Mơ̆ng aguah ưm, lu mnuih ƀuôn sang kƀĭn hlăm wăl sang dhar kreh êpul êya bon Jarah, să Nâm Nung, čar Lâm Đồng čiăng nao hlăm Knăm mơak Tăm Blang Mprang bon.  Hlăm ai êwa mơak mñai ênai čing čhar, êa mil kdrăp djuê ana jăk mơak, mnuih ƀuôn sang mơak kdŏ mmuñ hlue ênai čing “Drông tue”. Sa čô êkei êdam Mnông čŏng hưn mthâo: Anăn kâo Y’ Bằng, hruê anei kâo hŏng êpul ƀon Jarah mkŏ mjing knăm mơak “Tăm blang mprang ƀon” ti ƀon Jarah čiăng akâo adiê hlĭn djŏ yan, angĭn hjan jăk , čiăng klei êđăp ênang amâo mâo ôh klei ruă tưp, leh anăn čiăng kơ mnuih ƀuôn sang hdĭp êđăp ênang leh anăn akâo kơ yan boh mnga mâo lu čiăng mnuih ƀuôn sang mơak mñai, mnuih ƀuôn sang tinei dôk djă pioh klei dhar kreh mơ̆ng đưm, knhuah dhar kreh amâo dưi lui ôh”.

 Ti anăp sang dhar kreh êpul êya ƀon Jarah jing gơ̆ng ngă yang mnuih Mnông dưi bi msiam snăk. Tinei, mnơ̆ng ngă yang mâo mnuih ƀuôn sang mprăp leh jăk. Knăm ngă yang mâo 3 čeh kpiê, sa akŏ ŭn, sa pui hlĭn hnuê, hdăng kă mlei, sa čăp mrai kô̆ mmia êrah mnŭ, rup mnơ̆ng rông  msĕ si kbao, êmô, bê, mnŭ, dŭm mta mnơ̆ng dhơ̆ng lŏ hma leh anăn mnơ̆ng ƀơ̆ng djuê ana mnuih Mnông. Leh anăn sa mta mnơ̆ng amâo dưi kƀah ôh, anăn jing ana Ƀlang yua mgang ƀon.

Hlăm wăl yuôm bhăn, pô riu yang kwưh asăp: Ơ Yang čư̆, yang êa, yang dliê… hruê anei tinei ƀuôn sang akâo kơ phung yang wĭt dlăng Knăm pla kyâp mnư̆ mnang mgang ƀuôn, akâo kơ phung yang kriê dlăng ana kyâo bi jăk. Hmei ăt akâo kơ phung yang kriê dlăng klei hdĭp mnuih ƀuôn sang suaih pral, amâo mâo klei ruă duam. Tinei, hmei ngă yang akâo kơ phung yang wĭt tinei mnăm kpiê čeh, ƀơ̆ng čĭm ŭn hŏng ƀuôn sang.”

Leh klei riu yang, pô riu yang iêô khua mduôn mnăm kpiê čeh, klă sĭt hưn mthâo knăm mơak “Tăm blang mprang ƀon”. Êpul tông čing leh anăn kdŏ čhuang mkŏ mjing wang wĭl mdah klei kdŏ mmuñ jăk siam.

 Pô riu yang ti knăm mơak yuôm bhăn anei jing H’Đêm, sa čô mbruă ti ƀon

Jarah, să Nâm Nung. Ñu brei thâo “Knăm mơak Tăm blang mprang ƀon” mâo mkŏ mjing leh mjưh ruĕ klei hrui êmiêt boh mnga. Kdrêč ngă yang mâo 3 knăm phŭn tal êlâo jing ngă yang kơ aduôn aê atâo atiêt, ngă yang kơ yan buh pla, klei suaih pral, leh anăn knhal tuč jing klei ngă yang leh anăn huă čhưn Tăm blang mprang ƀon.  Leh ngă yang, khua mduôn ngă klei bhiăn “kă klei ti kngan” akâo klei êđăp ênang, suaih pral kơ mnuih ƀuôn sang hlăm ƀon leh anăn tue nao čhưn. Leh pla ana ƀlang ti  ƀăng jang sang dhar kreh êpul êya ƀon Jarah,

H’Đêm brei thâo: ““Hlăm knăm tăm blang mprang ƀon”, kâo bi ala kơ mnuih ƀuôn sang hlăm ƀuôn akâo kơ phung yang pap brei klei soh kơ mnuih ƀuôn sang leh anăn akâo kơ phung yang răng mgang ƀuôn sang êđăp ênang”.

Pô mbruă êdah êdi Y Xuyên, Khua mduôn ƀon Jarah, brei thâo: anei jing klei bhiăn sui thŭn mnuih Mnông, bi êdah klei mơak leh sa thŭn yan buh pla tŭ jing, ƀuôn sang jăk mơak, leh anăn čang hmăng thŭn mrâo jăk siam hĭn. Khua mduôn Y Xuyên ktưn hưn “Knăm mơak Tăm blang mprang ƀon” mrâo mâo Phŭn bruă dhar kreh mjuăt ktang asei mlei leh anăn hiu čhưn ênguê tŭ yap jing Mnơ̆ng kriê pioh amâo êda klă ala čar.“ Klei yuôm bhăn knăm “tăm blang mprang ƀon”jing čiăng răng mgang, amâo brei phung jhat mplư, bi rai ôh klei êđăp ênang ƀuôn sang, leh anăn čang hmăng anak čô amâo mâo ruă duam, mnuih ƀuôn sang suaih pral, jăk mơak; ngă pưk hma amâo mâo hlô mnơ̆ng bi rai leh anăn phung jhat bi rai. Anei jing dhar kreh djuê ana mnuih Mnông hmei.”

Knăm mơak Tăm Blang M’prang bon mnuih M’nông ti krĭng krŭ kdơ̆ng  Nâm Nung, čar Lâm Đồng mjưh ruĕ hlăm ênai kwang čing čhar leh anăn klei hơ̆k mơak êpul êya. Mơ̆ng klei bhiăn yuôm bhăn truh kơ ai êwa knăm mơak, jih jang bi êdah klei čang hmăng kơ sa thŭn mrâo yan adiê găl jăk, êtak êbai mâo lu, ƀuôn sang êđăp ênang, suaih pral, bi hgŭm leh anăn lŏ dơ̆ng hrăm mbĭt răng kriê, mđĭ lar mnơ̆ng kriê pioh dhar kreh yuôm bhăn djuê ana./.