh čing čhar leh anăn kdrăp tông ayŭ djuê ana; Hruê kăm “Klei bi hgŭm djuê ana - mnơ̆ng kriê pioh dhar kreh Việt Nam”; Knăm mơak dhar kreh djuê ana Mường tal 1,… Mkŏ mjing kơrŭ wĭt leh anăn lŏ mkŏ mjing klei bhiăn ngă yang đĭ dôk sang mrâo mnuih Êđê, knăm mơak hdĭp jŏk mnuih Mnông…

Nguyễn Lê Vũ, K’iăng Khua Knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak lač, hdră ngă anei đru kơ dhar kreh dưi kriê pioh hlăm wăl hdĭp mda, hlăm klei hdĭp aguah tlam mnuih ƀuôn sang. Mbĭt anăn pŏk êlan nao mrâo čiăng kơ dhar kreh jing phŭn mđĭ kyar.“Ăt mđĭ lar bruă ngă anei msĕ si klei bi kƀĭn grăp thŭn čiăng kơ phung mbruă, phung lŏ čuê ênuk nao êlâo, lŏ mtô klei jăk siam mnơ̆ng kriê pioh kơ phung ênuk êdei. Lŏ mkŏ mjing wăl dhar kreh čing čhar kơ phung lŏ tông, mdah klei bhiăn djuê ana ăt msĕ mơh klei tông ccing hlăm êpul êya phung mbruă hdĭp mda”.

Mơ̆ng  bruă ngă anăn, klei dhar kreh lŏ čuê hŏng dŭm êpul mda asei, phung hđeh hlăm dŭm ƀuôn sang. Hlăm êpul tông čing ti ƀuôn Blôk (să Quảng Phú), adeiY Rô Lăng Kriêng, 11 thŭn jing sa čô điêt hĭn. Leh mmông hriăm, ñu lŏ hlue phung mbruă hriăm tông čing. Hŏng ñu, ênai kdrăp tông ayŭ djuê ana jing leh klei khăp mơ̆ng hnưm snăk. Čiăng jing sa čô tông đĭng trưng kyua anăn kâo hriăm leh mmông nao sang hră leh anăn gĭr hriăm hŏng phung ayŏng”.

Mơ̆ng bruă ngă ti ƀuôn sang, dhar kreh dưi kriê pioh  leh anăn lŏ  mtô brei hŏng jih ai tiê kơ phung hđeh. Hŏng klei kriê pioh mơ̆ng êpul êya, phung mda asei ƀuh klei ktưn hưn hlăm mnơ̆ng kriê pioh djuê ana leh anăn lŏ dơ̆ng lar bra ênoh yuôm dhar kreh. Anei jing tur knơ̆ng čiăng kơ dhar kreh djuê ana ti Dak Lak dưi kriê pioh leh anăn mđĭ kyar kjăp.