Čiăng mprăp kơ hruê yuôm bhăn anei, jih ƀuôn H’Ring amâo mâo pĭt đih. Mơ̆ng pin êa akŏ ƀuôn truh kơ dŭm sang krum dưi kih waih doh bhung. Gơ̆ng ngă yang mdơ̆ng ti krah tač sang mbĭt msĕ si klei iêo jak phung yang wĭt hŏng knăm mơak. Mnơ̆ng ngă yang, dŭm mta mnơ̆ng jăk hĭn mơ̆ng čư̆ dliêdưi myơr: mơ̆ng êsei brông, kpiê čeh bâo mngưi, truh kơ kan êa, čĭm brông leh anăn čĭm kuih. Anăn amâo djŏ knŏng jing mnơ̆ng ƀơ̆ng ôh, ƀiădah lŏ jing êa hŏ hang, jing mnơ̆ng yuô lăn lăn amĭ leh sang thŭn mă bruă knuă. Hưn kơ boh tŭ yuôm hruê knăm anei, amai H’Luyêt, ƀuôn H’Ring, să Čư̆ Mgar mgei ai tiê brei thâo:“Boh kroh thŭn anei mâo boh, mâo ênoh kyuanăn mnuih ƀuôn sang grăp čô nao ngă yang hơ̆k mơak. Ai êwa mơak mdiê mrâo jăk mơak êdi. Hŏng knăm mơak, anak čô dưi hmư̆ aduôn aê, amĭ ama yăl dliê kơ knhuah gru djuê ana, mơ̆ng anăn lŏ thâo khăp leh anăn mpŭ kơ knhuah gru jăk siam mơ̆ng djuê ana pô.”

Amâo djŏ knŏng jing wưng lač jăk, knăm mdiê mrâo lŏ jing anôk hyuă kjăp klei bi mguôp, anôk mă klei hriăm mă bruă hlăm dŭm ênuk gưl. Lač kơ klei êlam dhar kreh mơ̆ng hdră bhiăn anei. Joang Chả, ti ƀuôn H’Ring brei thâo: Mnuih Sêdang mâo knăm mơak mdiê mrâo dưi mkŏ mjing grăp thŭn. Leh sa thŭn mă bruă suăi êmăn, êjai truh kơ yan hrui pĕ leh anăn leh hrui êmiêt, mnuih ƀuôn sang bi mă mdiê mrâo leh anăn tăp mkŏ mjing knăm huă mdiê mrâo. Knăm mơak mâo boh tŭ dưn hmăng hmưi lăn adiê, phung yang hơêč hmưi thŭn mrâo mâo lu klei jăk, mă bruă knuă đĭ kyar hĭn.”

Mbĭt hŏng mnuih ƀuôn sang hlăm ƀuôn, knăm mơak mdiê mrâo thŭn nei ti ƀuôn H’Ring lŏ iêo jak lu phung tuê. Hlăm ênai čing kwang ti krah čư̆ dliê, amai Lê Thị Long, tuê mơ̆ng ƀuôn prŏng khua gĭt gai Hồ Chí Minh hưn mthâo klei hơ̆k mơak êjai anei jing gưl tal 2 amai nao hlăm klei ngă yang anei. Anei jing gưl tal 2 kâo nao hlăm knăm mơak. Knăm mơak mdiê mrâo kâo ƀuh jiă kma dhar kreh mnuih Sêdang tinei leh anăn mnuih ƀuôn sang mâo klei jĕ giăm. Êngao kơ knăm mơak čing čhar lŏ lŏ dưi ƀơ̆ng dŭm mta mnơ̆ng ƀơ̆ng diñu. Kâo hơêč hmưi mnuih ƀuôn sang tinei thŭn mrâo suaih pral, hơ̆k mơak, mâo lu boh mnga”.

Knăm mơak mdiê mrâo thŭn 2026 ti ƀuôn H’Ring mâo boh tŭ ưn hƀuê ênuk hŏng Bruă sang čư̆ êa leh anăn mnuih ƀuôn sang ti alŭ wăl. Anei jing bruă dhar kreh prŏng tal êlâo dưi mkŏ mjing leh ngă klei mkŏ dăp, bi kluôm bruă knŭk kna gưl să. Ti krah klei hơ̆k mơak mbĭt mơ̆ng mnuih ƀuôn sang, Nguyễn Tuấn Anh, k’iăng khua Bruă sang čư̆ êa să Čư̆ Mgar brei thâo:“Leh mkŏ dăp, Bruă sang čư̆ êa alŭ wăl mdưm boh klei răng mgang bi lar dhar kreh dŭm djuê ana jing bruă yuôm bhăn. Hơ̆k mơak jing dŭm mta phŭn ăt msĕ mơh hdră mkŏ mjing knăm mơak mâo mnuih ƀuôn sang klam ngă. Bruă sang čư̆ êa leh anăn gưl bruă Đảng nah gŭ đru sa kdrêč ngăn prăk leh anăn đa đa mta phŭn čiăng êdi, bi adôk mnuih ƀuôn sang čŏng ngă. Hŏng knăm mơak ai tiê bi mguôp hlăm êpul êya mnuih Sêdang ăt msĕ mơh plah wah dŭm djuê ana hdĭp mda ti ƀuôn jĕ giăm dưi mđĭ hĭn.”

Knăm mơak mdiê mrâo ruê̆ hlăm klei hơ̆k mơak, jing klei kă bi mguôp êpul êya hlăm hruê akŏ thŭn mrâo. Dŭm čhiên kpiê leh anăn klei kdŏ čhuang msĕ si klei bi klă kơ ai hdĭp ktang mơ̆ng knhuah dhar kreh Sêdang ti čư̆ čhiăng Dak Lak. Bi ktlah hŏng ƀuôn Hring ăt dôk hdơr kơ sa yan boh mnga trei mđao leh anăn klei khăp anak mnuih ăt kwang nanao mbĭt hŏng ênai čing ti krah čư̆ čhiăng./.